លោកវេជ្ជបណ្ឌិត យឹម សុបុត្រា ឯកទេសវិកលវិទ្យានៃមន្ទីរសម្រាកព្យាបាលគ្លីនិកសាន់រ៉ាយ បានប្រាប់កោះសន្តិភាពឱ្យដឹងថា បញ្ហាដំំណេកស្កប់ស្កល់ជាកត្តាសំខាន់សម្រាប់មនុស្សគ្រប់រូប ប្រាថ្នាចង់បាន ដែលចំណុចមួយនេះបានទាក់ទងទៅនឹងអារម្មណ៍យ៉ាងពិតប្រាកដ កាលបើអារម្មណ៍ជាប់ជំពាក់ទៅលើបញ្ហាកម្មណាមួយ ក៏តាំងគិតរកដំណោះស្រាយកាន់តែស្មុគស្មាញរហូតរកាំភ្នែកគេងលែងលក់ ។
គេងមិនលក់ធ្វើឱ្យមានអារម្មណ៍ធីងធោងនៅពេលថ្ងៃ អស់កម្លាំង និងគិតទៅលើកិច្ចការអ្វីមួយមិនបានល្អ និងឆេវឆាវឆាប់ខឹងជាដើម ។ បញ្ហាគេងមិនលក់បណ្តាលមកពីកត្តាជាច្រើនដូចជា ៖
-ពិសាគ្រឿងស្រវឹងភាគច្រើនតែងកើតមានជំងឺគេងមិនលក់។
-ការប្រើប្រាស់ថ្នាំងងុយដេក ដោយមិនមានវេជ្ជបញ្ជាត្រឹមត្រូវ ។
-បញ្ហា ផ្នែកជំងឺទូទៅ ដូចជាការរងរបួសដោយគ្រោះថ្នាក់អ្វីមួយ ពិបាកដកដង្ហើម ខ្សោយបេះដូង រលាកតម្រងនោមដែលបណ្តាលឱ្យនោមញឹកញាប់ ។
អ្នកជំងឺគេងមិនលក់ចាំបាច់គប្បីស្វែងយល់អំពីបញ្ហាដំណេកឱ្យបានត្រឹមត្រូវ ៖
-រក្សា ទម្លាប់គេងឱ្យបានទៀងទាត់ ដោយកំណត់ពេលវេលាចូលគេង និងក្រោកឱ្យបានទៀងពេល មិនថាលោកអ្នកគេងបានរយៈពេលប៉ុន្មានទេ ។
-លោកអ្នកមិនត្រូវប្រើគ្រឿងស្រវឹង ឬថ្នាំងងុយគេងទេព្រោះអាចប៉ះពាល់បញ្ហាដំណេកទៅថ្ងៃមុខ
-មិនត្រូវពិសាបារីនៅមុនពេលចូលគេង ព្រោះអាចបណ្តាលឱ្យប៉ះពាល់ដល់ដំណេក
-មុនចូលគេងគប្បីបត់ជើងតូចឱ្យហើយ ចៀសវាងការក្រោកទៅបន្ទប់ទឹកនៅពេលកំពុងទន់ភ្នែក
-ចៀសវាងការពិសាតែ ឬកាហ្វេ ភេសជ្ជៈជាតិហ្គាសនៅពេលរសៀល ព្រោះសារធាតុទាំងនេះអាចធ្វើឱ្យមិនងងុយគេង
-ធ្វើលំហាត់ប្រាណមុនពេលចូលគេង
-គួរចៀសវាងការគេងពេលថ្ងៃព្រោះអាចប៉ះពាល់ដល់ពេលវេលាក្នុងការគេងពេលយប់
-សម្រួលអារម្មណ៍ឱ្យបានល្អប្រសើរ កុំគិតរឿងផ្សេងនៅពេលទទួលទានដំណេក
-រៀបចំកន្លែងគេងឱ្យបានត្រឹមត្រូវ និងមានផាសុកភាព
-បើគេងមិនលក់ ត្រូវងើបឡើងអានសៀវភៅរយៈពេលពី១៥ទៅ៣០នាទី រួចទើបចូលទៅគេងវិញ ។
ការថែរក្សាសុខ ភាពមិនមែនជារឿងធម្មតា ទេ គប្បីទទួលៗឱវាទល្អពីអ្នកជំនាញ និងស្វែងយល់ពីចំណុចសំខាន់ៗជាច្រើនទៀតផ្នែកសុខភាព ។ គេងមិនឆ្អែតធ្វើឱ្យលោកអ្នកមានបញ្ហាកាន់តែច្រើន ទាំងសុខភាពផ្លូវចិត្ត និងសុខភាពផ្លូវកាយ ដូចជាការប្រឈមមុខនឹងជំងឺផ្តាសាយ ក៏ដូចជាជំងឺដទៃទៀត ៕
ចែករំលែកព័តមាននេះ