ខេត្តព្រះសីហនុ ៖ ប្រភពផ្តល់ព័ត៌មានពីប្រជាពលរដ្ឋនៅឃុំរាម ស្រុកព្រៃនប់ ខេត្តព្រះសីហនុ សុំមិនបញ្ចេញឈ្មោះបានឲ្យដឹងថា ដីព្រៃជាច្រើនហិកតានៅក្នុងដែនឧទ្យានជាតិព្រះសីហនុ «រាម» ស្ថិតក្នុងភូមិរាម ឃុំរាម ស្រុកព្រៃនប់ ខេត្តព្រះសីហនុ ត្រូវបានលោក ថន វីរៈ ងារជាឧកញ៉ា និងអះអាងថា រូបលោកជាឧត្តមសេនីយ៍នៅក្នុងកងយោធពលខេមរភូមិន្ទផងនោះ បាននាំយកគ្រឿងចក្រជាច្រើនគ្រឿងចូលឈូសឆាយទន្ទ្រានកាន់កាប់យកដីរដ្ឋនៅក្នុងដែនឧទ្យានជាតិ (រាម) ធ្វើជាកម្មសិទ្ធិផ្ទាល់ខ្លួនអាងអំណាចខាងលើ មិនខ្វល់ជាមួយសមត្ថកិច្ចជំនាញពាក់ព័ន្ធ និងអាជ្ញាធរមូលដ្ឋានខាងលើឡើយ។
ប្រភពខាងលើបានបន្តឱ្យដឹងទៀតថា កន្លងមក លោកឧកញ៉ា ថន វីរ: និងជាឧត្តមសេនីយ៍ បានអះអាងថា ការយកគ្រឿងចក្រមកឈូសឆាយដីព្រៃនៅក្នុងតំបន់ដែនឧទ្យានជាតិ (រាម)ដើម្បីសាងសង់បន្ទាយស្នាក់នៅរបស់កងទ័ព និងបានហាមឃាត់ប្រជាពលរដ្ឋនៅមូលដ្ឋានខាងលើមិនឲ្យចេញ-ចូលឆ្លងកាត់ការដ្ឋានរបស់ខ្លួន ព្រោះខ្លាចប្រជាពលរដ្ឋបានឃើញពីសកម្មភាពគ្រឿងចក្រដែលកំពុងតែទន្ទ្រានឈូសឆាយបំផ្លិចបំផ្លាញធនធានធម្មជាតិក្នុងដែនឧទ្យានជាតិព្រះសីហនុ «រាម» ជាច្រើនហិកតា ដោយប្រើរយៈពេលជាច្រើនឆ្នាំកន្លងមកហើយ មិនមានសមត្ថកិច្ចជំនាញពាក់ព័ន្ធ និងអាជ្ញាធរដែនដីហ៊ានចេញមុខចុះទប់ស្កាត់សកម្មភាពខាងលើម្តងណាឡើយ។
ក្នុងសកម្មភាពខាងលើនេះ ត្រូវបានប្រជាពលរដ្ឋ និងមន្ត្រីរាជការថ្នាក់តូចតាច រិះគន់ត្រង់ៗថា លោកឧត្តមសេនីយ៍ និងមានងារជាឧកញ៉ា (ថន វីរៈ) កំពុងតែលេងសៀករហ័សកម្ម បន្លំភ្នែកថ្នាក់លើអង្គភាពរបស់ខ្លួនក្នុងរូបភាព( កន្ទេលធំបន្លំដេក) ដើម្បីផលប្រយោជន៍ផ្ទាល់ខ្លួនតែប៉ុណ្ណោះ ។
ប្រភពផ្តល់ព័ត៌មានពីមន្ត្រីក្រសួងបរិស្ថានបានបញ្ជាក់ឲ្យដឹងថា ឧទ្យានជាតិ ព្រះសីហនុ «រាម»ជាដីសាធារណៈរបស់រដ្ឋមិនអាចបណ្តែតបណ្តោយឲ្យបុគ្គលណាម្នាក់ទន្ទ្រានឈូសឆាយកាន់កាប់ជាដាច់ខាត។
ព័ត៌មានពិស្តារមានផ្សាយនៅកាសែតកោះសន្តិភាព
ចែករំលែកព័តមាននេះ