ខេត្តបន្ទាយមានជ័យ ៖ ស្ត្រីចំនួន៣នាក់ និងបុរសម្នាក់ ជាមុខសញ្ញាពាក់ព័ន្ធនឹងករណីជួញដូរគ្រឿងញៀន ត្រូវបានកងកម្លាំងនគរបាលស្រុកម៉ាឡៃចាប់ឃាត់ខ្លួនកាលពីថ្ងៃទី២៧-២៨ ខែមីនា ឆ្នាំ២០១៩ ក្នុងភូមិសាស្ត្រស្រុកម៉ាឡៃ និងក្រុងប៉ោយប៉ែត ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ដើម្បីអនុវត្តតាមបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ ដែលតែងក្រើនរំ លឹកដល់គ្រប់អធិការដ្ឋាននគរបាលស្រុក-ក្រុង ត្រូវធ្វើការស៊ើបអង្កេតស្រាវជ្រាវនូវបទល្មើសគ្រឿងញៀនឲ្យដូចជាភ្លៀងរលឹម ព្រោះគ្រឿងញៀនជាដើមចមនៃបទល្មើស ចោរលួច ឆក់ប្លន់ អំពើហឹង្សា បង្កឲ្យអសន្តិសុខសង្គម ។
លោកអធិការនគរបាលស្រុកម៉ាឡៃបានបន្តថា ជាលទ្ធផលនៅវេលាម៉ោង៦និង១០នាទីយប់ថ្ងៃទី២៧ ខែមីនា ឆ្នាំ២០១៩ កម្លាំងនគរបាលអធិការដ្ឋានស្រុកម៉ាឡៃ បានធ្វើការត្រួតរដ្ឋបាលភូមិសាស្ត្រ នៅចំណុចវត្តរតនៈម៉ាឡៃ លើផ្លូវជាតិលេខ៥៩ ក្នុងភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ បានប្រទះឃើញមុខសង្ស័យជួញដូរគ្រឿងញៀនចំនួន៣នាក់ ក្នុងនោះរួមមាន១-ឈ្មោះ តាំង ចន្ធូ ភេទស្រី អាយុ៣៩ឆ្នាំ មុខរបរកម្មករ រស់នៅសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ២- ឈ្មោះ សោម ច័ន្ទចំប៉ា ភេទស្រី អាយុ៣២ឆ្នាំ មុខរបរកម្មករ រស់នៅភូមិថ្មរមាល ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ និង៣-ឈ្មោះ ទេស រ៉ូស្សា ហៅមុំ ភេទស្រី អាយុ២៥ឆ្នាំ មុខរបររៀនសំអាងការ រស់នៅភូមិ ថ្នល់បត់ ឃុំ ភ្នំតូច ស្រុក មង្គលបូរី ខេត្តបន្ទាយមានជ័យ។
ជាមួយនឹងការបង្ក្រាបខាងលើនេះសមត្ថកិច្ចបានឆែកឆេររកឃើញវត្ថុតាងថ្នាំញៀនប្រភេទម៉ាទឹកកកចំនួន១កញ្ចប់ធំច្រកក្នុងថង់ពណ៌ស រុំស្កុត និងថ្នាំញៀនប្រភេទមេតំហ្វេតាមីនគ្រាប់ចំនួន៣,៩៦៧គ្រាប់ ក្នុងនោះថ្នាំពណ៌លឿងចំនួន៣៩គ្រាប់ និងដកហូតសម្ភារៈមាន ទូរស័ព្ទដៃចំនួន៣គ្រឿង។
លោកអធិការបានបន្តទៀតថា ដោយយោងតាមចម្លើយសារភាពរបស់ជនសង្ស័យឈ្មោះ តាំង ចន្ធូ កម្លាំងនគរបាលស្រុកម៉ាឡៃបន្តទៅបង្ក្រាបមុខសញ្ញាពាក់ព័ន្ធម្នាក់ទៀតឈ្មោះ កែ រិន ភេទប្រុស អាយុ៤១ឆ្នាំ រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី២៨ មីនា ឆ្នាំ២០១៩។
លោកអធិការបានបញ្ជាក់ថា មុខសញ្ញាប្រុស-ស្រីទាំង៤នាក់នេះគឺធ្លាប់ជាប់ពន្ធនាគារ តែពេលចេញមកវិញមិនរៀងចាល នៅតែប្រព្រឹត្តត្រូវបានចាប់ឃាត់ខ្លួនបញ្ជូនទៅពន្ធនាគារម្តងទៀត។ បច្ចុប្បន្ន ជនសង្ស័យទាំង៤នាក់ខាងលើ ត្រូវបានសមត្ថកិច្ចកំពុងតែរៀបចំសំណុំរឿងបញ្ជូនទៅស្នងការដ្ឋាន ដើម្បីចាត់ការបន្តតាមនីតិវិធី ៕
ចែករំលែកព័តមាននេះ