ព្រះពុទ្ធសាសនាហាមប្រាមមិនឱ្យរាប់រកបុគ្គលបាបប្រព្រឹត្តអំពើទុច្ចរិតផ្សេងៗនោះឡើយ វាជាហេតុនាំឱ្យមានទុក្ខដោយប្រការផ្សេងៗមកលើខ្លួនយើងជាអ្នកសេពគប់វិញ ។
ដូច្នេះមុននឹងរាប់អានអ្នកណាមកធ្វើជាមិត្ត យើងត្រូវតែប្រយ័ត្នឲ្យមែនទែនចំពោះមនុស្សប្រភេទខ្លះដែលនិយាយចាក់បណ្តោយ ចេះតែហីអើតាមជានិច្ច ព្រោះអ្នកនិយាយចាក់បណ្តោយខ្លះគេមិនមានគំនិតចង់ឲ្យយើងចម្រើននោះទេ គេមានតែត្រេកអរនៅពេលណាដែលយើងធ្លាក់ដុនដាប រងទុក្ខវេទនា ។
មិត្តខ្លះគេមានចិត្តប្រឡងប្រណាំងជាមួយយើងជានិច្ច នៅពេលដែលយើងមានលំនឹង ឬកំពុងចម្រើនក្នុងការងារឬមុខរបរ គេមិនចោលយើងទេ គេតែងពឹងពាក់យើងឱបដៃឱបជើង តែនៅពេលណាដែលយើងចុះខ្សោយ ឬមានសេចក្តីប្រមាទភ្លាំងភ្លាត់នៅក្នុងការងារភ្លាម គេក៏ជួយច្រានយើងដោយពាក្យសរសើរ ដោយសម្តីបញ្ជោរក្នុងបំណងកុំឲ្យយើងមើលឃើញនូវការប្រហែសធ្វេស ឬកំហុសរបស់យើង ។
លុះដល់កំហុសនោះកាន់តែច្រើន កាន់តែធំទៅៗ គេក៏ដើរខ្សឹប ដើរនិយាយប្រាប់អ្នកដទៃនូវអ្វីៗដែលជាកំហុសរបស់យើង ថែមទាំងប្រឌិតរឿងអាស្រូវមិនពិតផ្សំបញ្ចូលថែមទៀត នោះគឺដល់ពេលដែលធាក់យើងឲ្យខ្ទាតចេញ ដើម្បីគេស៊ីដាច់កន្លែងនោះតែម្តង ព្រោះគេឃ្លានជាយូរមកហើយ ។
មិត្តប្រភេទនេះត្រូវប្រយ័ត្នឱ្យមែនទែន ដែលលោកចាត់ថាជាមិត្តពិតមានពិស ។
ចែករំលែកព័តមាននេះ