រាជធានីភ្នំពេញ ៖ បន្ទាប់ពីបានឃើញរូបភាពក្មេងៗនៅសាលាបឋមសិក្សាមួយក្នុងខេត្តកំពង់ស្ពឺ ត្រូវបានចែកចាយជាច្រើនដងនៅលើបណ្ដាញសង្គម ធ្វើឱ្យអ្នកស្រី ទ្រី ដាណា មានចិត្តអាណិតយ៉ាងខ្លាំង ហើយបានចំណាយថវិកាផ្ទាល់ខ្លួន ទិញសម្ភារៈសិក្សា…
រាជធានីភ្នំពេញ ៖ បន្ទាប់ពីបានឃើញរូបភាពក្មេងៗនៅសាលាបឋមសិក្សាមួយក្នុងខេត្តកំពង់ស្ពឺ ត្រូវបានចែកចាយជាច្រើនដងនៅលើបណ្ដាញសង្គម ធ្វើឱ្យអ្នកស្រី ទ្រី ដាណា មានចិត្តអាណិតយ៉ាងខ្លាំង ហើយបានចំណាយថវិកាផ្ទាល់ខ្លួន ទិញសម្ភារៈសិក្សា ស្បែកជើង និងសំលៀកបំពាក់ ចែកជូនក្មេងៗទាំងនោះ។
សាលាបឋមសិក្សាដែលកំពុងជួបការខ្វះខាតនោះ គឺបឋមសិក្សាភ្នំពិត នៅភូមិខ្មាចកន្ទួត ឃុំស្វាយចចិប ស្រុកបសេដ្ឋ ខេត្តកំពង់ស្ពឺ។ នៅថ្ងៃទី២៩ ខែមីនា ឆ្នាំ២០១៩ នេះ អ្នកស្រី ទ្រី ដាណា ដែលជាអគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអីលធីឌី បាននាំយកសម្ភារៈសិក្សាទាំងនោះ ទៅចែកជូនក្មេងៗដែលកំពុងខ្វះខាតចំនួនជិត ៤០០នាក់ ដើម្បីឱ្យពួកគេបានបន្តការសិក្សាដោយរីករាយ។
អ្នកស្រី ទ្រី ដាណា បានបញ្ជាក់ថា កាលពីមុន អ្នកស្រីក៏ជាក្មេងម្នាក់ដែលធ្លាប់ក្រលំបាក ទើបយល់ថា ជីវិតបែបនេះត្រូវតស៊ូប៉ុណ្ណា ត្រូវជម្នះរស់នៅបែបណា។ អគ្គនាយិកាវ័យក្មេងរូបនេះ ក៏បានប្រាប់ឱ្យក្មេងៗទាំងអស់ ត្រូវតស៊ូរៀនសូត្រ មិនត្រូវបោះបង់ចោលការសិក្សាឡើយ ព្រោះមានតែការសិក្សានេះហើយ ទើបអាចជួយឱ្យជីវិតរបស់ពួកគេងើបផុតពីការលំបាកបាន។
សម្ភារៈដែលអ្នកស្រី ទ្រី ដាណា យកទៅចែកជូនក្មេងៗ មានសៀវភៅ ប៊ិច ខ្មៅដៃ ជ័រលុប បន្ទាត់ កាតាប ជាសម្ភារៈសិក្សាមួយឈុត។ លើសពីនេះ អ្នកស្រីក៏បានរៀបចំ ស្បែកជើង និងសំលៀកបំពាក់រៀន សម្រាប់ក្មេងៗដែលគ្មានលទ្ធភាពផងដែរ។ សរុបការចំណាយលើសម្ភារៈទាំងអស់នេះដែលជាថវិកាផ្ទាល់ខ្លួនរបស់អ្នកស្រី។
បន្ថែមពីលើនេះ តំណាងចែកចាយផលិតផលរបស់ក្រុមហ៊ុន ដាណា ទ្រី ខេមបូឌា ត្រេនឌីង ខូអីលធីឌី ក៏បានសាមគ្គីគ្នាចូលរួមជាថវិកាប្រហែល ៤លាន ២សែនរៀលទៀត ដោយអ្នកស្រី ទ្រី ដាណា ចាត់ចែងលើសម្ភារៈខ្លះ ចូលរួមកសាងសាលាខ្លះ និងរក្សាទុកខ្លះ សម្រាប់ដើរជួយដល់ក្មេងៗដែលជួបការលំបាកនៅពេលខាងមុខ៕ ដោយសហការ
ចែករំលែកព័តមាននេះ