រាជធានីភ្នំពេញ ៖ ស្ត្រីវ័យជាង៥០ឆ្នាំម្នាក់ មានមុខរបរជាកម្មករសំណង់ បានធ្លាក់ផ្ងារក្រោយពីលើសំណង់ផ្ទះល្វែងជាន់ទី១ បណ្ដាលឲ្យរងរបួសធ្ងន់ធ្ងរ និងត្រូវបានក្រុមគ្រួសារបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ប៉ុន្តែជាអកុសលគាត់ក៏បានស្លាប់បាត់បង់ជីវិត ។…
រាជធានីភ្នំពេញ ៖ ស្ត្រីវ័យជាង៥០ឆ្នាំម្នាក់ មានមុខរបរជាកម្មករសំណង់ បានធ្លាក់ផ្ងារក្រោយពីលើសំណង់ផ្ទះល្វែងជាន់ទី១ បណ្ដាលឲ្យរងរបួសធ្ងន់ធ្ងរ និងត្រូវបានក្រុមគ្រួសារបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ប៉ុន្តែជាអកុសលគាត់ក៏បានស្លាប់បាត់បង់ជីវិត ។ ហេតុការណ៍នេះបានកើតឡើងកាលពីវេលាម៉ោងជាង៧ព្រឹក ថ្ងៃទី២៩ ខែមីនានេះ នៅក្នុងការដ្ឋានសំណង់ផ្ទះល្វែង ស្ថិតនៅក្នុងភូមិរលួស សង្កាត់រលួស ខណ្ឌដង្កោ រាជធានីភ្នំពេញ ។
ស្ត្រីដែលស្លាប់បាត់បង់ជីវិតនេះឈ្មោះ មឹល ក្រមុំ អាយុជាង៥០ឆ្នាំ ស្នាក់នៅក្នុងការដ្ឋានសំណង់ខាងលើ និងមានស្រុកកំណើតនៅក្នុងភូមិស្រម៉រ ឃុំត្រពាំងស្រែ ស្រុកមេសាង ខេត្តព្រៃវែង ។ បុរសជាប្តីស្ត្រីខាងលើបាននិយាយថា គាត់មិនឲ្យប្រពន្ធធ្វើការងារសំណង់នោះទេព្រោះវាយ៉ាប់ណាស់ ប៉ុន្តែដោយសារតែជីវភាពគ្រួសារទីទ័លក្រពេកទើបប្រពន្ធគាត់មិនព្រមស្ដាប់ នៅតែជម្នះធ្វើការ ដើម្បីរកប្រាប់ផ្ទប់គ្នាទាំង២នាក់ ។
ដោយឡែកនៅវេលាយប់ថ្ងៃទី២៨ ខែមីនា ប្រពន្ធរបស់គាត់បានត្អូញត្អែរថា វិលមុខ និងមិនស្រួលខ្លួន ខណៈនោះគាត់បានឃាត់ថា ព្រឹកមិនបាច់ទៅធ្វើការទេ បើអត់ស្រួលខ្លួនអញ្ចឹងនោះ ប៉ុន្តែខណៈនោះប្រពន្ធគាត់បាននិយាយថា «ជិតចូលឆ្នាំហើយ បើមិនប្រឹងទេ មានលុយឯណាសម្រាប់ទៅស្រុកកំណើតធ្វើបុណ្យទាននឹងគេ» ។ ប្រភពដដែលបានបន្តថា ក្រោយពីនិយាយគ្នាចប់ក៏នាំគ្នាសម្រាក និងដេកលង់លក់រហូតដល់ភ្លឺលុះព្រឹកឡើងក៏បន្តការងារធម្មតា ដោយប្រពន្ធគាត់បានឡើងទៅលើជាន់ទី១ ដើម្បីរៀបចំក្ដារពុម្ពចាក់សសរ ស្រាប់តែពេលនោះសង្ស័យប្រពន្ធគាត់វិលមុខ ឬក៏ធ្វេសប្រហែសយ៉ាងម៉េចមិនដឹងទេ ស្រាប់តែធ្លាក់ផ្ងារក្រោយបោកក្បាលផ្ទប់ដុំថ្ម បណ្តាលឲ្យរងរបួសសន្លប់ស្តុកស្តឹង ហើយភ្លាមៗនោះគាត់ និងបងប្អូនកម្មកររួមការងារជាមួយគ្នា បានលើកដឹកយកទៅកាន់មន្ទីរពេទ្យ តែអកុសលពេលទៅដល់ក៏បានដាច់ខ្យល់ស្លាប់បាត់ទៅហើយ ។
បន្ទាប់មកក៏បានដឹកសពទៅកាន់ទីតាំងការដ្ឋានសំណង់វិញ ហើយរាយការណ៍ជូនសមត្ថកិច្ចមូលដ្ឋានចុះធ្វើកោសល្យវិច្ច័យ រួចរាល់ទើបដឹកយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