ទីភ្នាក់ងារព័ត៌មានចិនស៊ីនហួរាយការណ៍ថា ការរញ្ជួយដីដ៏មានឥទ្ធិពលមួយកម្រិត៨,៨រីស្ទ័រ កើតឡើងនៅកោះហុនស៊ូភាគឦសានប្រទេសជប៉ុន កាលពីវេលាម៉ោង២និង៥៦នាទីរំលងអធ្រាត្រម៉ោងក្នុងស្រុកថ្ងៃទី១១ មីនា។ ទីភ្នាក់ងារភូមិសាស្ត្រជប៉ុននិយាយថា បាតុភូតរញ្ជួយដីនេះធ្វើឱ្យញ័ររង្គើរតំបន់ទាំងឡាយនៃឆ្នេរមហាសមុទ្រប៉ាស៊ីហ្វិករបស់ជប៉ុន ហើយញ័រដល់ក្រុងតូក្យូ និងក្រុងអូសាកា ដែលជាក្រុងធំៗរបស់ជប៉ុន ។
មនុស្សជាច្រើននាក់ត្រូវបានរាយការណ៍ថា រងរបួសក្នុងការរញ្ជួយដីនេះ ។ បាតុភូតគ្រោះធម្មជាតិរញ្ជួយដីនេះកើតឡើងចម្ងាយ៣៨២គីឡូម៉ែត្រ ភាគឦសានក្រុងតូក្យូ ដោយកើតឡើងជម្រៅ១០គីឡូម៉ែត្រ ក្រោមបាតសមុទ្រ ។ ពុំមានរបាយការណ៍អំពីអ្នកស្លាប់ និងការខូចខាតក្នុងការរញ្ជួយដីនោះនៅឡើយទេ ។
ទាក់ទិនទៅនឹងការរញ្ជួយដីនេះ ជប៉ុនបានចេញការព្រមានពីរលកយក្សស៊ូណាមី កម្ពស់ដល់៦ម៉ែត្រ ហើយមជ្ឈមណ្ឌលព្រមានពីរលកយក្សស៊ូណាមី នៅរដ្ឋហាវ៉ៃ សហរដ្ឋអាមេរិក និយាយថា ការព្រមានពីរលកយក្សស៊ូណាមី នេះ គឺសម្រាប់ប្រទេសជប៉ុន ប្រទេសរុស្ស៊ី និងកោះ Marcus ។ នេះជាលើកទី២ហើយដែលការរញ្ជួយដីដ៏មានឥទ្ធិពលបានកើតឡើងនៅប្រទេសជប៉ុន ក្នុងរយៈពេលមិនដល់មួយសប្តាហ៍ផង ៕
ចែករំលែកព័តមាននេះ