ខេត្តព្រះវិហារ ៖ គណៈប្រតិភូខណ្ឌទួលគោក និងខណ្ឌ៧មករា កាលពីព្រឹកថ្ងៃទី៦ មីនា បានចុះសាកសួរសុខទុក្ខ និងនាំអំណោយទៅជួយឧបត្ថម្ភដល់គ្រួសារកងទ័ព និងកងទ័ពនៅវរអន្តរាគមន៍លេខ៣៩៣ ចំណុះឱ្យកងពលតូចអន្តរាគមន៍លេខ៩ នៅក្នុងភូមិសាស្ត្រអូរជុញ ភូមិសែនរុងរឿង២ ឃុំទឹកក្រហម ស្រុកជាំក្សាន្ត ខេត្តព្រះវិហារ ។
នេះជាលើកទី៣ ហើយដែលគណៈប្រតិភូខណ្ឌទួលគោក ដឹកនាំដោយលោកសេង រតនៈ អភិបាលខណ្ឌ និងគណៈប្រតិភូខណ្ឌ៧មករាដឹកនាំដោយលោកសោម សុវណ្ណ អភិបាលខណ្ឌ បានចុះសាកសួរសុខទុក្ខ និងនាំអំណោយទៅជួយឧបត្ថម្ភដល់កងទ័ពនៅវរអន្តរាគមន៍លេខ៣៩៣ ដែលជាវរៈចងសម្ព័ន្ធមេតី្រភាពជាមួយខណ្ឌទាំងពីរ ។ អំណោយដែលនាំទៅជួយឧបត្ថម្ភដល់គ្រួសារកងទ័ពចំនួន២៧០គ្រួសារ នៅក្នុងឱកាសនោះ ក្នុងមួយគ្រួសារៗទទួលបានអង្ករចំនួន៥០គីឡូក្រាម មីចំនួន១កេស ទឹកស៊ីអ៊ីវចំនួន៦ដប ទឹកត្រីចំនួន៦ដប ប៊ីចេងចំនួន០,៥០គីឡូក្រាម និងថវិកាចំនួន២ម៉ឺនរៀល ។ ដោយឡែកសំភារមួយចំនួនទៀត ដូចជា ថ្នាំជក់ ឆៃប៉ូវ ទឹកបរិសុទ្ធ ត្រីឆ្អើរជាដើម និងកៅស៊ូតង់ចំនួន២០៦ដុំ ត្រូវបានគណៈប្រតិភូខណ្ឌទាំងពីរជួយឧបត្ថម្ភដល់វរអន្តរាគមន៍លេខ៣៩៣ ។
លោកសេង រតនៈ បានថ្លែងថា ដោយអនុវត្តតាមការណែនាំរបស់លោកកែប ជុតិមា អភិបាលរាជធានីភ្នំពេញ ឱ្យមន្ត្រីរាជការខណ្ឌទាំង៨ក្នុងរាជធានី យកចិត្តទុកដាក់ចំពោះសមរភូមិមុខ សាលាខណ្ឌទួលគោក ក៏បានចលនាដល់មន្ត្រីរាជការ និងប្រជាពលរដ្ឋនៅក្នុងមូលដ្ឋានប្រមែប្រមូលបានសំភារមួយចំនួន ហើយនាំយកមកឧបត្ថម្ភដល់កងទ័ពនៅសមរភូមិមុខជាច្រើនលើកមកហើយ ។ លោកសេង រតនៈ បានបន្តថា ការនាំអំណោយយកមកឧបត្ថម្ភនេះ គឺជាការលើកទឹកចិត្តកងទ័ពដែលឈរជើងការពារបូរណភាពទឹកដីយ៉ាងអង់អាចក្លាហាន និងម្យ៉ាងទៀតជាការផ្សារភ្ជាប់ទំនាក់ទំនង និងលើកទឹកចិត្តរវាងសមរភូមិក្រោយ និងសមរភូមិមុខ ។
បន្ទាប់ពីនាំអំណោយចែកជូនដល់គ្រួសារកងទ័ពរួចមក គណៈប្រតិភូក៏បានចុះទៅសាកសួរសុខទុក្ខគ្រួសារយុទ្ធជនពលីមួយគ្រួសារ ព្រមទាំងប្រមូលថវិកាជួយដល់គ្រួសារយុទ្ធជនដែលបានពលីជីវិតក្នុងការបម្រើជាតិមាតុភូមិផងដែរ៕
ចែករំលែកព័តមាននេះ