ខេត្តសៀមរាប ៖ ស្ពាននាគបុរាណ (ស្ពានកំពង់ក្តី) ឬស្ពានប្រាប់ទិស ដែលសាងសង់ឡើងពីថ្មបាយក្រៀម ដែលមានអាយុកាលជាង១ពាន់ឆ្នាំមក ហើយត្រូវបានធ្វើការជួសជុលចំនួន២លើករួចមកហើយ កាលពីសម័យបារាំង និងសម័យរដ្ឋកម្ពុជា ។
កាលពីរសៀលថ្ងៃទី២៨ ខែ មីនា ឆ្នាំ២០១៩ ព្រះសង្ឃ គណៈកម្មការវត្តជីក្រែង ពុទ្ធបរិស័ទ អាជ្ញាធរស្រុកជីក្រែង បានរួមកិច្ចសហការជាមួយអាជ្ញាធរជាតិអប្សរា បានរៀបចំធ្វើពិធីក្រុងពាលីជួសជុលបង្កាន់ដៃស្ពានថ្មបុរាណ ស្ពានកំពង់ក្តី ហៅស្ពានប្រាប់ទិស និងបួងសួងសុំនូវសេចក្តីសុខក្នុងពេលតភ្ជាប់បង្កាន់ដៃស្ពាន ។
ក្នុងពិធីក្រុងពាលីនោះដែរ ក៏មានវត្តមានចូលរួមរបស់លោក ស៊ឹង គង់ អតីតអគ្គនាយករងអាជ្ញាធរជាតិអប្សរា លោក ពៅ ប៊ុនធឿន អភិបាលស្រុកជីក្រែង មន្ត្រីរាជការ មេឃុំ និងកងកម្លាំប្រដាប់អាវុធ រួមទាំងពុទ្ធបរិស័ទ ប្រជាពលរដ្ឋចូលរួមយ៉ាងច្រើនកុះករទៀតផង ។
បន្ទាប់ពីធ្វើការដង្ហែនូវទេវរូបទាំងពីរអង្គប្រទក្សិណចំនួន៣ជុំទីអសនៈ និងថ្វាយភួងផ្កា បូជា ទៀន ធូបរួចមក ព្រះសង្ឃ អាជ្ញាធរដែនដី លោកតាអាចារ្យ បានចាប់ផ្តើមធ្វើពិធីក្រុងពាលី និងបួងសួង ទៅតាមគន្លងប្រពៃណីព្រះពុទ្ធសាសនា ដែលពុទ្ធបរិស័ទគោរពរប្រណិប័ត្តន៍តរៀងមក ដោយមានការសែនព្រេន ដើម្បីសុំម្ចាស់ទឹកម្ចាស់ដី ដែលមានបារមី គង់ប្រថាប់ថែរក្សានៅស្ពាននាគកំពង់ក្តីជាច្រើនពាន់ជំនាន់មកហើយ ដែលមានឈ្មោះលោកតា គង់ និងតាព្រហ្ម សូមឲ្យជួយថែរក្សាប្រជានុរាស្ត្រនៅទូទាំងព្រះរាជាណាចក្រកម្ពុជា ក៏ដូចក្នុងស្រុកជីក្រែង ។
ក្នុងពិធីនោះដែរ ពុទ្ធបរិស័ទបួងសួងសុំឲ្យបារមីលោកតាថែរក្សាស្ពានថ្មទាំង១៣ តាមបណ្តោយផ្លូវជាតិលេខ៦ ដើម្បីបញ្ជៀសនូវគ្រោះថ្នាក់ចរាចរណ៍ និងសុំឱ្យបារមីរបស់លោកតាគង់ លោកតាព្រហ្ម ការពារស្ពាននាគកំពង់ក្តី ឬ ស្ពាន់ប្រាប់ទិស ក្នុងស្រុកជីក្រែង ។
