មនុស្សស្ទើរគ្រប់គ្នាដឹងយ៉ាងច្បាស់ថា ទទួលទានដំណេកពេលយប់បានតិចខ្លាំងពេកអាចផ្តល់ផលអាក្រក់ច្រើនយ៉ាងដល់សុខភាព ។ ប៉ុន្តែតាមការរកឃើញថ្មីបានបង្ហាញថា ដេកច្រើនពេកគឺរឹតតែផ្តល់ផលអាក្រក់ដល់សុខភាពផងដែរ ។ ការស្រាវជ្រាវថ្មីមួយបានអះអាងថា ដំណេកពេលរាត្រីតិចពេកឬច្រើនពេកអាចបង្កើនគ្រោះហានិភ័យពីជំងឺកាចសាហាវផ្សេងៗដូចគ្នាក្នុងនោះរួមមានជំងឺទឹកនោមផ្អែមផងដែរ ។
ការសិក្សាទៅលើក្រុមអ្នកស្ម័គ្រចិត្តជាង៥ម៉ឺននាក់បានបង្ហាញថា បុគ្គលដែលទទួលទានដំណេកពេលយប់ច្រើនពេកឬតិចពេកអាចកើតមានបញ្ហាសុខភាពផ្លូវកាយនិងផ្លូវចិត្តក្នុងនោះមានដូចជាកើតជំងឺបេះដូង ទឹកនោមផ្អែម ធាត់លើសទម្ងន់ ផ្លូវចិត្តមិនប្រក្រតី(ឆាប់ខឹង ឆាប់ភ័យជាដើម) ។ អ្នកវិទ្យាសាស្ត្រអះអាងថា ការដេកតិចជាង៦ម៉ោងក្នុងមួយយប់ប្រឈមខ្លាំងបំផុតនឹងជំងឺបេះដូង ជំងឺដាច់សរសៃឈាមក្នុងខួរក្បាល ទឹកនោមផ្អែមនិងជំងឺផ្លូវចិត្តជាដើម ។ ផ្ទុយមកវិញ ការដេកច្រើនជាង៨ម៉ោងក្នុងមួយយប់ក៏មិនមែនជារឿងល្អចំពោះសុខភាពនោះដែរ ។
វេជ្ជបណ្ឌិត Safwan Badr ឯកទេសខាងដំណេកនិងជាអ្នកដឹកនាំការសិក្សាថ្លែងថា៖«បែបបទនៃការរស់នៅប្រកបដោយតុល្យភាពនិងធានាបាននូវសុខភាពមិនមែនកំណត់ត្រឹមតែលើរបបអាហារហូបចុកនិងភាពសមសួននៃរាងកាយមួយមុខនោះទេ ។ រយៈពេលដំណេកក៏ជាផ្នែកមួយយ៉ាងសំខាន់ស្មើនឹងអ្វីដែលអ្នកទទួលទានឬបែបបទនៃការហាត់ប្រាណរបស់អ្នកផងដែរ» ៕
ចែករំលែកព័តមាននេះ