ខេត្តបន្ទាយមានជ័យ ៖ កម្លាំងនគរបាលព្រហ្មទណ្ឌបានចុះបង្ក្រាបករណីក្រុមក្មេងប្រើប្រាស់គ្រឿងញៀនបានមួយសំបុកធំ មានប្រុស-ស្រីចំនួន៨នាក់ ដែលកំពុងលាក់ខ្លួនសម្ងំក្នុងផ្ទះប្រើប្រាស់គ្រឿងញៀន កាលពីម៉ោង៥និង៣០នាទីល្ងាច ថ្ងៃទី២៩ មីនា ២០១៩ ចំណុចវាលស្រែចម្ងាយ២,០០០ម៉ែត្រ ខាងត្បូងដុងអារញ្ញ សង្កាត់និមិត្ត ក្រុងប៉ោយប៉ែត ។
លោកវរសេនីយ៍ឯក ភឿង ម៉ាន់សឹង្ហ នាយការិយាល័យនគរបាលព្រហ្មទណ្ឌកំរិតធ្ងន់បានឲ្យដឹងថា ដំបូងលោកទទួលបទបញ្ជាពីលោកឧត្តមសេនីយ៍ត្រីសិទ្ធ ឡោះ បង្ក្រាបករណីជល់ភ្នាល់ដាក់លុយ បក្សីកីឡា (មាន់ជល់)។ ពេលទៅដល់មូលដ្ឋាន លោកទទួលព័ត៌មានថា មានក្រុមក្មេងសម្ងំលាក់ខ្លួនប្រើប្រាស់គ្រឿងញៀន លោកក៏ស្នើសុំបទបញ្ជាពីលោកឧត្តមសេនីយ៍ទោ អាត់ ខែម ។ ជាលទ្ធផល យើងបានបង្ក្រាបក្រុមក្មេងប្រើប្រាស់គ្រឿងញៀនចំនួន៨នាក់ ក្នុងនោះស្រីម្នាក់ ។
ចំពោះមុខសញ្ញាប្រើប្រាស់គ្រឿងញៀនទាំងនោះមាន ១-ឈ្មោះដូង ចន្ទ័រៈ ភេទស្រី អាយុ១៩ឆ្នាំ នៅនិមិត្ត២ សង្កាត់និមិត្ត ក្រុងប៉ោយប៉ែត ជាប្រពន្ធរបស់ឈ្មោះចន្នី មុខសញ្ញាជួញដូរ និងប្រើប្រាស់គ្រឿងញៀនរត់គេចខ្លួន, ២-ឈ្មោះយ៉ុន ផែន ភេទប្រុស អាយុ២៧ឆ្នាំ នៅភូមិថ្មី ឃុំទទួលពង្រ ស្រុកម៉ាឡៃ , ៣-ឈ្មោះ សួម ឆែ ភេទប្រុស អាយុ៣៣ឆ្នាំ នៅភូមិអន្លង់ស្វាយ ឃុំម៉ាឡៃ ស្រុកម៉ាឡៃ, ៤-ឈ្មោះ អឿន សុជាតិ ភេទប្រុស អាយុ១៨ឆ្នាំ, ៥-ឈ្មោះហែក ម៉ាច ភេទប្រុស អាយុ២២ឆ្នាំ,៦-ឈ្មោះ ចុង ប្លូច ភេទប្រុស អាយុ២៧ឆ្នាំ, ៧-ឈ្មោះ វឿន សាវន ភេទប្រុស អាយុ២៥ឆ្នាំ និង៨-ឈ្មោះ ផន សុធា ភេទប្រុសអាយុ២៨ឆ្នាំ ទាំង៥នាក់នៅភូមិដុងអារញ្ញ សង្កាត់និមិត្ត ក្រុងប៉ោយប៉ែត ។
លោកវរសេនីយ៍ឯកភឿង ម៉ាន់សឹង្ហ បានបញ្ជាក់ថា ក្នុងកិច្ចប្រតិបត្តិការនេះកម្លាំងនគរបាលបានដកហូតវត្ថុតាងមាន កាំបិតខ្វែវចំនួន៤, ដាវសាម៉ូរ៉ៃចំនួន៣, ទូរស័ព្ទដៃចំនួន១១គ្រឿង, ដបប្រដាប់ជក់១ , ជញ្ជីងថ្លឹងថ្នាំ១, ថ្នាំញៀប្រភេទម្សៅពណ៌សក្រាមចំនួន២ថង់តូច និងសំបកថង់សម្រាប់វេចខ្ចប់មួយចំនួន ដែលឆែកឆេរដកហូតបានពីផ្ទះរបស់ឈ្មោះ ចន្នី ដែលរត់គេចខ្លួន។ ចំណែកម៉ូតូ៤គ្រឿងទៀត ជារបស់ក្រុមអ្នកជក់រក្សាទុកនៅប៉ុស្តិ៍រដ្ឋបាលនិមិត្ត។
ទាក់ទិននឹងករណីបង្ក្រាបក្រុមប្រើប្រាស់គ្រឿងញៀនមួយសំបុកនេះ ប្រជាពលរដ្ឋនៅភូមិដុងអារញ្ញ មានការសប្បាយចិត្តយ៉ាងក្រៃលែង ព្រោះពួកនេះតែងតែបង្កការអុកឡុកក្នុងកម្មវិធីផ្សេងក្នុងភូមិ និងបើកម៉ូតូបង្ហោះ យប់ជិះម៉ូតូស្រែកឡូឡារំខានដល់ដំណេកពួកគាត់ ដែលធ្វើការហត់នឿយពីថ្ងៃសម្រាកមិនបាន។ លោកនាយការិយាល័យនគរបាលព្រហ្មទណ្ឌកំរិតធ្ងន់បញ្ជាក់ថា ដោយករណីនេះ ជាបទល្មើសគ្រឿងញៀន ដោយលោក អាត់ ខែម បានឲ្យការិយាល័យជំនាញព្រហ្មទណ្ឌកំរិតធ្ងន់ ធ្វើការប្រគល់ទៅការិយាល័យនគរបាលជំនាញប្រឆាំងគ្រឿងញៀនជាអ្នកអនុវត្តតាមនីតិវិធីច្បាប់៕
ចែករំលែកព័តមាននេះ