ក្រុមអ្នកស្រាវជ្រាវអាមេរិកបានអះអាងថា លេបថ្នាំគ្រាប់វីតាមីនចម្រុះអាចជួយជំរុញឱកាសប្រឆាំងនឹងជំងឺមហារីកសុដន់ដល់ស្ត្រីវ័យចំណាស់។ ការសិក្សាដែលធ្វើឡើងដោយអ្នកវិទ្យាសាស្ត្រមកពីមហាវិទ្យាល័យ Albert Einstein College of Medicine ក្រុងញូវយ៉ក សហរដ្ឋអាមេរិកលើស្ត្រីមានរោគសញ្ញាមហារីកដោះវ័យពី៥០ ទៅ៧៩ឆ្នាំប្រមាណ៨ពាន់នាក់បានបង្ហាញថា លេបថ្នាំគ្រាប់វីតាមីនចម្រុះរាល់ថ្ងៃអាចជួយកាត់បន្ថយអត្រាស្លាប់ដល់ស្ត្រីអស់រដូវដែលកំពុងរងគ្រោះពីមហារីកដោះបានដល់ទៅ៣០ភាគរយ ។
សាស្ត្រាចារ្យ Sylvia Wassertheil-Smoller អ្នកដឹកនាំការសិក្សាស្រាវជ្រាវបានថ្លែងថា ការរកឃើញលើកនេះពិតជាគួរឱ្យភ្ញាក់ផ្អើល ព្រោះមិនធ្លាប់មានការសិក្សាស្រាវជ្រាវណាមួយពីមុនមករកឃើញថា វីតាមីនចម្រុះមានប្រសិទ្ធភាពជួយកាត់បន្ថយលទ្ធភាពលើការអភិវឌ្ឍមហារីកដោះនោះទេ ។ លោកស្រីបន្តថា យើងមិនដឹងថាតើ វីតាមីននិងសារធាតុរ៉ែទាំងនេះធ្វើការរបៀបណានោះទេ។
យើងដឹងត្រឹមតែថា វាអាចជួយកែលម្អដល់សុខភាពជាទូទៅរបស់ស្ត្រីប៉ុណ្ណោះ ។ យ៉ាងណាក៏ដោយ តាមទ្រឹស្តីមួយអះអាងថា ប្រសិទ្ធភាពរបស់វីតាមីនទៅលើមហារីក ក៏ព្រោះ វាជួយបង្កើនកម្រិតកោសិកា Cellularតាមរយៈការបញ្ឈប់ដំណើរការមួយហៅថា Oxidation ដែលជាប់ទាក់ទងនឹងការអភិវឌ្ឍទៅជាជំងឺមហារីក ៕
ចែករំលែកព័តមាននេះ