ការបាញ់ប្រហារដោយអាវុធធុនធ្ងន់ និងកាំភ្លើងAKត្រូវបានស្តាប់ឮកាលពីថ្ងៃទី១៤ មីនា នៅទីក្រុងអាប៊ីដហ្សាន់ ក្នុងសង្កាត់ ADJAME ដែលជាលើកដំបូងក្លាយជាទីលាននៃអំពើហិង្សាដោយអាវុធតាំងពីចាប់ផ្តើមវិបត្តិក្រោយការបោះឆ្នោតមក។ យោងតាមសាក្សីជាច្រើនថា ការបាញ់ប្រហារដោយអាវុធធុនធ្ងន់ត្រូវបានស្តាប់ឮនាពេលរសៀលថ្ងៃទី១៤ មីនា ហើយចេញមកពីតំបន់ WILLIAMSVILLE ភាគកណ្តាលសង្កាត់ ADJAME ជាកន្លែងមានទីតាំងយោធាសំខាន់២។
ពួកបះបោរដែលគាំទ្រលោកអាឡាសសាន អ៊ូអាតារា ទទួលស្គាល់ជាប្រធានាធិបតីដោយសហគមន៍អន្តរជាតិត្រួតត្រាមួយផ្នែកធំនៃសង្កាត់អាបូបូជិតខាង។ ពួកបះបោរដែលប៉ះទង្គិចគ្នាជាមួយកងកម្លាំងស្មោះត្រង់នឹងប្រមុខរដ្ឋចប់អាណត្តិ លោកឡូរ៉ង់ ហ្សេបាបូ ដែលពុំព្រមចាកចេញពីអំណាច រយៈពេលប៉ុន្មានថ្ងៃចុងក្រោយនេះបានរុលឆ្ពោះទៅកាន់ភាគខាងត្បូងសង្កាត់អាបូបូទៅកាន់សង្កាត់ ADJAME និងសង្កាត់ COCODY ផងដែរ។ ការបាញ់ប្រហារដោយកាំភ្លើងធុនធ្ងន់ក៏កើតមានដែរនៅភាគខាងត្បូងសង្កាត់ YOPOUGON ទីតាំងបង្អែករបស់លោកហ្សេបាបូ ៕
ចែករំលែកព័តមាននេះ