រាជធានីភ្នំពេញ ៖ ខណៈផលិតផលម្រេចនៅតាមបណ្ដាខេត្តខ្ពង់រាបមួយចំនួន កំពុងប្រឈមនឹងបញ្ហាទីផ្សារ ដោយសារតម្លៃម្រេចឆ្នាំនេះធ្លាក់ថ្លៃខ្លាំងនោះ បែរជាផលិតផលម្រេចកំពត បានឡើងថ្លៃចំនួន ២ដុល្លារបន្ថែមលើគ្រប់ប្រភេទម្រេច ដែលធ្វើអោយតម្លៃថ្មីនេះ គឺកើនឡើងដល់ ១៧ដុល្លារសម្រាប់ម្រេចខ្មៅ, ២៧ដុល្លារសម្រាប់ម្រេចក្រហម និង៣០ដុល្លារ សម្រាប់ម្រេចស ។
លោក ងួន ឡាយ ប្រធានសមាគមលើកកម្ពស់ម្រេចខេត្តកំពត បានអោយដឹង តាមទូរសព្ទនាថ្ងៃទី ២៨ ខែមីនា នេះថា ការសម្រេចឡើងថ្លៃនេះ មិនមែនជាការសម្រេចរបស់សមាគមនោះទេ ពោលគឺមានការព្រមព្រៀងពីអ្នកបញ្ជាទិញម្រេចមួយដ៏ធំសម្រាប់នាំចេញ ដោយក្រុមហ៊ុនបញ្ជាទិញនេះគឺគេកំណត់ទិញតែពីកសិករខ្នាតតូចប៉ុណ្ណោះ ទើបអាចលក់ក្នុងតម្លៃទាំងនេះ បាន ។ លោកបន្តថា ក្រុមហ៊ុន La Plantation ដែលជាអ្នកបញ្ជាទិញម្រេចក្នុងតម្លៃថ្មីនេះ បានកំណត់យកកសិករខ្នាតតូច ដោយមានដំណាំម្រេចក្រោម១៥០០គុម្ព ទើបអាចទិញក្នុងតម្លៃនេះបាន និងព្រមទិញយកពីកសិករទាំងអស់ដែលផលិតបាន តែសម្រាប់កសិករខ្នាតធំ ដែលមានដំណាំម្រេចច្រើនជាងនេះ ក្រុមហ៊ុនមិនទទួលទិញ ហើយបើសិនជាមានតម្រូវការ ក៏ទិញក្នុងតម្លៃផ្សេងដែរ ។
លោក ងួន ឡាយ មានប្រសាសន៍ថា « នេះគឺជាជោគជ័យធំមួយសម្រាប់សមាគមម្រេចកំពត ជាពិសេសកសិករខ្នាតតូច នៅក្នុងតំបន់ម្រេចខេត្តកំពត សម្រាប់លើកកម្ពស់ជីវភាពរបស់ពួកគាត់ ក៏ដូចជាការស្វែងរកទីផ្សារថ្មីមួយសម្រាប់ពួកគាត់ផងដែរ »។ លោកបន្តទៀតថា បច្ចុប្បន្ននេះ នៅក្នុងសមាជិក នៅក្នុងសមាគមមានកសិករខ្នាតតូចរហូតដល់ជាង៨០ភាគរយទៅហើយ ដូច្នេះ បើសិនជាជួយពួកគាត់បាន គឺជាការល្អប្រសើរណាស់ ហើយកសិករប្រមាណតែ២០ភាគរយទៀត អាចរកទីផ្សារបានដោយខ្លួនឯង ជាក់ស្ដែងអ្នកខ្លះមានទីផ្សារសម្រាប់លក់រួចហើយ អ្នកខ្លះទៀត ជាក្រុមហ៊ុនបញ្ជាទិញផង និងជាអ្នកដាំម្រេចផង ម្ល៉ោះហើយគេអត់ត្រូវភ័យរឿងទីផ្សារនោះទេ។ ជាក់ស្ដែងក្រុមហ៊ុនមួយចំនួន ដែលចូលជាសមាគមក៏បាននាំចេញម្រេចទៅកាន់ទីផ្សារក្រៅប្រទេសដោយខ្លួនគេដែរ ។
