ខេត្តប៉ៃលិន ៖ ជនសង្ស័យម្នាក់ត្រូវបានកម្លាំងនគរបាលការិយាល័យប្រឆាំងការជួញដូរគ្រឿងញៀន នៃស្នងការខេត្ត ធ្វើការចាប់ឃាត់ខ្លួន និងរូបអូសបានវត្ថុតាងថ្នាំញៀនប្រភេទមេតំហ្វេតាមីនពណ៌ផ្កាឈូក ចំនួន ៥គ្រាប់ ខណៈដែលជនសង្ស័យរូបនោះ កំពុងធ្វើការចែកចាយបន្តទៅឲ្យអ្នកប្រើប្រាស់ផ្សេងទៀត។
ខេត្តប៉ៃលិន ៖ ជនសង្ស័យម្នាក់ត្រូវបានកម្លាំងនគរបាលការិយាល័យប្រឆាំងការជួញដូរគ្រឿងញៀន នៃស្នងការខេត្ត ធ្វើការចាប់ឃាត់ខ្លួន និងរូបអូសបានវត្ថុតាងថ្នាំញៀនប្រភេទមេតំហ្វេតាមីនពណ៌ផ្កាឈូក ចំនួន ៥គ្រាប់ ខណៈដែលជនសង្ស័យរូបនោះ កំពុងធ្វើការចែកចាយបន្តទៅឲ្យអ្នកប្រើប្រាស់ផ្សេងទៀត។
ការចាប់ឃាត់ខ្លួនជនសង្ស័យរូបនេះ បានធ្វើឡើងកាលពីវេលាម៉ោង ៣ និង ១២នាទី រសៀលថ្ងៃទី៣០ តុលា ២០១៣ ក្នុងផ្ទះជនសង្ស័យត្រង់ចំណុចខាងជើងកាស៊ីណូម្កុដពេជ្រ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ។ ជនសង្ស័យឈ្មោះ ងួន សុផល ភេទប្រុស អាយុ ៥៤ឆ្នាំ ជាអ្នកស៊ីឈ្នួលបោកអ៊ុតខោអាវឲ្យគេ ស្នាក់នៅបណ្តោះអាសន្នក្នុងផ្ទះកើតហេតុខាងលើ។
លោក ឈុន ណាត នាយការិយាល័យប្រឆាំងការជួញដូរគ្រឿងញៀន នៃស្នងការនគរបាលខេត្ត បានឲ្យដឹងថា សមត្ថកិច្ចបានទទួលសេចក្តីរាយការណ៍ពីកម្លាំងសម្ងាត់ថា មានករណីជួញដូរ និងចែកចាយថ្នាំញៀននៅចំណុចភូមិខាងលើ ទើបកងកម្លាំងរបស់លោកបានចុះទៅបង្រ្កាបជាក់ស្តែងភ្លាមៗ ដោយឃាត់ខ្លួនបុរសម្នាក់ និងរឹបអូសបានវត្ថុតាងថ្នាំញៀនប្រភេទមេតំហ្វេតាមីនពណ៌ផ្កាឈូក ចំនួន ៥គ្រាប់ នៅជាប់នឹងខ្លួនជនសង្ស័យ ដោយបុរសរូបនោះ កំពុងតែធ្វើសកម្មភាពចែកចាយបន្តទៅឲ្យអ្នកប្រើប្រាស់ជាច្រើននាក់ទៀតនៅក្នុងភូមិខាងលើ។
លោក ឈុន ណាត បានបន្តទៀតថា ក្រោយពេលឃាត់ខ្លួនជនសង្ស័យបានសារភាពថា រូបគេពិតជាបានរកស៊ីជួញដូរថ្នាំញៀនមែន ដោយមានរយៈពេលជាង ២ខែ មកហើយ។ ថ្នាំញៀនទាំងនោះ រូបគេបានទិញពីបុរសម្នាក់ឈ្មោះ ប្រុស អាយុជាង ៤០ឆ្នាំ តែអត់ស្គាល់អាសយដ្ឋានរស់នៅរបស់គេពិតប្រាកដនោះទេ ដោយថ្នាំញៀនទាំងនោះ ទិញមកក្នុង ១គ្រាប់ តម្លៃ ១ម៉ឺនរៀល ហើយលក់ចេញទៅវិញក្នុង ១គ្រាប់ តម្លៃ ១៤០០០ពាន់រៀល។
ជនសង្ស័យត្រូវបានកងកម្លាំងនគរបាលការិយាល័យប្រឆាំងគ្រឿងញៀន នៃស្នងការខេត្តប៉ៃលិន រៀបចំសំណុំរឿងបញ្ជូនទៅអយ្យការអមសាលាដំបូងខេត្ត នៅវេលាម៉ោង ២ និង ៣០នាទីរសៀល ថ្ងៃទី៣១ តុលា ២០១៣ ដើម្បីចាត់ការទៅតាមនីតិវិធីច្បាប់៕
ចែករំលែកព័តមាននេះ