ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា ថ្លែងកាលពីថ្ងៃទី១៥ មីនា កន្លងមក ថា រូបលោកមានការព្រួយបារម្ភយ៉ាងខ្លាំងអំពីបញ្ហាសុខភាពរបស់មនុស្សដោយសារវិបត្តិនុយក្លេអ៊ែររបស់ប្រទេសជប៉ុន ដែលកើតឡើងព្រោះការរញ្ជួយដីដ៏ខ្លាំងមួយ ហើយលោកបានសច្ចាថា នឹងកែលំអបញ្ហាសុវត្ថិភាពនៅមជ្ឈ មណ្ឌលបរមាណូរបស់អាមេរិក ។ លោកអូបាម៉ា ថ្លែងដូច្នេះនៅក្នុងបទសម្ភាសន៍មួយជាមួយទូរទស្សន៍ CBS ក្នុងរដ្ឋផេនស៊ីលវេនៀ ។ ក្នុងឱកាសនោះដែរ លោកប្រធានាធិបតីអូបាម៉ា ថ្លែងថា «រោងចក្រនុយក្លេអ៊ែរត្រូវបានបង្កើតឡើងដើម្បីទ្រទ្រង់កម្រិតថាមពលដូច្នេះអ្វីដែលបានកើតឡើងនៅប្រទេសជប៉ុនវាមានសារសំខាន់បំផុត សម្រាប់យើងពិនិត្យថា តើយើងអាចកែលំអបញ្ហាសុវត្ថិភាព និងកិច្ចដំណើរការនៅរោងចក្រនុយក្លេអ៊ែររបស់យើងដោយរបៀបណា?» ។
លោកអូបាម៉ា ថ្លែងទៀតថា រូបលោកមិនមានការព្រួយបារម្ភថា វិទ្យុសកម្មដែលលេចធ្លាយចេញពីរោងចក្រនុយក្លេអ៊ែរនៅប្រទេសជប៉ុនអាចចូលដល់តំបន់ឆ្នេរសមុទ្រសហរដ្ឋអាេមរិកនោះទេ ។ លោកប្រធានាធិបតីអូបាម៉ា ថ្លែងទៀតថា យើងមានការព្រួយបារម្ភយ៉ាងខ្លាំងចំពោះពលរដ្ឋជប៉ុន ដែលទទួលរងគ្រោះ៣ប្រភេទ គឺការរញ្ជួយដី រលកស៊ូណាមី នឹងឧប្បត្តិហេតុនៅរោងចក្រនុយក្លេអ៊ែរ ដែលបណ្តាលឱ្យលេចធ្លាយវិទ្យុសកម្ម ដូច្នេះអ្វីដែលសំខាន់ជាងនេះ ទៀតនោះ អាមេរិកត្រូវតែរៀនពីវបត្តិនុយក្លេអ៊ែររបស់ប្រទេសជប៉ុន ៕
ចែករំលែកព័តមាននេះ