រាជធានីភ្នំពេញ ៖ កាលពីរាត្រីថ្ងៃសៅរ៍ទី១២ តុលា ២០១៣ នៅក្នុងកម្មវិធីប្រគំតន្ត្រី«ប៊ូម ប៊ូម »របស់ស្ថានីយទូរទស្សន៍ប៉ុស្ដិ៍លេខ៣បានផ្លាស់ប្ដូរឆាកថ្មី ថែមទាំងដាក់បន្ថែមភ្លើងពណ៌លម្អឆាកយ៉ាងច្រើនស្អេកស្កះជាប្រភេទភ្លើងទាន់សម័យដូចនៅក្នុងក្លឹបកម្សាន្ត ។ ដោយសារតែកម្មវិធីនោះមានការគាំទ្រច្រើនពីអ្នកទស្សនាយូរមកហើយនោះ អ្នករៀបចំកម្មវិធីអញ្ជើញតារាចម្រៀងថ្មីចាស់ល្បីឈ្មោះទៅសម្ដែង ។ នារាត្រីនោះមានការចូលរួមពីតារាចម្រៀងលំដាប់យុវវ័យសាច់សខ្ចីនាងសុខ ពិសី ដែលជាតារាប្រចាំផលិតកម្មសាន់ដេ។
អ្នកដឹកនាំកម្មវិធីតន្ត្រី«ប៊ូមប៊ូម » ដែលមានអាយុកាលយូរមកហើយតាំងពីជំនាន់នាងអាណូ ជាពិធីការិនីបានថ្លែងឱ្យដឹងថា ដោយសារតែកម្មវិធីនេះមានការពេញនិយមខ្លាំងពីស្រទាប់យុវវ័យ ហើយពួកគេចូលរួមទស្សនាផ្ទាល់ ទើបថ្នាក់លើរៀបចំកែលម្អផ្នែកខ្លះនាំឱ្យឆាកមើលទៅកាន់តែពិសេសទ្វេឡើង ។ ដោយសារតែយុវវ័យចូលចិត្តទើបចំណាយពេលកែខៃដូចជា ភ្លើងបំភ្លឺឆាកសុទ្ធតែរបស់ទាន់សម័យមានដូចជា ភ្លើងឡាស៊ែរបាញ់ពាសពេញឆាកមើលទៅដូចជានៅក្នុងក្លឹបកម្សាន្ត ។ ចំណែកអ្នកចូលរួមច្រៀងជារាតា ល្បីៗត្រូវចិត្តមហាជន អមដោយអ្នករាំកំដរ ។ ពេលរៀបចំកែលម្អឆាកថ្មីនេះបានអញ្ជើញកញ្ញា សុខ ពិសី ចូលរួមសម្ដែង ព្រោះតែនាងមានអ្នកគាំទ្រច្រើន ។ គ្រាន់តែមហាជនដឹងថា មានកញ្ញាសុខ ពិសី សម្ដែងក៏នាំគ្នារង់ចាំទស្សនាច្រើនណាស់ពេញមុខវេទិកា ។ ម្ល៉ោះហើយលោកនឹងអញ្ជើញតារាលំដាប់ជួរមុខផ្សេងទៀតចូលរួមបង្ហាញទេពកោសល្យ ម្នាក់ម្ដងៗក្នុងកម្មវិធីតន្ត្រី«ប៊ូម ប៊ូម» ។
នាឱកាសនោះសុខ ពិសី បានច្រៀងបទបែបមនោសញ្ចេតនា៣បទ សុទ្ធតែជាបទចម្រៀងល្បីរបស់នាងនៅផលិតកម្មសាន់ដេគឺ បទ «ស្រឡាញ់គ្នាបែកគ្នាទើបមានអនាគតល្អ»«ចាត់ទុកអូនជាតុក្កតាក៏បាន» និងបទ«អាណិតបង» ហើយបានទទួលការគាំទ្រពីអ្នកទស្សនាច្រើន ព្រមទាំងទទួលបានកាដូមួយចំនួនលើកទឹកចិត្តទៀតផង ។ កញ្ញាសុខ ពិសី ដែលគ្រងសម្លៀកបំពាក់ឡើងច្រៀងបែបសម័យទំនើបនាឱកាសនោះបានប្រាប់អ្នកយកព័ត៌មានកោះសន្ដិភាពថា នាងសប្បាយរីករាយណាស់ដែលឃើញអ្នកគាំទ្រច្រើនចូលរួមផ្ដល់កម្លាំងចិត្ត ។ នាងកាន់តែរីករាយថែមទៀតព្រោះសម្ដែងប៉ះថ្ងៃសម្ពោធឆាកថ្មីប្រកបដោយភាពស្រស់ស្អាតរំលេចដោយភ្លើងពណ៌ចម្រុះពាសពេញឆាក ។
តារាចម្រៀងរូបនេះនិយាយថា នាងស្មានតែមិនអាចសម្ដែងបានទេ ព្រោះមុននេះនាងចេញថតរឿង«ព្រាយក្បាលប្រាំបី» ឱ្យផលិតកម្មសាន់ដេពេញមួយយប់ទល់ភ្លឺ ។ នាងមិនទាន់បានសម្រាកឱ្យស្រួលខ្លួនផងត្រូវចូលរួមសម្ដែងនៅទូរទស្សន៍ប៉ុស្ដិ៍លេខ៣ទៀត ។ ពេលនាងកំពុងច្រៀងលើឆាកបន្លំធ្មេចភ្នែក ម្ដងៗព្រោះតែអត់ងងុយ ។ ដើម្បីសិល្បៈដើម្បីអ្នកគាំទ្រតាំងពីដើមមកសុខ ពិសី និយាយថា នាងមិនធុញទ្រាន់ចំពោះសិល្បៈទេ ។ នាងនៅតែតស៊ូតទៅទៀតទោះជាមានពេលខ្លះរងពាក្យចចាមអារ៉ាមវាយប្រហារបែបណាក៏ដោយ ៕
ចែករំលែកព័តមាននេះ