ប្រធានសមាគមរូបនេះ បានលើកឡើងផងដែរថា សម្រាប់ឆ្នាំ ២០១៩នេះ បើសិនជាប្រមូលទិញពីកសិករខ្នាតតូចទាំងអស់នឹងទទួលបានទិន្នផលប្រមាណ២០តោន ខណៈទិន្នផលម្រេចរបស់សមាគមទាំងមូលរំពឹងថា នឹងទទួលបានជុំវិញ ៩០តោន ។
លោកបញ្ជាក់ថា ចំពោះកុងត្រាទិញលក់រវាងក្រុមហ៊ុនមួយនេះ នឹងត្រូវធ្វើឡើងនៅក្រោយពិធីបុណ្យចូលឆ្នាំប្រពៃណីខ្មែរ ហើយបន្ទាប់ពីនោះក្រុមហ៊ុនក៏នឹងចាប់ផ្ដើមប្រមូលទិញម្រេចពីកសិករខ្នាតតូច នៅក្នុងតំបន់ម្រេចខេត្តកំពត ផងដែរ ។
ជាមួយនឹងការកើនឡើងនៃតម្លៃម្រេចថ្មីនេះ កសិករមួយចំនួននៅក្នុងតំបន់ម្រេចកំពត បានបង្ហាញពីក្ដីសាទរ និងសង្ឃឹមថា ព័ត៌មាននេះនឹងក្លាយជាការពិតពីព្រោះកន្លងមក ផលិតផលម្រេចកំពតដែលកសិករទទួលទិន្នផលហើយ តែពិបាករកទីផ្សារ ជាពិសេសបញ្ហាហិរញ្ញវត្ថុផ្ទាល់តែម្ដង ដោយក្រុមហ៊ុនទិញយកម្រេចទៅបាត់ហើយ តែមិនទាន់អោយប្រាក់ទៅកសិករ។ចំណែកកសិករផ្សេងទៀត បានលក់ទៅអោយឈ្មួញនៅក្រៅសមាគម ដើម្បីបានប្រាក់ត្រលប់មកវិញខ្លះ យកទូទាត់ការចំណាយនានា ដូចជាការចំណាយទៅលើថ្លៃកម្មករជាដើម ។
គួរបញ្ជាក់ថា ម្រេចកំពតនៅតែរក្សាបាន នូវតម្លៃមួយថេរ បើទោះបីជាម្រេចនៅក្រៅតំបន់បានធ្លាក់ចុះដល់កម្រិតណាក៏ដោយជាក់ ស្ដែងកាលពីមុននេះបន្តិច តម្លៃម្រេចកំពតគឺ ខ្មៅ ១៥ដុល្លារក្នុងមួយគីឡូក្រាម ម្រេចក្រហម ២៥ដុល្លារអាមេរិក ក្នុងមួយគីឡូក្រាម និងម្រេចសមានតម្លៃ ២៨ដុល្លារអាមេរិកក្នុងមួយគីឡូក្រាម ។ ចំណែកម្រេចក្រៅតំបន់ពីម្រេចខេត្តកំពតវិញ កំពុងមានបញ្ហាទីផ្សារ និងប្រឈមនឹងការកាប់ចោលដើម្បីដាំដំណាំថ្មីដែលមានទីផ្សារពីសំណាក់ប្រជាពលរដ្ឋដូចជាម្រេចនៅមណ្ឌលគីរី ព្រះវិហារ ត្បូងឃ្មុំនិងកំពង់ចាមជាដើម ៕
ចែករំលែកព័តមាននេះ