រាជធានីភ្នំពេញ ៖ ជនសង្ស័យម្នាក់កាន់តែបានចិត្ត ដោយបានទៅឆបោកម៉ូតូអ្នករួមការងារយកទៅបញ្ចាំបានលុយលេងល្បែងអស់ ហើយជនរងគ្រោះក៏មិនថាមិនស្តីដែរ តែជនសង្ស័យមិនអស់ចិត្តមកលើកទី២ ប្រើល្បិចខ្ចីម៉ូតូជិះទៅមើលរថយន្តគេកាលពីរសៀលថ្ងៃទី២៩ មីនា ២០១៩ បែរជាយកទៅបញ្ចាំបាត់ លុះមកដល់ម៉ោង៦និង៣០នាទីព្រលប់ ថ្ងៃទី៣០ មីនានេះ វិលមកវិញនៅយានដ្ឋានជួសជុលរថយន្តផ្លូវ២០០៤ ក្នុងភូមិអ័កគីដេ សង្កាត់អូរបែកក្អម ខណ្ឌសែនសុខ ម្ចាស់ម៉ូតូប្តឹងឱ្យចាប់ខ្លួនតែម្តង ដោយទ្រាំលែងបានទៀតហើយ ។
ជនសង្ស័យខាងលើឈ្មោះ យ៉េន ថា អាយុ៣៦ឆ្នាំ មុខរបរជាងជួសជុលរថយន្ត ស្នាក់នៅផ្ទះជួលភូមិឫស្សី សង្កាត់ស្ទឹងមានជ័យ៣ ខណ្ឌមានជ័យ ចំណែកជនរងគ្រោះ ឈ្មោះ ទិត ជួន អាយុ២០ឆ្នាំ មុខរបរជាងបាញ់ថ្នាំរថយន្ត ស្នាក់នៅយានដ្ឋានផ្លូវ២០០៤ ភូមិអ័កគីដេ សង្កាត់អូរបែកក្អម ខណ្ឌសែនសុខ មានទីលំនៅផ្ទះលេខ៣១ ផ្លូវលំ ភូមិតាភេម សង្កាត់កំបូល ខណ្ឌកំបូល រីឯម៉ូតូដែលជនសង្ស័យឆបោកយកទៅបាត់ម៉ាកហុងដា សេ១២៥ ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ 1FH-5126 ។
តាមសម្តីជនរងគ្រោះឲ្យដឹងថា ដូចជាជ្រុលពេកហើយ អ្នករួមការងារជាមួយគ្នាក្នុងយានដ្ឋានសោះ ហើយកាលពីអំឡុងខែធ្នូ ឆ្នាំ២០១៨ ជនសង្ស័យខ្ចីម៉ូតូជិះ បែរជាយកទៅបញ្ចាំនៅម្តុំផ្សារឃ្លាំងរំសេវយកលុយ៥០០ដុល្លារលេងល្បែងអស់ ហើយមកវិញឲ្យលុយ១៥០ដុល្លារឲ្យទៅលួសម៉ូតូម្តេចគ្រាន់ មានតែបន្ថែមលុយបង្គ្រប់ខ្លួនឯងលួសយកម៉ូតូមកប្រើប្រាស់វិញ ។
ស្រាប់តែមកដល់រសៀលថ្ងៃទី២៩ មីនា ជនសង្ស័យបានខ្ចីម៉ូតូម្តងទៀតប្រាប់ថា ទៅមើលរថយន្តឲ្យគេ បែរជាយកទៅបញ្ចាំនៅម្តុំផ្សារជម្ពូវ័នបាត់បានលុយយកទៅលេងល្បែងទៀត លុះមកដល់ព្រលប់ថ្ងៃទី៣០ មីនានេះ មកយានដ្ឋានវិញ ក៏ប្តឹងប៉ូលិសចាប់ខ្លួនតែម្តង ។
ចំណែកជនសង្ស័យសារភាពដែរថា ខ្លួនពិតជាយកម៉ូតូរបស់ជនរងគ្រោះខាងលើទៅបញ្ចាំបានលុយ៥០០ដុល្លារចាញ់ល្បែងជល់មាន់អស់ហើយ ។ ជនសង្ស័យបន្តទៀតថា តាមហាងបញ្ចាំស្រួលទេ ឲ្យតែជិះទៅដល់ទទួលយកទាំងអស់ ថ្លៃថោក មិនដឹង ទៅតាមស៊េរី ភិនភាគ មិនបាច់ឯកសារ មិនយកឯក សារអ្វីទេ ងាយបំផុត ។
ក្រោយកើតហេតុ ជនសង្ស័យត្រូវឃាត់ខ្លួននាំទៅប៉ុស្តិ៍ ដើម្បីសាកសួរ និងកសាងសំណុំរឿង ចាត់ការតាមផ្លូវច្បាប់ ៕
ចែករំលែកព័តមាននេះ