ហាត់ប្រាណគឺជាកត្តាមួយល្អសម្រាប់សុខភាពរាងកាយនិងសុខភាពផ្លូវចិត្ត ។ អត្ថប្រយោជន៍សុខភាពដែលបានមកពីការហាត់ប្រាណទៀងទាត់ជាសកម្មភាពមួយដែលគេមិនគួរមើលរំលង ។ ចូរចាប់យកអត្ថប្រយោជន៍ទាំងនេះទៅធ្វើជាកម្មសិទ្ធិរបស់លោកអ្នក។ តាមអ្នកជំនាញ ការធ្វើលំហាត់ប្រាណទៀងទាត់រាល់ថ្ងៃផ្តល់អត្ថប្រយោជន៍សំខាន់ៗ ៧ចំណុចដូចខាងក្រោម ៖
១-ជួយទប់ទល់ការឡើងទម្ងន់ខ្លួន ៖
ហាត់ប្រាណទៀងទាត់ជួយទប់ស្កាត់ល្បឿននៃការឡើងទម្ងន់ខ្លួន ។ នៅពេលរាងកាយមានសកម្មភាព កាឡូរីនឹងត្រូវដុតបំផ្លាញ(ធ្វើសកម្មភាពរាងកាយកាន់តែយូរ ការដុតបំផ្លាញកាឡូរីកាន់តែច្រើនផងដែរ) ។ គេមិនចាំបាច់ត្រូវការពេលវេលាច្រើនដើម្បីធ្វើវានោះទេ ។ ប្រសិនជាលោកអ្នកគ្មានពេលវេលាទៅក្លឹបសកម្មភាពប្រចាំថ្ងៃ ក៏អាចចាត់ទុកជាការហាត់ប្រាណបានដែរ ។ លោកអ្នកអាចជំនួសការឡើងជណ្តើរយន្តដោយជណ្តើរថ្មើរជើង ឬជំនួសដោយការបើកបរទៅធ្វើការដោយការដើរឬជិះកង់ទៅធ្វើការ ។
២-ប្រឆាំងនឹងជំងឺកាចសាហាវផ្សេងៗ ៖
តើលោកអ្នកភ័យខ្លាចកើតជំងឺបេះដូង លើសឈាម ទឹកនោមផ្អែម មហារីក ជំងឺដាច់សរសៃឈាមក្នុងខួរក្បាល ឡើងខ្លាញ់កូឡេស្តេរ៉ូល/Triglycerides… ដែរទេ ? តាមពិតទៅ ការហាត់ប្រាណទៀងទាត់មិនអាចព្យាបាលជំងឺទាំងអស់នេះបានទេ ប៉ុន្តែវាត្រឹមតែអាចបង្ការ ឬកាត់បន្ថយហានិភ័យប៉ុណ្ណោះ ។
៣-ធ្វើឱ្យល្អប្រសើរដល់សុខភាពផ្លូវចិត្ត ៖
ការហាត់ប្រាណចាប់ពី៣០នាទីឡើងទៅពិតជាជួយបំបាត់ភាពតានតឹងក្នុងចិត្តបានមួយចំណែកធំ ហើយបន្ទាប់មកធ្វើឱ្យអ្នកមានអារម្មណ៍ស្រស់ ។
៤-ជួយបង្កើនថាមពលរាងកាយ ៖
ការធ្វើសកម្មភាពរាងកាយទៀងទាត់អាចជួយធ្វើឱ្យប្រសើរដល់កម្លាំងសាច់ដុំ និងជួយបង្កើនភាពអំណត់ ។
៥-ជំរុញដល់ការទទួលទានដំណេក ៖
ធ្វើសកម្មភាពរាងកាយទៀងទាត់អាចជួយឱ្យអ្នកដេកឆាប់លក់ស្កប់ស្កល់ជាងពេលមុន ។
៦-ជួយធ្វើឱ្យល្អប្រសើរដល់ជីវិតផ្លូវភេទ ៖
ការសិក្សាស្រាវជ្រាវតាមបែបវិទ្យាសាស្ត្រកន្លងមកបានបង្ហាញថា ហាត់ប្រាណទៀងទាត់ជួយដាស់ចំណង់ផ្លូវភេទស្ត្រី ខណៈបុរសជួយធ្វើឱ្យល្អប្រសើរដល់ភាពងើបរឹងរបស់អង្គជាតិ ។ បណ្តាបុរសដែលហាត់ប្រាណទៀងទាត់ជួបហានិភ័យងាប់លិង្គតិចបំផុតធៀបនឹងបុរសដែលមិនហាត់ប្រាណ ។
៧-ជួយបង្កើនភាពរីករាយ ៖
ហាត់ប្រាណអាចជាមធ្យោបាយមួយជួយបង្កើនភាពរីករាយដល់ជីវិតដ្បិតវាបានបង្កលក្ខណៈនៃការជួបប្រាស្រ័យស្គាល់គ្នាជាមួយមនុស្សផ្សេងទៀតក្នុងសង្គម ក៏ដូចជាជួយបង្កើនទំនាក់ទំនងពីបុគ្គលម្នាក់ទៅបុគ្គលម្នាក់ឱ្យកាន់តែជិតស្និទ្ធឡើង ៕
ចែករំលែកព័តមាននេះ