តាមការបញ្ជាក់របស់ព្រះគ្រូសូត្រស្តាំ ឃឿន សាវង្ស ក្នុងនាមតំណាងលោកគ្រូចៅអធិការវត្តជីក្រែង បានឲ្យដឹង ពិធីនេះធ្វើឡើងក្នុងគោលបំណងសម្រាប់អ្នកកាន់ព្រះពុទ្ធសាសន៍ ទៅតាមពុទ្ធាឱវាទរបស់ព្រះសម្មាសម្ពុទ្ធ ដែលទ្រង់បានសម្តែងនូវព្រះធម៌ ទុកឲ្យពុទ្ធបរិស័ទ គោរពបូជា ដើម្បីឲ្យយើង គ្រប់រូបចេះរួបរួមសាមគ្គីគ្នា សំខាន់ប្រជាពលរដ្ឋនៅទូទាំងស្រុកជីក្រែង រួមមតិគ្នាបាន ផ្តួចផ្តើមរៀបចំពិធីបុណ្យជួសជុលបង្កាន់ដៃស្ពាន ដែលមានតួអង្គជានាគ ក្នុងការសុំនូវសេចក្តីសុខចម្រើន ថែរក្សានូវសុខសន្តិភាពឲ្យបានគង់វង្ស ដូចការថែរក្សាឲ្យបានគង់វង្សនូវស្ពាននាគបុរាណ ដែលជាប្រភពចំណូលមិនចេះរីងស្ងួតរបស់ជាតិ និងប្រជាជនស្រុកជីក្រែងផងដែរ ។
មានប្រសាសន៍សំណេះសំណាលក្នុងពិធីនោះដែរ លោក ស៊ឹង គង់ បានគូសបញ្ជាក់ថា ដោយសារកត្តាសន្តិភាពនេះហើយ ដែលធ្វើឲ្យប្រជាពុទ្ធបរិស័ទ និងប្រជាពលរដ្ឋ មានសិទ្ធិសេរីភាព ក្នុងការប្រកបមុខរបរ ការដើរហើរ ការជួបជុំធ្វើបុណ្យទានទៅតាមប្រពៃណីសាសនា ។ លោកក៏បានលើកឡើងផងដែរ អំពីជីវប្រវត្តិរបស់ព្រះបាទជ័យវរ្ម័នទី៧ និងម្ចាស់ក្សត្រិយ៍ឥន្ទ្រទេវីជាវរៈនារីដ៏ឆ្នើមនាសម័យមហានគរ ដោយព្រះអង្គទាំងពីរ បានបន្សល់ទុកនូវស្នាព្រះហស្តក្នុងការកសាងនូវរាល់សមទ្ធិផលជាច្រើន ទៅតាមបែបព្រហ្មមញ្ញសាសនា និងព្រះពុទ្ធសាសនា ព្រមទាំងអភិវឌ្ឍន៍នូវប្រព័ន្ធធារាស្ត្រ ប្រព័ន្ធគមនាគមន៍ មន្ទីរពេទ្យជាដើម ។
លោកបានបន្តថា ម្យ៉ាងទៀតការជួបជុំគ្នានៅលើស្ពាននាគបុរាណ គឺដើម្បីធ្វើពិធីជួសជុលបង្កាន់ដៃស្ពាន និងបួងសួងសុំនូវសេចក្តីសុខចម្រើន ជូនដល់ប្រទេសជាតិ សំខាន់ថ្នាក់ដឹកនាំកំពូលៗ និង អាជ្ញាធរគ្រប់ជាន់ថ្នាក់ មន្ត្រីរាជការ និង ប្រជាពលរដ្ឋ ក្នុងស្រុកជីក្រែង ក្នុងការធ្វើដំណើរឆ្លងកាត់តាមដងផ្លូវទូទាំងប្រទេស សូមកុំឲ្យកើតមានគ្រោះថ្នាក់ចរាចរណ៍ឡើយ ។
លោកបានលើកផងដែរអំពីការសាសនា គ្រប់ជាតិសាសន៍ ដោយបញ្ជាក់ថា សាសនានៃប្រទេសនិមួយៗ គឺធ្វើការអប់រំមនុស្សគ្រប់រូប ប្រព្រឹត្តតែអំពើល្អ ឲ្យស្គាល់បុណ្យបាប អាក្រក់ ល្អ ហើយក៏ជាស្ពានមួយក្នុងការស្វែងរកនូវសេចក្តីស្ងប់ និងសុខសន្តិភាព ។ ដូច្នេះដើម្បីភាពសុខសាន្តរបស់ប្រជាជនកម្ពុជា យើងត្រូវរួមសាមគ្គីគ្នា រក្សានូវសុខសន្តិភាពឲ្យបានគង់វង្ស និងធ្វើឲ្យប្រទេសជាតិមានភាពរីកចម្រើនទៅអនាគត ៕
ចែករំលែកព័តមាននេះ