ខេត្តបាត់ដំបង ៖ ទីភ្នាក់ងារជំនួយអន្តរ ជាតិជប៉ុនហៅកាត់ថា JICA តាមរយៈគម្រោងODAបានឲ្យដឹងកាលពីថ្ងៃទី២៧ខែមីនាឆ្នាំ២០១៩ថាប្រទេសជប៉ុនបានផ្តល់ហិរញ្ញប្បទានអភិវឌ្ឍផ្លូវការលើគម្រោងអភិវឌ្ឍនិងផ្សព្វផ្សាយផលិតកម្មប្រកបដោយនិរន្តភាពតាមរយៈការគ្រប់គ្រងសត្វល្អិតចង្រៃលើដំណាំដំឡូងមីនៅកម្ពុជាដោយសហការជាមួយសាកលវិទ្យាល័យបាត់ដំបង។
កាលពីថ្ងៃទី២៧ខែមីនាក្រុមអ្នកសារព័ត៌មានមកពីអង្គភាពប្រមាណ២០បានចុះទៅកាន់ចម្ការដំឡូងមីដែលមានពូជល្អធន់នឹងសត្វចង្រៃដែលបានទទួលហិរញ្ញប្បទានពីអង្គការJicaនៅខេត្តបាត់ដំបង។គោលនៃគម្រោងនៃបង្កើតប្រព័ន្ធគ្រប់គ្រងសត្វល្អិតចង្រៃនិងការផលិតពូជដែលមានសុខភាពល្អនៅតំបន់ផលិតសំខាន់ៗក្នុងប្រទេសកម្ពុជា វៀតណាមនិងថៃ។ តាមរយៈអង្គការJicaបានបញ្ជាក់ថាដំឡូងមីត្រូវបានដាំនៅក្នុងតំបន់ត្រូពិចនិងអនុតំបន់ត្រូពិច។ បច្ចុប្បន្នប្រទេសក្នុងតំបន់អាស៊ីគឺជាតំបន់ដាំដុះធំទី២បន្ទាប់ពីប្រទេសក្នុងតំបន់អាហ្វ្រិច ហើយការប្រើប្រាស់ដំឡូងមីកំពុងកើនឡើងសម្រាប់ឧស្សាហកម្មចំណីអាហារនិងសម្ភារៈឧស្សាហកម្មផ្សេងៗដែលប្រើប្រាស់ម្សៅដំឡូងមីរួមមានដូចជាក្រដាស ប្លាស្ទិកនិងធ្វើវត្ថុធាតុដើមសម្រាប់ផលិតជីមេតាណុល។
អង្គការJicaបានលើកឡើងថាមូលហេតុមួយនៃការដាំដុះដំឡូងមីគឺដោយសារការផលិតកម្មប្រើប្រាស់ដំឡូងមីនៅក្នុងប្រទេសវៀតណាម ថៃ និងកម្ពុជា។ ដំឡូងមីក្នុងប្រទេសទាំងនេះបានចូលរួមចំណែកយ៉ាងសំខាន់ក្នុងការធ្វើឲ្យប្រសើរឡើងដល់ជីវភាពកសិករខ្នាតតូចតាមរយៈដំណាំដែលមានគុណតម្លៃនេះនឹងធ្វើឲ្យវិស័យឧស្សាហកម្មអាចបង្កើតការងារបានច្រើនឆ្ពោះទៅកាន់ការអភិវឌ្ឍសហគមន៍ប្រកបដោយចីរភាពនិងការអភិវឌ្ឍជាតិទាំងមូល។
យោងតាមការឲ្យដឹងពីអង្គការJicaម្ចាស់គ្រោងនេះបានបន្តថាកាលពីឆ្នាំ២០០៩សត្វល្អិតចង្រៃបានឆ្លងពីតំបន់ផ្សេងៗបានវាយលុកចូលប្រទេសថៃហើយក៍បានផ្ទុះរាលដាលយ៉ាងខ្លាំងបំផ្លាញដំណាំផ្សេងៗនិងធ្វើឲ្យផលិតកសិកម្មដំណាំដំឡូងមីបានថយចុះជាមធ្យមប្រមាណ៤០%ពីមួយឆ្នាំទៅមួយឆ្នាំ។នាឆ្នាំបន្តបន្ទាប់សត្វល្អិតចង្រៃ(ឆ្លងពីតំបន់ផ្សេង)នោះបានរីករាលដាលដល់ប្រទេសវៀតណាមនិងកម្ពុជា។ លោកបណ្ឌិត ស្រ៊ន ពៅ សាកលវិទ្យាធិការនៃសាកលវិទ្យាល័យបាត់ដំបងនិងអ្នកស្រាវជ្រាវផលិតពូជដំឡូងគ្មានជំងឺនៅខេត្តបាត់ដំបងដែលទទួលបានហិរញ្ញប្បទានពីគម្រោង(ODA)របស់អង្គការបានថ្លែងថាទន្ទឹមនឹងនេះយើងចាំបាច់ត្រូវការវិធីសាស្ត្រទប់ស្កាត់សត្វចង្រៃឲ្យបានត្រឹមត្រូវក្នុងតំបន់ក្នុងគោលបំណងកាត់បន្ថយការរីករាលដាលការខូចខាតដំណាំនិងបង្កើតការផលិតពូជដំឡូងមីនៅតាមតំបន់ផលិតនិមួយៗនិងជៀសវាងការចល័តពូជ។
លោកបានលើ់កឡើងថាការផលិតពូជដំឡូងមីគ្មានជំងឺនេះដោយប្រើវិធីសាស្ត្រជាច្រើនដើម្បីទប់ស្កាត់ពីសត្វចង្រៃ ការធ្វើរងដំឡូង រៀបចំដី និងការពិនិត្យរាល់ថ្ងៃលើស្លឹកដំឡូង ព្រមទាំងនៅជុំវិញចម្ការដំឡូងនេះមានដាំស្មៅដំរីម្យ៉ាងសម្រាប់ទប់ស្កាត់មិនឲ្យសត្វចង្រៃមកបំផ្លាញដំឡូងមីពូជ។លោកថានៅពេលរដូវប្រមូលផលនឹងមានធ្វើពិធីមួយដោយអញ្ជើញកសិករដែលដាំដំឡូងមកទទួលយកពូជដំឡូងគ្មានជំងឺនេះទៅដាំបន្ត។ការដាំដំឡូងមីគ្មានជំងឺនេះបានផលល្អជាងដំឡូងមីធម្មតា ហើយពូជដំឡូងនេះលោកបាននាំមកពីប្រទេសថៃយកមកដាំធ្វើពូជ។
តាមការបង្ហាញពីបច្ចេកទេសពីអង្គការទាំងឡាយរបស់ប្រទេសជប៉ុននិងការអនុវត្តដែលល្អបំផុតនៅលើពិភពលោកនិងចំណេះដឹងផ្សេងៗនឹងត្រូវបានយកមកប្រើប្រាស់និងអនុវត្តដែលល្អបំផុតនៅលើពិភពលោកនិង ដោះស្រាយបញ្ហាដោយបន្ទាន់សម្រាប់ផលិតកម្មដំឡូងមីដោយផ្តោសំខាន់លើការកាត់បន្ថយការរីករាលដាលសត្វល្អិតចង្រៃនិងការខូចដំណាំ ៕
ចែករំលែកព័តមាននេះ