រាជធានីភ្នំពេញ ៖ មនុស្សប្រុស-ស្រី២នាក់បានស្លាប់បាត់បង់ជីវិត និងក្មេងចាស់ប្រុស-ស្រី៥នាក់ផ្សេងទៀត រងរបួសស្រាលនិងធ្ងន់ នៅក្នុងគ្រោះថ្នាក់ដ៏រន្ធត់មួយ ដែលបង្កឡើងដោយរថយន្តឡិចសុីស RX៣០០ ពណ៌ស្ករមួយគ្រឿងបើកបរដោយបុរសញៀនថ្នាំនិងស្រវឹងជោកជាំបុកចូលវង់រាំ និងផឹកស៊ី…
រាជធានីភ្នំពេញ ៖ មនុស្សប្រុស-ស្រី២នាក់បានស្លាប់បាត់បង់ជីវិត និងក្មេងចាស់ប្រុស-ស្រី៥នាក់ផ្សេងទៀត រងរបួសស្រាលនិងធ្ងន់ នៅក្នុងគ្រោះថ្នាក់ដ៏រន្ធត់មួយ ដែលបង្កឡើងដោយរថយន្តឡិចសុីស RX៣០០ ពណ៌ស្ករមួយគ្រឿងបើកបរដោយបុរសញៀនថ្នាំនិងស្រវឹងជោកជាំបុកចូលវង់រាំ និងផឹកស៊ី នៅ
ក្នុងពិធីបុណ្យភូមិទាំងថ្ងៃ ។ ហេតុការណ៍ដ៏រន្ធត់នេះ បានកើតឡើងកាលពីវេលាម៉ោងប្រមាណ១២ថ្ងៃត្រង់ថ្ងៃទី២៨ ខែមីនា នៅចំណុចផ្ទះលេខ១២ ផ្លូវលេខ៣២៤ ភូមិ៤ សង្កាត់បឹងសាឡាង ខណ្ឌទួលគោក ក្រោយអធិការដ្ឋាននគរបាលខណ្ឌទួលគោក ។
រថយន្តឡិចសុីស RX៣០០ ពណ៌ស្ករ ត្រូវបាននគរបាលប្រាប់ថា ពាក់ផ្លាកលេខភ្នំពេញ២AN-២៣៩៥ បើកបរដោយឈ្មោះ ទឹម គឹមតិច ភេទប្រុស អាយុ៣៣ឆ្នាំ មុខរបរលក់សា្លធម៌ដូង ស្នាក់នៅផ្ទះលេខ២៥A ផ្លូវលេខ៣២៤ ភូមិ២ សង្កាត់បឹងសាឡាង ខណ្ឌទួលគោក ជាមនុស្សញៀនថ្នាំ និងស្ថិតនៅក្នុងភាពស្រវឹងមានកម្រិតជាតិអាល់កុល០,២៦ ក្នុង១លីត្រខ្យល់ ។
ជនរងគ្រោះដែលបានស្លាប់បាត់បង់ជីវិត ម្នាក់ឈ្មោះ ពិល យុំ ភេទស្រី អាយុ៦០ឆ្នាំ និងម្នាក់ទៀតឈ្មោះ ស៊ុយ សឿន ភេទប្រុស អាយុ៤២ឆ្នាំ មុខរបរលក់ដូរ ស្នាក់នៅផ្ទះជួលកន្លែងកើតហេតុ ។ ចំណែកអ្នករងរបួសត្រូវបានគេស្គាល់ ១-ឈ្មោះ ណា អារីយ៉ា ភេទស្រី អាយុ៣ឆ្នាំ រងបួសធ្ងន់ ២-ឈ្មោះ សំ បូរដា ភេទប្រុស អាយុ៣២ឆ្នាំ របួសស្រាល ៣-ឈ្មោះ ថា បញ្ញា ភេទប្រុស អាយុ២០ឆ្នាំ របួសស្រាល ៤-ឈ្មោះ ដួង ដាវ ភេទស្រី អាយុ៣០ឆ្នាំ របួសធ្ងន់ និង៥-ពុំត្រូវបានស្គាល់ឈ្មោះឡើយ ។
