ខេត្តបន្ទាយមានជ័យ ៖ ដំណាំស្រូវនៅក្នុងសង្កាត់មួយចំនួននៅក្រុងសិរីសោភ័ណ កំពុងតែប្រឈមទៅនឹងការខូចខាតដោយសារទឹកជំនន់ ប្រសិនបើនៅតែមានភ្លៀងធ្លាក់ ឬក៏អាជ្ញាធរមូលដ្ឋានមិនចាត់វិធានការទប់ស្កាត់ ដើម្បីរំដោះទឹកឱ្យបានទាន់ពេលវេលាទេ។ ជាក់ស្តែង នៅយប់ថ្ងៃទី១៧ តុលា ឆ្នាំ២០១០ នៅសង្កាត់ម្កាក់ គ្រាន់តែរយៈពេលមួយថ្ងៃមួយយប់ប៉ុណ្ណោះ មានទឹកជំនន់ដែលហូរធ្លាក់មកពីប្រទេសថៃ លាយជាមួយទឹកភ្លៀងបានឡើងជន់យ៉ាងគំហុក ធ្វើឱ្យប្រជាពលរដ្ឋនៅក្នុងភូមិម្កាក់មានការភ័យខ្លាច ហើយនាំគ្នាក្រោកយកការុងច្រកដីតាំងតែពីម៉ោង៤ទៀបភ្លឺ ដើម្បីទប់ទំនប់អាងកុំឱ្យបាក់ ព្រោះបើសិនជាទំនប់អាងនេះបាក់ មិនដឹងជាលំនៅឋានរបស់ប្រជាពលរដ្ឋប៉ុន្មានគ្រួសារទេ ដែលត្រូវលិចលង់ដោយសារគ្រោះទឹកជំនន់នេះ។ នៅព្រឹកថ្ងៃទី១៧ តុលា ឆ្នាំ២០១០ នោះដែរ គេឃើញលោកអ៊ុំ រាត្រី អភិបាលក្រុងសិរីសោភ័ណ ដឹកនាំប្រតិភូសាលាក្រុង និងកងកំលាំងនគរបាលក្រុង ចុះធ្វើអន្តរាគមន៍ជួយយកការុងដាក់ដីបិទទំនប់ទឹក បញ្ចៀសទឹកហូរច្រោះខូចខាតផ្លូវជាតិលេខ៥៦អា ប៉ុន្តែទោះជាយ៉ាងណា ក៏ផ្លូវនេះត្រូវទឹកហូរកាត់ដោយកន្លែងផងដែរ។
ដើម្បីជួយរំដោះដំណាំស្រូវប្រជាពលរដ្ឋ ដែលមួយចំនួនកំពុងតែហុចផលនៅរង់ចាំតែថ្ងៃច្រូតកាត់ក៏ត្រូវទឹកជន់លិចទាំងស្រុង ពិសេសគឺស្រូវនៅក្នុងអាងម្កាក់ ស្ថិតក្នុងភូមិម្កាក់ សង្កាត់ម្កាក់ ដែលកំពុងរងការខូចខាតយ៉ាងធ្ងន់ធ្ងរនោះលោកអភិបាលក្រុងសិរីសោភ័ណបានពិភាក្សាគ្នាជាមួយលោកចៅសង្កាត់ និងលោកមេភូមិជីកទំនប់បង្ហូរទឹកចេញពីអាងចូលទៅក្នុងស្ទឹង និងជីកទំនប់មួយកន្លែងទៀតនៅភូមិដូនឡី គឺធ្វើយ៉ាងណាដើម្បីរំដោះទឹកឱ្យទាន់ពេលវេលា ។ លោកអ៊ុំ រាត្រី បានប្រាប់ឱ្យដឹងថា នៅក្រុងសិរីសោភ័ណ មានសង្កាត់ចំនួន៦ ដែលរងផលប៉ះពាល់ដល់ដំណាំស្រូវរបស់ប្រជាពលរដ្ឋរួមមាន សង្កាត់ម្កាក់, ទឹកថ្លា, កំពង់ស្វាយ, ព្រះពន្លា, កោះពងសត្វ និងសង្កាត់ភ្នៀត សរុបទាំងអស់ចំនួន១.២៥១ហិកតា ។ ឯផ្លូវជាតិ និងផ្លូវលំដែលទឹកហូរកាត់មានប្រវែងសរុប២.៧៩២ម៉ែត្រ ជាមួយគ្នានេះ ក៏មានសាលារៀន ប៉ុស្តិ៍នគរបាល និងផ្ទះប្រជាពលរដ្ឋមួយចំនួនត្រូវលិចលង់ដែរ៕
ចែករំលែកព័តមាននេះ