បណ្តាភេសជ្ជៈប៉ូវកម្លាំងភាគច្រើនបំផុតផ្ទុកទៅដោយសារធាតុកាហ្វេអុីនក្នុងចំនួនយ៉ាងច្រើន ខណៈមួយចំនួនដទៃទៀតផ្ទុកស្ករនិងសារធាតុផ្សេងៗ ។ សារធាតុទាំងនេះហើយដែលជួយជំរុញដល់ថាមពលរាងកាយ ប៉ុន្តែបានតែមួយរយៈពេលខ្លីប៉ុណ្ណោះ និងអាចនាំមកនូវបញ្ហាសុខភាពមួយផ្នែកផងដែរ ។
ប្រសិនជា ភេសជ្ជៈប៉ូវកម្លាំងណាដែលផ្ទុកស្ករច្រើននឹងអាចបណ្តាលឱ្យឡើងទម្ងន់ខ្លួនខណៈពពួកដែលផ្ទុកសារធាតុកាហ្វេអុីនច្រើនអាចបណ្តាលឱ្យសម្ពាធឈាមឡើងខ្ពស់ បេះដូងលោតញាប់ ដេកមិនលក់ មានអារម្មណ៍ឆេវឆាវឆាប់ខឹង ចិត្តជ្រួលច្របល់ជាដើម ។
ដោយឡែក ការលាយភេសជ្ជៈប៉ូវកម្លាំងជាមួយស្រាគឺរឹតតែបង្កើតបញ្ហាដល់សុខភាពបន្ថែមទៀត ។ បើទោះជា វាអាចកាត់បន្ថយការស្រវឹង ហើយនាំឱ្យអ្នកផឹកបានកាន់តែច្រើន តែទីបំផុតឈានទៅរកការរងរបួសបណ្តាលមកពីការស្រវឹងដដែល ។ សម្រាប់មនុស្សមួយចំនួនធំដែលទទួលទានភេសជ្ជៈប៉ូវកម្លាំងម្តងម្កាលគឺជារឿងល្អទៅវិញ ប៉ុន្តែចូរផឹកត្រឹមចំណុះ ៥០០មិល្លីលីត្រក្នុងមួយថ្ងៃទើបជាការប្រសើរ ។
ចំពោះអ្នកលើសឈាម ស្ត្រីមានផ្ទៃពោះ ស្ត្រីកំពុងបំបៅដោះកូន និងអ្នកមានជំងឺបេះដូង ការប្រើប្រាស់ភេសជ្ជៈប៉ូវកម្លាំងមិនមែនជាជម្រើសល្អឡើយ ។ ក្នុងករណី ខានមិនបាន គេគួរកំណត់បរិមាណនៃការប្រើប្រាស់ឬពិគ្រោះយោបល់ជាមួយគ្រូពេទ្យជំនាញ ៕
ចែករំលែកព័តមាននេះ