ការសិក្សាស្រាវជ្រាវថ្មីមួយបានបង្ហាញថា បណ្តាស្ត្រីទទួលទានប៊័រធ្វើពីសណ្តែកដីគឺអាចកាត់បន្ថយហានិភ័យពីជំងឺមហារីកដោះបាន ។ ក្រុមអ្នកវិទ្យាសាស្ត្រមកពីសាកលវិទ្យាល័យWashington និងសាកលវិទ្យាល័យ Harvard បានរកឃើញថា ក្មេងស្រីវ័យជំទង់ដែលទទួលទានសណ្តែកដីទៀងទាត់ចន្លោះអាយុពី៩ទៅ១៥ឆ្នាំប្រឈមនឹងជំងឺដុំសាច់ក្នុងដោះ (benign breast disease) ពេលឈានចូលដល់វ័យ៣០ឆ្នាំតិចជាង៣៩ភាគរយ ។ សូមបញ្ជាក់ថា ក្នុងករណីខ្លះ ជំងឺ benign breast disease អាចបង្កើនហានិភ័យមហារីកដោះពេលក្រោយក្នុងជីវិត ។
ការពិសោធ២លើកដាច់ដោយឡែកពីគ្នាគឺចន្លោះឆ្នាំ១៩៩៦ដល់ឆ្នាំ២០០១និងចន្លោះឆ្នាំ២០០៥ដល់២០១០ លើក្មេងស្រីអាមេរិក៩ពាន់៣៩នាក់បានបង្ហាញជាលទ្ធផលថា ក្រុមដែលទទួលទានប៊័រសណ្តែកដីឬសណ្តែកដី២ដងក្នុងមួយសប្តាហ៍ ប្រឈមនឹងការកើតជំងឺ benign breast disease តិចជាង៣៩ភាគរយធៀបនឹងក្រុមដែលមិនទទួលទាន ។ លទ្ធផលបានបង្ហាញទៀតថា ទទួលទានពពួកសណ្តែកខៀវ ពោតនិងសណ្តែកសៀងក៏អាចទប់ស្កាត់ជំងឺនេះបានដែរ ប៉ុន្តែដោយអំឡុងពេលពិសោធន៍ ក្មេងស្រីទាំងអស់ទទួលទានតិចតួច ដូច្នេះប្រសិទ្ធភាពគឺតិចជាងសណ្តែកដី ។
វេជ្ជបណ្ឌិត Graham Colditz អនុប្រធានផ្នែកគ្រប់គ្រង និងបង្ការជំងឺមហារីកនៅមជ្ឈមណ្ឌលប្រឆាំងមហារីករបស់មន្ទីរពេទ្យ Barnes-Jewish Hospital បានថ្លែងថា៖«លទ្ធផលនៃការរកឃើញនាពេលនេះបានបង្ហាញយ៉ាងច្បាស់ថា ប៊័រធ្វើពីសណ្តែកដីអាចជួយកាត់បន្ថយហានិភ័យពីមហារីកសុដន់ចំពោះស្ត្រី»។
ចំណែកការរកឃើញលើកមុនដោយវិទ្យាស្ថានជំងឺមហារីកក្រុងសៀងហៃប្រទេសចិន ក៏បានបង្ហាញផងដែរថា ទទួលទានសណ្តែកដីនិងអាហារផ្សេងទៀតដែលសម្បូរវីតាមីន E អាចកាត់បន្ថយអត្រាកើតជំងឺមហារីកថ្លើម ក៏ដូចជាជួយការពារជំងឺបេះដូង និងការខូចភ្នែកចំពោះមនុស្សចាស់ ៕
ចែករំលែកព័តមាននេះ