ខេត្ដកំពង់ឆ្នាំង ៖ លោកទូច ម៉ារីម ទីប្រឹក្សាសម្ដេចអគ្គមហាសេនាបតីតេជោហ៊ុន សែន និងជាអភិបាលខេត្ដកំពង់ឆ្នាំង កាលពីព្រឹកថ្ងៃទី១០ ខែកញ្ញា បានអញ្ជើញចុះសួរសុខទុក្ខប្រជាពលរដ្ឋក្នុងឃុំស្វាយជ្រុំ និងឃុំពង្រ ក្នុងស្រុករលាប្អៀរ ដែលកំពុងជួបការលំបាក ព្រោះជួបគ្រោះរាំងស្ងួតគ្មានទឹកធ្វើស្រែ ។ អមដំណើរក្នុងពេលនោះមានលោកប្រធានមន្ទីរ អនុប្រធានមន្ទីរ មន្ដ្រីកសិកម្មខេត្ដ ជាច្រើនរូប លោកអភិបាលស្រុក លោកមេឃុំទាំងពីរ ព្រមទាំងនាំយកនូវគោយន្ដ និងប្រេងម៉ាស៊ូតទៅជួយ ភ្ជួររាស់ជូនប្រជាពលរដ្ឋទាំងនោះទៀតផង ។
លោក ង៉ាន ណានី ប្រធានមន្ទីរកសិកម្ម ខេត្ដបានរាយការណ៍ថា ក្នុងឃុំស្វាយជ្រុំ ផ្ទៃដីបង្កបង្កើនផលស្រូវរដូវវស្សាមានចំនួន២,២៤០ហិកតា ប៉ុន្ដែគិតត្រឹមថ្ងៃទី៧កញ្ញា ទើបធ្វើបាន១១២ហិកតា គឺស្មើនឹង៥ភាគរយ ប៉ុណ្ណោះ ចំណែកឃុំពង្រវិញ ផ្ទៃដីបង្កបង្កើនផលមាន១.៤២០ហិកតា តែទើបធ្វើបាន៤៥៤ហិកតា ស្មើនឹង៣១,៩៧ភាគរយប៉ុណ្ណោះ ។ កន្លងមកជារៀងរាល់ឆ្នាំឃុំទាំងពីរ គឺមិនដែលជួបប្រទះ ភាពរាំងស្ងួតដែលធ្វើឱ្យការងារបង្កបង្កើន ផលមានភាពយឺតយ៉ាវដូចឆ្នាំនេះទេ ។ ក្រៅពីឃុំទាំងពីរខាងលើ លោកប្រធានមន្ទីរបាន បញ្ជាក់ថា ឃុំខ្លះបានធ្វើរួចរាល់ និងខ្លះធ្វើលើស ផែនការ ខ្លះជិតរួចរាល់ គឺគ្មានឃុំណាយឺតដូចឃុំ ទាំងពីរនេះទេ ។ ដោយសារបែបនេះហើយ ទើបផ្ទៃដីបង្កបង្កើនផលទូទាំងខេត្ដមាន ចំនួន១០៤.៦០០ហិកតា សម្រេចធ្វើបាន៩២.១៧០ហិកតា គឺស្មើនឹង៨៨,១២ភាគរយ គិតត្រឹមថ្ងៃ ទី១០ កញ្ញា នេះ ។
លោកទូច ម៉ារីម អភិបាលខេត្ដកំពង់ឆ្នាំង បានមានប្រសាសន៍លើកទឹកចិត្ដដល់ប្រជាកសិករ នៅកណ្ដាលវាលស្រែដែលកំពុងហួតហែង ថាសូមបងប្អូនប្រជាពលរដ្ឋខំប្រឹងឱ្យអស់លទ្ធភាព ពាក្យចាស់លោកថា អស់អ្វីអស់ចុះ តែកុំអស់សង្ឃឹម ។ ដូចពេលនេះអ៊ីចឹងបងប្អូន ខ្លះសំណាបចាស់ខែជ្រុលមិនទាន់បានស្ទូងខូចអស់ ប៉ុន្ដែសូមកុំអស់សង្ឃឹមយើងនៅសល់ ពេលប្រមាណជាង១ខែមានលទ្ធភាពប្ដូរដាក់ស្រូវស្រាលវិញ ដែលខាងមន្ទីរកសិកម្មខេត្ដបានចែកជូនបងប្អូន ។ ពេលសាបពូជស្រូវស្រាលថ្មីនេះហើយ សូមប្រឹងប្រែងមើលថែកុំឱ្យ សំណាបងាប់លៃលករកទឹកដាក់ទម្រាំមានភ្លៀងធា្លក់មក យើងដកស្ទូងតែម្ដង ។ លោកអភិបាលខេត្ដមានប្រសាសន៍បន្ដថា ក្រោមកិច្ច ខិតខំប្រឹងប្រែងពីអាជ្ញាធរមូលដ្ឋានភូមិ ឃុំ ស្រុក និងថ្នាក់ខេត្ដ ដែលប្រើមធ្យោបាយនាំ ទឹកពីប្រឡាយតូចធំ ពីអាងត្រញំង និងទីកន្លែងខ្លះមានទឹកភ្លៀងទូទាំងស្រុករលាប្អៀរសម្រេចដាំដុះស្រូវរដូវវស្សាបាន៥៨ភាគរយ នៃផែន ការហើយ ចំណែកទូទាំងខេត្ដវិញគឺជិតរួចរាល់អស់ហើយដែរ ដោយបានជាង៨៨ភាគរយនៃផែនការដែរ ។ ប៉ុន្ដែក្នុងស្រុកទាំង៧ និងក្រុង១ គឺមានតែស្រុករលាប្អៀរមួយប៉ុណ្ណោះ ដែលនៅយឺតជាងគេ ។
លោក ង៉ាន ណានី បានបន្ថែមថា ប្រេងម៉ាសូតដែលនាំយកមកថ្ងៃនេះ“១០ កញ្ញា” មានចំនួន៣០០លីត្រ និងថ្ងៃទី១១ កញ្ញា បន្ថែម២០០លីត្រទៀត ដែលជាអំណោយដ៏ថ្លៃថ្លារបស់លោកអភិបាលខេត្ដ សម្រាប់ចាក់គោយន្ដភ្ជួរដាស់ដី រង់ចាំភ្លៀងមកដល់នឹងដកស្ទូងតែម្ដង ។ លោកបានរំលឹកថា កាលពីសបា្ដហ៍ មុនលោកបណ្ឌិត ចន្ទ័ សារុន រដ្ឋមន្ដ្រីក្រសួង កសិកម្ម រុក្ខាប្រមាញ់ និងនេសាទបានចែកពូជស្រូវស្រាលប្រភេទអ៊ីអ៊ែ៦៦ ចំនួន៥៤២គីឡូក្រាម ដល់ប្រជាពលរដ្ឋក្នុងឃុំពីរខាងលើនេះផងដែរ ខណៈដែលលោកបណ្ឌិតអញ្ជើញមកពិនិត្យដោយផ្ទាល់ ។ លោកបញ្ជាក់ថា ស្រូវអ៊ីអ៊ែ៦៦នេះ ១២គីឡូក្រាមធ្វើបាន១ហិកតា ហើយមន្ទីរលោកក៏បានត្រៀមស្រូវស្រាលបន្ថែម ទៀតជូនប្រជាកសិករដែលត្រូវការបន្ទាន់ កាលមុនបានជូនដល់ពួកគាត់ចំនួន៥០០គីឡូក្រាមរួចហើយ ៕
ចែករំលែកព័តមាននេះ