ការនិយាយតគ្នាពីមាត់មួយទៅមាត់មួយដែលថា ទទួលទានពពួកសណ្តែកផ្តល់ផលល្អដល់បេះដូងនោះ ឥឡូវនេះបានក្លាយជាពិតហើយខណៈដែលការសិក្សាតាមបែបវិទ្យាសាស្ត្រមួយបានបញ្ជាក់អះអាងថា ទទួលទានសណ្តែកអាចជួយសង្គ្រោះជីវិតបាន ជាពិសេសសម្រាប់អ្នកមានជំងឺទឹកនោមផ្អែមប្រភេទ២ ។
ក្រុមអ្នកស្រាវជ្រាវនៅសាកលវិទ្យាល័យ Toronto ប្រទេសកាណាដារកឃើញថា ពពួកសណ្តែកអាចជួយកាត់បន្ថយអត្រាគ្រោះថ្នាក់ពីជំងឺបេះដូងបានតាមរយៈការជួយធ្វើឱ្យល្អប្រសើរនូវការគ្រប់គ្រងកម្រិតជាតិស្ករក្នុងឈាម ។ របបអាហារធ្វើពីពពួកសណ្តែកដែលមានជាតិស្ករទាប (GI)ត្រូវគេរកឃើញថា អាចធ្វើឱ្យល្អប្រសើរនូវការគ្រប់គ្រងកម្រិតជាតិស្ករព្រមទាំងអាចកាត់បន្ថយការកើតមានជំងឺបេះដូង(CHD)ចំពោះអ្នកកើតទឹកនោមផ្អែម ។
អំឡុងការសិក្សាពិសោធន៍ វេជ្ជបណ្ឌិត David Jenkins និងសហការីរបស់ខ្លួនបានធ្វើតេស្តមើលពីប្រសិទ្ធភាពនៃការទទួលទានអាហារធ្វើពីសណ្តែករបស់អ្នកជំងឺទឹកនោមផ្អែមប្រភេទ២ចំនួន១២១នាក់ ។ ជាលទ្ធផលបានបង្ហាញថា របបអាហារធ្វើពីពពួកសណ្តែកដែលមានជាតិស្ករទាប (GI)អាចកាត់បន្ថយជំងឺបេះដូងបានដល់០.៨ភាគរយ ។
វេជ្ជបណ្ឌិត David Jenkins បានថ្លែងថា ៖«ការប្រើប្រាស់បន្លែក្នុងបរិមាណប្រហែលជា ១៩០ក្រាមក្នុងមួយថ្ងៃ(ពេញ១ពែង)ហាក់ដូចផ្តល់អត្ថប្រយោជន៍យ៉ាងពេញលេញចំពោះរបបអាហារដែលមានកម្រិតជាតិស្ករទាប និងព្រមទាំងអាចកាត់បន្ថយបាននូវអត្រាប្រឈមនឹងជំងឺបេះដូងតាមរយៈការកាត់បន្ថយសម្ពាធឈាម» ។
អាហារដែលមានកម្រិតជាតិស្ករទាបបានជាប់ពាក់ព័ន្ធនឹងការធ្វើឱ្យល្អប្រសើរនូវការគ្រប់គ្រងកម្រិតជាតិស្ករក្នុងឈាមចំពោះអ្នកកើតជំងឺទឹកនោមផ្អែមប្រភេទ២ជាយូរមកហើយ ។ លោកវេជ្ជបណ្ឌិត Jenkins បានបន្ថែមថា ៖«ការរកឃើញដែលថា ទទួលទានពពួកសណ្តែកជួយកែលម្អការគ្រប់គ្រងជាតិស្ករ និងកាត់បន្ថយអត្រាកើតជំងឺបេះដូង ពិតជាមានសារសំខាន់ខ្លាំងណាស់ ដ្បិតជំងឺទឹកនោមផ្អែមប្រភេទ២កំពុងតែកើនឡើងយ៉ាងឆាប់រហ័ស» ៕
ចែករំលែកព័តមាននេះ