ខេត្ដកំពង់ស្ពឺ ៖ ជនទំនើងម្នាក់ក្នុង ចំណោម៦នាក់ ឈ្មោះអុល ផល្លី អាយុ២៧ ឆ្នាំ ត្រូវបានចាប់ខ្លួននៅចំណុចភូមិអំពិលរុង ខាងកើត ឃុំទំនប់ធំ ស្រុកពញាឮ ខេត្ដកណ្ដាល នាវេលាម៉ោង៥ល្ងាច ថ្ងៃទី១០ ឧសភា ពីបទប៉ុនប៉ងមនុស្សឃាតចំថ្ងៃបុណ្យ បញ្ចុះសីមាក្នុងវត្ដក្បាលអូរ ឃុំព្រះស្រែ ស្រុកឧដុង្គ កាលពីយប់ថ្ងៃទី៧ ឧសភា កន្លងទៅនេះ ។ មន្ដ្រីកងរាជអាវុធហត្ថនៃបញ្ជាការដ្ឋាន ខេត្ដបានឱ្យដឹងថា ក្រុមជនទំនើងដែលធ្លាប់ មានទំនាស់កាប់ចាក់គ្នាជាហូរហែពេលបុណ្យចូលឆ្នាំ បុណ្យដារបាតលាន ឬមង្គលការនោះ មាន២ក្រុម ដែលក្រុមទី១ មានគ្នា១២នាក់ រស់នៅក្នុងភូមិអំពិលរូងខាងកើត និងមួយក្រុមទៀតមានគ្នា៦នាក់ រស់នៅក្នុងភូមិ អំពិលរូងខាងលិច ក្នុងឃុំទំនប់ធំ ស្រុកពញាឮ បានស្កាត់កាប់ចាក់គ្នាយកស្លាប់រស់ ក្នុងឱកាសបុណ្យបញ្ចុះសីមានាវត្ដភូមិក្បាលអូរក្នុងឃុំព្រះស្រែនេះ។
ទំនាស់ដ៏ស្រួចស្រាវនេះ បង្កឡើងដោយក្រុមជនទំនើងទាំងពីរក្រុម ដែលមួយក្រុមមានគ្នា៦នាក់ បានស្ទាក់វាយ ទៅលើក្រុមមានគ្នា១២នាក់ ខណៈល្ខោន បាសាក់កំពុងសំដែងកំដរបុណ្យ បណ្ដាលឱ្យអ្នកមើលល្ខោនរត់ជាន់គ្នា ព្រោះឃើញជន ម្នាក់ក្នុងចំណោមភាគីទំនាស់ទាំង២ ត្រូវគេកាប់នឹងកាំបិតប៉័ងតោចំក្បាលហូរឈាម សស្រាក់ដួលសន្លប់មុខរោងល្ខោននោះ ។ ជនរងគ្រោះក្នុងហេតុការណ៍កាប់ចាក់គ្នានេះ ឈ្មោះប៉ក យ៉ុន ភេទប្រុស អាយុ២៦ឆ្នាំ នៅភូមិអំពិលរូងខាងលិចឃុំទំនប់ធំ ។
តាមប្រភពព័ត៌មានថា បន្ទាប់ពីសមត្ថកិច្ចកងការពារសុវត្ថិភាពពិធីបុណ្យនេះបានអន្ដរាគមន៍នោះ ក្រុមជនដៃដល់បានគេចខ្លួនបាត់អស់សល់តែជនរងគ្រោះដេកសន្លប់ដោយរបួសក្បាល និងដងខ្លួនច្រើនកាំបិតត្រូវនាំ ទៅសង្គ្រោះនៅឯមន្ទីរពេទ្យទាំងយប់ ។ ចំណែកជនជាប់ចោទដែលត្រូវចាប់ខ្លួនបានក្រោយពីធ្វើការកំណត់មុខសញាច្បាស់លាស់ និងចេញបទបញ្ជាផ្ទាល់ពីលោកឧត្ដមសេនីយ៍ត្រី ម៉ែន ស៊ីប៊ន មេបញ្ជាការប៉េអឹមខេត្ដ ត្រូវបានចោទប្រកាន់ពីបទប៉ុនប៉ងមនុស្សឃាត និងបំពេញសំណុំលិខិតបញ្ជូនទៅសាលាដំបូងខេត្ដ ។
ចែករំលែកព័តមាននេះ