បុរសៗដែលមានគម្រោងយកកូននៅថ្ងៃណាមួយនោះគួរតែកាត់បន្ថយពេលវេលាដែលចំណាយលើការនិយាយគ្នាតាមទូរស័ព្ទដៃ។
បណ្តាអ្នកស្រាវជ្រាវមកពីសាកលវិទ្យាល័យQueen’s Universityប្រទេសកាណាដាបានរកឃើញថា ការប្រើប្រាស់ទូរស័ព្ទដៃអាចធ្វើឱ្យគុណភាពទឹកកាមថយចុះ ហើយនាំទៅរកការថមថយលើការផ្តល់កំណើត ។
ក្រុមអ្នកស្រាវជ្រាវបានពិសោធឃើញថា រលកអេឡិចត្រូម៉ាញេទិច(EMW)ដែលបញ្ជូនដោយប្រដាប់ទទួលសំឡេងរបស់ទូរស័ព្ទមានទំនាក់ទំនងយ៉ាងសាំញ៉ាំបំផុតជាមួយអ័រម៉ូនភេទបុរស ។ អ្នកដឹកនាំការស្រាវជ្រាវវេជ្ជបណ្ឌិតរ៉ានី សាមូលបានបញ្ជាក់ថា៖«ការរកឃើញរបស់យើងនេះមានសភាពស្មុគស្មាញបន្តិច ។ តែយើងសង្ឃឹមថា នឹងរកឃើញលទ្ធផលផ្សេងពីនេះ ។ យ៉ាងណាក៏ដោយ លទ្ធផលទាំងឡាយដែលយើងបានរកឃើញពិតជាបង្ហាញថាអាចនឹងមានយន្តការបារម្ភខ្លះៗនៅកន្លែងធ្វើការ»។ បុរសដែលប្រើប្រាស់ទូរស័ព្ទដៃត្រូវគេរាយការណ៍ថា ការចរាចរអ័រម៉ូនភេទtestosteroneមានកម្រិតខ្ពស់ ប៉ុន្តែកម្រិតអ័រម៉ូន Luteinizing hormone(ហៅកាត់ថាLH ឬក៏ហៅម្យ៉ាងទៀតថា lutropin)បែរជាថយចុះ ។
ការស្រាវជ្រាវខាងលើ បានកើតឡើងរយៈពេល២ខែក្រោយពីបណ្តាអ្នកប្រើប្រាស់ទូរស័ព្ទដៃនៅចក្រភពអង់គ្លេសត្រូវបាន រដ្ឋាភិបាលផ្តល់ដំបូន្មានឱ្យងាកមកប្រើប្រាស់ប្រព័ន្ធកាសបញ្ជាដោយសំឡេងជាជាងការនិយាយផ្ទាល់ជាមួយទូរស័ព្ទ។ នាយកដ្ឋានសុខភាពបាននិយាយថា ការធ្វើបែបនេះអាចជួយកាត់បន្ថយវិទ្យុសកម្មដែលបញ្ចេញដោយទូរស័ព្ទ ។ ទោះជាយ៉ាងណាបណ្តាមន្ត្រីសុខភាពបានបញ្ជាក់ថា ករណីខាងលើនេះនឹងមានការស្រាវជ្រាវបន្ថែមទៀត ៕
ចែករំលែកព័តមាននេះ