យើងទាំងអស់គ្នាពិតជាដឹងយ៉ាងច្បាស់ថា ការបរិច្ចាគឈាមជាអំពើដ៏សប្បុរសធម៌ថ្លៃថ្លាបំផុតដែលអាចជួយសង្គ្រោះដល់អាយុជីវិតអ្នកត្រូវការវាជាចាំបាច់ ។ ប៉ុន្តែបើយោងតាមការសិក្សាស្រាវជ្រាវមួយពីក្រុមអ្នកវិទ្យាសាស្រ្តអាមេរិកបានបង្ហាញថា ការបរិច្ចាគឈាមផ្តល់អត្ថប្រយោជន៍ដល់សុខភាពផងដែរ។
យោងតាមការសិក្សាធ្វើឡើងដោយព្រឹត្តិបត្រសមាគមវេជ្ជសាស្រ្តអាមេរិកដែលបានពិសោធបុរសជាតិហ្វាំងឡង់ចំនួន២.៦៨២នាក់ វ័យពី៤៣ឆ្នាំទៅ៦១ឆ្នាំ បង្ហាញថាអ្នកដែលបរិច្ចាគឈាមរៀងរាល់៦ខែម្តងអាចកាត់បន្ថយអត្រាប្រឈមនឹងការកើតជំងឺគាំងបេះបូងបានដល់ទៅ៨៨% ធៀបទៅនឹងក្រុមដែលមិនបានបរិច្ចាគ ។ រៀងរាល់ការបរិច្ចាគឈាមចំណុះ1Pint ឬ៤៧៣,១៧មិល្លីលីត្រ គឺអាចដុតបំផ្លាញ កាឡូរីបាន៦៥០ ។
មានការពន្យល់ថា បរិចា្ចគឈាមផ្តល់អត្ថប្រយោជន៍ដល់សុខភាព ក៏ព្រោះនៅពេលបង្ហូរឈាមចេញ កម្រិតសារធាតុដែកនឹងថយចុះ ។ ការកើនឡើងកម្រិតសារធាតុដែកនឹងបណ្តាលឱ្យឈាមកាន់ែតខាប់ ហើយមួយវិញទៀតវានឹងជួយបង្កើនល្បឿននៃការធ្វើអុកស៊ីដកម្មរបស់ខ្លាញ់ កូឡេស្តេរ៉ូល ដែលទីបំផុតនាំឱ្យកើតជំងឺបេះដូង ។
យ៉ាងណាក៏ដោយ អត្ថប្រយោជន៍នោះអាចកើតមានទៅបាន ដរាបណាការបរិច្ចាគឈាមធ្វើឡើងជាប្រចាំ និងទៀងទាត់ពេលវេលា ពោលគឺមិនមែនយូរៗធ្វើម្តងនោះទេ ៕
ចែករំលែកព័តមាននេះ