ទោះបីជាយ៉ាងណា ប្រជាពលរដ្ឋអះអាងថា មានអ្នករងរបួសផ្សេងទៀតលើសពីនេះ ត្រូវបានបញ្ជូនទៅសង្គ្រោះ ហើយនគរបាលកំពុងស្រាវជ្រាវរកអត្តសញ្ញាណ ។ តាមព័ត៌មានឱ្យដឹងថា មុនពេលកើតហេតុ បន្ទាប់ពីធ្វើបុណ្យភូមិរួច ប្រជាពលរដ្ឋទាំងក្មេងទាំងចាស់ កំពុងជួបជុំគ្នាហូបបាយ និងរាំលេងសប្បាយ ។ ខណៈនោះ ស្រាប់តែមានរថយន្តបើកមកបុកចូលក្នុងហ្វូងមនុស្ស បណ្តាលឱ្យដេកដួលរដូករណែល ហើយរថយន្តនោះក៏បើកថយចេញវិញ និងបានបើកមកបំបុកទៀត ក៏ជ្រុលទៅបុកផ្ទះប្រជាពលរដ្ឋកៀបជាប់ទើបទៅមុខលែងរួច ។
តាមព័ត៌មានឱ្យដឹងថា ស្ត្រីម្នាក់បានស្លាប់នៅកន្លែងកើតហេតុ ចំណែកបុរសម្នាក់ស្លាប់នៅពេលបញ្ជូនទៅកាន់មន្ទីរពេទ្យ ។ ដោយឡែក ជនរងគ្រោះត្រូវបានរថយន្តដឹកទៅកាន់មន្ទីរពេទ្យពេទ្យ ។ នៅកន្លែងកើត ហេតុ បាយ ម្ហូប តុកៅអី ស្រាបៀរ បានប៉ើងខ្ទាតរប៉ាត់រប៉ាយ និងឮស្នូរតែសំឡេងទ្រហោយំពីសំណាក់បងប្អូនសាច់ញាតិជនរងគ្រោះ ។ ភ្លាមៗ អ្នកបើកបររថយន្តត្រូវបាននគរបាលខណ្ឌទួលគោកឃាត់ខ្លួន ហើយនៅក្នុងហេតុការណ៍នេះដែរ បុរសម្នាក់ដែលជាបងប្អូនជនរងគ្រោះត្រូវបាននគរបាលឃាត់ខ្លួន ដោយសារយកដំថ្មវាយកម្ទេចកញ្ចក់រថយន្តខាងលើក្រោយកើតហេតុ ។
ទាក់ទិននឹងហេតុការណ៍នេះ ត្រូវបានប្រជាពលរដ្ឋ ដែលជាអ្នករងគ្រោះឱ្យដឹងថា ដោយសារតែជននោះខឹងមិនហៅផឹកស៊ីនៅក្នុងពិធីបុណ្យភូមិ ទើបបានជាបើករថយន្តមកបំបុកបែបនេះ ។ ប៉ុន្តែអ្នកបើកបររថយន្តវិញឆ្លើយប្រាប់សមត្ថកិច្ចថា ដោយសាតែខឹងជនរងគ្រោះមិនលក់ថ្នាំញៀនអោយ ។ ទោះបីជាយ៉ាងណា នគរបាលឲ្យដឹងថា អ្នកបើកបររថយន្តរូបនេះ ជាមនុស្សញៀនថ្នាំនិយាយលែងដឹងខុសត្រូវទៅហើយ ។ ពិតជាគ្រោះថ្នាក់ពេកណាស់ចំពោះអំពើបែបនេះ ៕
ចែករំលែកព័តមាននេះ