ឈឺបំពង់កបង្កឡើងដោយពពួកបាក់តេរីដែលភាគច្រើនជំងឺនេះតែងតែកើតមានចំពោះកុមារ ធ្វើឱ្យជួបផលលំបាកក្នុងការទទួលទានអាហារ ក៏ដូចជាបំបៅជាដើម ។ បើសិនមាតាបិតាមិនបានយកចិត្តទុកដាក់ចំពោះកុមារដែលកើតជំងឺប្រភេទនេះទេ នឹងវិវឌ្ឍទៅរកគ្រោះថ្នាក់ធ្ងន់ធ្ងរ ។
លោកវេជ្ជបណ្ឌិត ហុង សុខឃាង ឯកទេសរោគកុមារនៃមន្ទីរពេទ្យកុមារជាតិ បានប្រាប់កោះសន្តិភាពឱ្យដឹងថា ឈឺបំពង់កគឺជាប្រភេទជំងឺម្យ៉ាងដែលកើតមានជាញឹកញាប់ទៅលើកុមារ ។ ចំពោះកុមារធំអាចនិយាយប្រាប់ថា ពួកគេឈឺក ប៉ុន្តែសម្រាប់កុមារតូចៗវិញមិនអាចនិយាយបាននោះទេ ឪពុកម្តាយអាចកត់សម្គាល់បានតាមរយៈអាការៈមួយចំនួនដូចជា មិនព្រមទទួលទានអាហារឬបៅ និងយំនៅពេលបៅជាដើម ។ ឈឺបំពង់កបង្កឡើងដោយមេរោគវីរុស និងពពួកបាក់តេរី ។ នៅពេលកុមារកើតមានបញ្ហាឈឺក លោកអ្នកជាឪពុកម្តាយគួរប្រើថ្នាំ Paracetamol ឬ Ibuprofen តាមការណែនាំរបស់គ្រូពេទ្យ ពិសេសលោកអ្នកគួរជំរុញឱ្យកុមារទទួល ទានសារធាតុរាវឱ្យបានច្រើន ។ អំឡុងពេលនេះកុមារអាចពិបាកក្នុងការទទួលទានអាហារ ដូច្នេះគួរតែប្តូរពីអាហាររឹងទៅជារាវ ឬអាហារទន់ ក្តៅឧណ្ហៗឱ្យបានច្រើន ។ សូមចៀសវាងនូវការប្រើប្រាស់អ្វីដោយពុំមានវេជ្ជបញ្ជាឱ្យសោះ ចៀសវាងប្រតិកម្មជំងឺ។
គួរចងចាំថា បើសិនជាអាការៈឈឺបំពង់កកូនរបស់លោកអ្នកអូសបន្លាយលើសពី៤៨ម៉ោង ឬកូនរបស់អ្នកទទួលទានអាហារ ឬក៏បៅបានតិចពេក ត្រូវនាំកូនមកជួបជាមួយគ្រូពេទ្យជាបន្ទាន់ ។ ជាពិសេស បើកូនរបស់លោកអ្នកកើតមានអាការៈមួយចំនួនដូចជា ៈ ហូរទឹកមាត់ច្រើន, លេបអាហារមិនចូល, ពិបាកដកដង្ហើម, កើតមានស្នាមអុជៗលើស្បែក, ពេលដកដង្ហើមឮសូរខ្លាំង ឬក៏មិនដកដង្ហើមម្តងៗនៅពេលគេងលក់, ហើមកូនកណ្តុរនៅគល់ក, ល្ហិតល្ហៃ ជាដើម ប្រញាប់នាំគេមកកាន់មន្ទីរពេទ្យជាបន្ទាន់ ។
លោកវេជ្ជបណ្ឌិត ហុង សុខឃាង បានបញ្ជាក់ថា ចំពោះវិធីការពារកុំឱ្យកូនរបស់អ្នកកើតមានជំងឺឈឺបំពង់ក គួរតែអនុវត្តតាមវិធីខាងក្រោម ៖ ពឹងផ្អែកមួយភាគទៅលើអនាម័យ, ចៀសវាងលេងជាមួយកុមារមានជំងឺ, លាងដៃនិងសម្អាតខ្លួនឱ្យបានញឹកញាប់, លាងសម្អាតប្រដាប់ប្រដាដែលក្មេងលេង, អនាម័យក្នុងការរៀបចំអាហារ និងភេសជ្ជៈសម្រាប់កុមារ ៕
ចែករំលែកព័តមាននេះ