រាជធានីភ្នំពេញ ៖ ជនសង្ស័យចំនួន៥នាក់ ដែលសមត្ថកិច្ចនិងអាជ្ញាធរខណ្ឌមានជ័យឃាត់ខ្លួនកាលពីថ្ងៃទី២ មីនា ឆ្នាំ២០១០ នៅក្នុងភូមិសាស្ដ្រសង្កាត់ស្ទឹងមានជ័យ ខណ្ឌមានជ័យ ដោយសារជាប់ពាក់ព័ន្ធទៅនឹងអំពើប្លន់យកគ្រឿងអលង្ការពីអាជីវករម្នាក់កាលពីថ្ងៃទី២៨ កុម្ភៈ នៅភូមិឫស្សី សង្កាត់ស្ទឹងមានជ័យនោះ បានសារភាពថា ពួកគេពិតជា បានធ្វើសកម្មភាពភ្ជង់ប្លន់យកគ្រឿងអលង្ការប្រាកដមែន ។
ជនសង្ស័យទាំង៥នាក់នេះមាន១-ឈ្មោះ ប្រាជ្ញ សុគីន ភេទប្រុស អាយុ២០ឆ្នាំ មុខរបរជាងតទឹក និងភ្លើងអគ្គិសនី ២-ឈ្មោះហួត សុវណ្ណ ហៅវ៉ាន់ អាយុ២៥ឆ្នាំ ៣-ឈ្មោះហ៊ីម ទិត្យសំបូរ អាយុ២៤ឆ្នាំ ៤-ឈ្មោះម៉ុល សុភ័ក្ដ្រ អាយុ២៨ឆ្នាំ ៥-ឈ្មោះកាំង រិទ្ធី អាយុ១៩ឆ្នាំ ។ ទាំង៥នាក់នេះ មានទីលំនៅក្នុងសង្កាត់ស្ទឹងមានជ័យទាំងអស់គ្នា ។
ជនឈ្មោះហួត សុវណ្ណ ហៅវ៉ាន់ បានសារភាពថា ពួកខ្លួនពិតជាបានធ្វើសកម្មភាពប្លន់គ្រឿងអលង្ការពីស្ដ្រីម្នាក់កាលពីថ្ងៃទី២៨ កុម្ភៈ ឆ្នាំ២០១០ ប្រាកដមែន ដោយបានទិញកាំភ្លើងនៅផ្សារទឹកថ្លា សង្កាត់ទឹកថ្លា ខណ្ឌសែនសុខ រួចហើយក៏រៀបគំរោងប្លន់ស្ដ្រី ឈ្មោះឈុន តា តែម្ដង។ ចំពោះគ្រឿងអលង្ការដែលពួកខ្លួនប្លន់បាន គឺចែកគ្នាយកទៅលក់ និងបញ្ចាំនៅកន្លែងផ្សេងៗគ្នា។
យោងតាមចំលើយសារភាពរបស់ជនសង្ស័យ ប៉ូលិសខណ្ឌមានជ័យបានសហការ ជាមួយសមត្ថកិច្ចកងរាជអាវុធហត្ថខណ្ឌបន្ដរុករកវត្ថុតាងដែលជនសង្ស័យធ្វើសកម្មភាពប្លន់បាន រួមមានគ្រឿងអលង្ការជាបា្លទីន៣០តម្លឹង មាស៧ជី លុយខ្មែរ៤លានរៀល លុយដុល្លារ១.០០០ដុល្លារ ដែលស្ដ្រីឈ្មោះឈុន តា បានអះអាងថា ត្រូវបាត់បង់ក្នុងហេតុការណ៍ប្លន់នោះ។ លើសពីនេះទៀត ប៉ូលិសកំពុងបន្ដចុះរកវត្ថុតាងគឺកាំភ្លើងខ្លីដែលក្រុមចោរប្លន់បានប្រើប្រាស់យកទៅភ្ជង់ប្លន់គ្រឿងអលង្ការ ខណៈពេលស្ដ្រីរងគ្រោះត្រឡប់ពីលក់ដូរវិញដល់មុខលំនៅឋាន ។
ចែករំលែកព័តមាននេះ