រាជធានីភ្នំពេញ ៖ មហាបាតុកម្មរបស់គណបក្សសង្គ្រោះជាតិ បានចាប់ផ្តើមឡើងដោយមានអ្នកចូលរួមច្រើនកុះករ នៅទីលានប្រជាធិបតេយ្យ ។ អ្នកដែលមានវត្តមាននៅទីលានប្រជាធិបតេយ្យនៅព្រឹកថ្ងៃទី២៣ តុលា មានចំនួនច្រើនពាន់នាក់ ។ នេះបើយោងតាមការវាយតម្លៃរបស់ក្រុមអង្គការសង្គមស៊ីវិល ដែលបានតាមដានព្រឹត្តិការណ៍ ។
ក្រុមបាតុករបានជ្រកក្រោមដំបូលប្រក់សំពត់តង់ ដើម្បីគេចពីកម្តៅថ្ងៃ និងខ្លះទៀតជ្រកក្រោមដើមឈើនៅវត្តភ្នំ ។ ជាមួយគ្នានេះនៅតាមបណ្តាច្រកចូលរាជធានីភ្នំពេញ អាជ្ញាធរមិនបានរារាំងអ្នកដំណើរដែលមកចូលរួមបាតុកម្មទេ ប៉ុន្តែគ្រាន់តែមានការឆែកឆេរ ខ្លះៗប៉ុណ្ណោះ ។ លោក សម រង្ស៊ី និងលោក កឹម សុខា បាននិយាយនៅមុខបាតុករនៅទីលានប្រជាធិបតេយ្យថា «បាតុកម្មរបស់យើងបានទទួលការអនុញ្ញាតពីអាជ្ញាធរមាន សមត្ថកិច្ច ដូចជាក្រសួងមហាផ្ទៃ និងសាលារាជធានីភ្នំពេញ ជាបាតុកម្មដោយសន្តិវិធី អហិង្សា ។ ថ្ងៃនេះ គឺជាថ្ងៃដែលយើងរំលឹកថា ខ្មែរសាមគ្គីគ្នា ខ្មែរជានាគ្នា ដើម្បីស្វែងរកសុខសន្តិភាពជូនជាតិមាតុភូមិ យើងមានថ្ងៃតែពីរប៉ុណ្ណោះ គឺថ្ងៃទី២៣ តុលា នៃកិច្ចព្រមព្រៀងសន្តិភាពទីក្រុង ប៉ារីស និង៩វិច្ឆិកា ជាថ្ងៃឯករាជ្យរបស់កម្ពុជា ដែលជាស្នាព្រះហស្តរបស់សម្តេចព្រះនរោត្តម សីហនុ ដែលយើងខ្ញុំគោរពវិញ្ញាណក្ខន្ធរបស់ព្រះ
អង្គ ។
យើងធ្វើបាតុកម្មថ្ងៃនេះ មានគោលដៅទាមទាររកយុត្តិធម៌ជូនម្ចាស់ឆ្នោត និងការទាមទារឱ្យមាន ការបង្កើតយន្តការស្វែងរកការណ៍ពិតពីស្ថាប័នអន្តរជាតិ ដែលមានជំនាញ ។ ហើយក៏ឆ្លើយតបទៅនឹងសេចក្តីថ្លែងការណ៍របស់គណបក្សប្រជាជនកម្ពុជា ដែលចង់ធ្វើកំណែទម្រង់ការបោះ ឆ្នោត ដើម្បីធានាថា ការបោះឆ្នោតប្រព្រឹត្តដោយទៅយុត្តិធម៌ អាចទទួលយកបាន ។ ហើយសូមឱ្យរដ្ឋាភិបាលគោរពខ្លឹមសារ នៃកិច្ចព្រមព្រៀងទីក្រុងប៉ារីសឱ្យត្រឹមត្រូវ និងឱ្យបានពេញលេញ ជាពិសេសទាក់ទងនឹងគោលការណ៍ប្រជាធិបតេយ្យ សេរីពហុបក្ស ការគោរពសិទ្ធិមនុស្ស» ។
នៅវេលាម៉ោង៣ និង១៥នាទីរសៀល ថ្ងៃដដែល លោក សម រង្ស៊ី និងលោក កឹម សុខា បានដឹកនាំបាតុករប្រមាណ១ម៉ឺននាក់ ដង្ហែក្បួនតាមផ្លូវលេខ៥១ ឆ្ពោះទៅទិសខាងត្បូងដើម្បីដាក់ញត្តិនៅឧត្តមស្នងការអង្គការសហប្រជាជាតិ ទទួលបន្ទុកសិទិ្ធមនុស្សប្រចាំកម្ពុជា ។ ម៉ោង៥ល្ងាច ក្បួនបាតុកម្មបានត្រឡប់ទៅទីលានប្រជាធិបតេយ្យវិញ ។ នៅវេលាម៉ោង៧យប់មានបញ្ចាំងភាពយន្តឯកសារស្តីពីការតស៊ូរបស់លោក Martin Luther King ដែលជាអ្នកតស៊ូប្រឆាំងនឹងការប្រកាន់វណ្ណៈស្បែកខ្មៅនៅអាមេរិក ។
លោក សម រង្ស៊ី និងលោក កឹម សុខា បាននិយាយនៅមុខបាតុករថា គណបក្សសង្គ្រោះជាតិ ធ្វើមហាបាតុកម្មអហិង្សារយៈពេល៣ថ្ងៃ ដើម្បីទាមទារឱ្យអង្គការសហប្រជាជាតិ និងប្រទេសហត្ថលេខីនៃកិច្ចព្រមព្រៀងទីក្រុងប៉ារីស ជួយដោះស្រាយវិបត្តិនយោបាយនៅកម្ពុជាបច្ចុប្បន្ន និងឱ្យមានការគោរពពេញលេញនូវកិច្ចព្រមព្រៀងទីក្រុងប៉ារីស ថ្ងៃទី២៣ តុលា ឆ្នាំ១៩៩១ ។ ការហែញត្តិនៅថ្ងៃស្អែក ត្រូវបានប្រកាសថា នឹងហែឆ្ពោះទៅស្ថានទូតបារាំង ៕
ចែករំលែកព័តមាននេះ