ឡាវបានក្លាយជាប្រជាជាតិអាស៊ីអាគ្នេយ៍ហៅកាត់អាស៊ានដំបូងគេដែលបើកយុទ្ធនាការចាក់ថ្នាំបង្ការជំងឺរលាកសួតលើក្មេងៗកាលពីសប្តាហ៍កន្លងទៅនេះ គេបានចាប់ផ្តើមអនុវត្តគម្រោងថ្នាំបង្ការ HPV ក្នុងពិធីមួយនៅរដ្ឋធានីវៀងចន្ទន៍ ។ លោកស្រី Helen Evans អនុប្រធានប្រតិបត្តិសម្ព័ន្ធ GAVI ដែលជាអ្នកគាំទ្រគម្រោងខាងលើបានថ្លែងថា ៖ « ការចាក់ថ្នាំបង្ការជាកត្តាដ៏ល្អបំផុត ដើម្បីលើកកម្ពស់ដល់សុខភាពក្មេងៗ ។
វាបានជួយសង្គ្រោះជីវិតនិងផ្តល់នូវការចាប់ផ្តើមជីវិតថ្មីប្រកបដោយសុខុមាលភាពចំពោះក្មេងៗ ។ ក្មេងដែលមានសុខភាពល្អអាចទទួលបានអត្ថប្រយោជន៍ពីការអប់រំដោយពេញលេញ ហើយធំដឹងក្តីក្លាយជាមនុស្សវៃឆ្លាតទៅដោយការអភិវឌ្ឍ ។ ដូច្នេះការចាក់ថ្នាំបង្ការមិនមែនផ្តល់អត្ថប្រយោជន៍សម្រាប់តែក្មេងៗនិងក្រុមគ្រួសារប៉ុណ្ណោះទេ តែវាក៍សម្រាប់ប្រទេសជាតិទាំងមូលផងដែរ »។
គិតពីពេលបើកយុទ្ធនាការរហូតដល់ឆ្នាំក្រោយ ក្មេងទើបនឹងកើតប្រហែលជា១៨ម៉ឺននាក់នឹងទទួលបានថ្នាំបង្ការរលាកសួត
(PVC)ខណៈក្មេងស្រីចំនួន១៣.០០០នាក់ទទួលបានថ្នាំបង្ការ ប្រឆាំងនឹងវីរុស Human papillomavirus (HPV) ។ ក្នុងមួយឆ្នាំៗ ជំងឺរលាកសួតបានសម្លាប់ក្មេងអាយុក្រោម៥ឆ្នាំប្រមាណជាកន្លះលាននាក់នៅទូទាំងពិភពលោក ។ នៅប្រទេសឡាវវិញ ក្នុងមួយឆ្នាំជំងឺនេះបានសម្លាប់ក្មេងអាយុក្រោម៥ឆ្នាំប្រហែលជា២.៨០០នាក់ គិតជាភាគរយគឺប្រហែលជា ១៩ភាគរយ ។ តាមការរំពឹងទុក យុទ្ធនាការលើកនេះនឹងជួយកាត់បន្ថយភាគរយនៃការស្លាប់របស់ក្មេងៗនៅប្រទេសឡាវ ។ ចំពោះ វីរុស HPVត្រូវគេដឹងថាជាមូលហេតុបង្កឱ្យមានមហារីកមាត់ស្បូន ហើយដែលមហារីកនេះបានសម្លាប់ស្ត្រីប្រមាណជា ២៧៤.០០០នាក់រៀងរាល់ឆ្នាំ ។ បើគ្មានវិធានការទប់ស្កាត់ទេនោះ គេរំពឹងថា ចំនួននេះនឹងកើនដល់៤៣ម៉ឺននាក់ក្នុងមួយឆ្នាំគិតត្រឹមឆ្នាំ២០៣០ ។ នៅប្រទេសឡាវ ក្នុងមួយឆ្នាំៗ មានស្ត្រីជាង៥រយនាក់កើតមហារីកមាត់ស្បូន ហើយក្នុងចំនួននេះ ពាក់កណ្តាលបានស្លាប់បាត់បង់ជីវិត ។ ការចាក់ថ្នាំបង្ការ HPV មានប្រសិទ្ធភាពទប់ស្កាត់មហារីកមាត់ស្បូនបានប្រហែលជា៧០ភាគរយ ។
រដ្ឋមន្ត្រីក្រសួងសុខាភិបាលឡាវ វេជ្ជបណ្ឌិត Eksavang Vongvichit បានថ្លែងថា ៖ «ថ្នាំបង្ការទាំងនេះគឺជាផ្នែកដ៏សំខាន់មួយនៃកិច្ចខិតខំប្រឹងប្រែងរបស់យើង ។ កម្មវិធីចាក់ថ្នាំបង្ការនឹងជួយយើងឱ្យសម្រេចបាននូវគោលដៅអភិវឌ្ឍន៍សហស្សវត្សសុខភាពម្តាយនិងកុមារ» ៕
ចែករំលែកព័តមាននេះ