រាជធានីភ្នំពេញ ៖ ការប្រកួតបាល់ទាត់ពានរង្វាន់សម្តេចតេជោ ហ៊ុន សែន លើកទី៥ ឆ្នាំ២០១១ បានបញ្ចប់នៅត្រឹមថ្ងៃសៅរ៍ ទី១២ មីនា នេះហើយ ហើយការប្រកួតពេលនេះទៀតសោត គឺក្រុមបៀលប្រាយយូណាយធីត ជួបប្រកួតជាមួយក្រុមព្រះខ័នរាជ្យ ដើម្បីដណ្តើមយកតំណែងជាម្ចាស់ជើងឯក ខណៈដែលក្រុមណាហ្គាខប ដណ្តើមយកចំណាត់ថ្នាក់លេខ៣ ជាមួយក្រុមក្រសួងការពារជាតិ នៅរសៀលថ្ងៃសុក្រ ទី១១ ខែមីនា។
ឆ្លងកាត់ការប្រកួតអស់រយៈពេលជិត៣ខែ ចាប់ពីថ្ងៃទី៧ មករា រហូតមកនោះ ពេលនេះគេបានរកឃើញក្រុមចំនួន២ដែលបានឡើងមកដល់វគ្គប្រកួតផ្តាច់ព្រ័ត្រដណ្តើមយកតំណែងជាម្ចាស់ជើងឯកពានរង្វាន់សម្តេចតេជោ ហ៊ុន សែន លើកទី៥ ឆ្នាំ២០១១ គឺក្រុមបៀលប្រាយយូណាយធីត និងក្រុមព្រះខ័នរាជ្យ។ ក្នុងចំណោមក្រុមបាល់ទាត់ដែលខ្លាំងៗ ក្រុមដែលមានជំនឿចិត្តក្នុងការដណ្តើមបានតំណែងលេខ១នោះ គឺក្រុមបៀលប្រាយ ពីព្រោះចាប់តាំងពីបើកការប្រកួតវគ្គជម្រុះ៣២ក្រុម រហូតឈានចូលដល់វគ្គជម្រុះ១៦ក្រុម និង៨ក្រុមចុងក្រោយ គឺក្រុមបៀលប្រាយអត់ដែលស្គាល់ចាញ់ ឬស្មើម្តងណាឡើយ។ ម្យ៉ាងវិញទៀតនៅវគ្គជម្រុះ១៦ក្រុម ដែលជាដំណាក់កាលដ៏តឹងតែងបំផុត ក្រុមបៀលប្រាយបានបំបាក់ក្រុមរិទ្ធិសែន ក្នុងលទ្ធផល៦-១។ ប៉ុន្តែអ្វីដែលធ្វើឱ្យមានការចាប់អារម្មណ៍បំផុតនោះ គឺនៅពេលមកប៉ះក្រុមខ្លាំងភ្នំពេញក្រោន នៅវគ្គជម្រុះ៨ក្រុមចុងក្រោយ ដែលមិនមានអ្នកណាគេជឿថា អាចគេចផុតពីការបរាជ័យនោះ គេបែរជាធ្វើឱ្យក្រុមអ្នកមានមួយនេះជួបការបរាជ័យយំមិនចេញ ដោយការទាត់បាល់ប៉េណាល់ទីឈ្នះក្នុងលទ្ធផល ៤-៥ បន្ទាប់ពីបញ្ចប់ការប្រកួតក្នុងរយៈពេល១២០នាទី ទទួលបានលទ្ធផល ១-១។
ចំណែកឯការមកប៉ះក្រុមក្រសួងការពារជាតិនៅវគ្គ1/4 ក៏មានសភាពតានតឹងណាស់ដែរ ព្រោះការប្រកួតបានអូសបន្លាយដល់ទៅ១២០នាទី ខណៈពេលដែលការប្រកួត៩០នាទីទទួលបានលទ្ធផលស្មើ ១-១។ ប៉ុន្តែក្រុមបៀលប្រាយមានឱកាសរកបាន១គ្រាប់នាំមុខមុននៅ៩នាទីក្នុងម៉ោងបន្ថែម។
លោកមាស សំអឿន គ្រូបង្វឹករបស់ក្លឹបបៀលប្រាយធ្លាប់បានមានប្រសាសន៍ថា យុទ្ធសាស្ត្រនៃការលេងរបស់ក្រុមលោក ត្រូវបានកំណត់ច្បាស់លាស់ គឺនៅពេលចូលលេងនៅលើទីលានមិនថាប៉ះក្រុមខ្លាំង ឬខ្សោយនោះទេ គឺត្រូវតែលេងឱ្យអស់ពីសមត្ថភាព។ លោកបានបញ្ជាក់ថា ការឡើងសង្វៀនបើយើងមិនវាយគេទេ គឺគេវាយយើង តែបើយើងតាំងចិត្តថាត្រូវតែវាយ គឺមិនអត់ប្រយោជន៍នោះទេ ការវាយចេញបានច្រើន យ៉ាងហោចណាស់ក៏អាចត្រូវគេបានខ្លះដែរ។ យ៉ាងណាមិញការប្រកួតបាល់ទាត់ បើយើងគិតតែពីខ្លាចមិនសម្រុកគឺមិនងាយទាត់ចូលទីគេបានទេ។
ចំណែកក្រុមព្រះខ័នរាជ្យវិញកាលពីវគ្គប្រកួតជម្រុះតាមតំបន់ គឺមិនសូវជួបការលំបាកឡើយ ប៉ុន្តែគេយ៉ាប់បន្តិចនៅពេលមកប៉ះក្រុមនាគខៀវ ក្នុងវគ្គជម្រុះ១៦ក្រុមចុងក្រោយ ដោយអាចយកឈ្នះ ៣-២ យ៉ាងលំបាក។ ពេលនេះគេសង្កេតឃើញក្រុមព្រះខ័នរាជ្យដាក់កីឡាករបម្រុងចូលលេងច្រើន។ ទោះជាយ៉ាងណាក្តី សម្រាប់ក្រុមព្រះខ័នរាជ្យនៅពេលឈានចូលដល់វគ្គប្រកួតជម្រុះវគ្គ1/4 គេបានលត់ក្រុមអន់ព្រែកប្រា រហូតដល់ទៅ ៥-១ និងបានលត់ក្រុមខ្លាំងណាហ្គាខប ៤-០ ជាបន្តទៀតនៅវគ្គពាក់កណ្តាលផ្តាច់ព្រ័ត្រ។
លោករិទ្ធ ឌីណា អ្នកគ្រប់គ្រងក្រុមព្រះខ័នរាជ្យ ហាក់បីដូចជាបានបង្ហាញនូវការប្រុងជើងការខ្ពស់ជាងមុន ព្រោះឈានមកដល់ដំណាក់កាលចុងក្រោយនេះ វាគឺជារឿងមួយដែលមិនអាចលេងសើចបាននោះទេ។ អ្នកវិភាគទូទៅគេមានការកោតសរសើរចំពោះក្រុមបៀលប្រាយមិនដាច់ពីមាត់ថា ជាក្រុមមានទម្រង់នៃការលេងខុសប្លែកពីគេ ដែលពិបាកយល់បំផុត។ ចំណែកណាហ្គាខប ម្ចាស់ជើងឯកក្របខណ្ឌលីកឆ្នាំ២០១០ បានមកប៉ះក្រុមក្រសួងការពារជាតិដើម្បីដណ្តើមយកចំណាត់ថ្នាក់លេខ៣៕
ចែករំលែកព័តមាននេះ