ខេត្តកំពងចាម ៖ អគារ១ល្វែងនៅក្នុងបរិវេណរោងចក្រស្បែកជើងជូ ហួយ ស្ថិតនៅឃុំខ្នុរដំបូង ស្រុកជើងព្រៃ ត្រូវបានអគ្គិភ័យឆាបឆេះសន្ធោរសន្ធៅ និងបានបង្កឲ្យមានការភ្ញាក់ផ្អើលនៅវេលាម៉ោង៦ព្រឹកថ្ងៃទី២៨ មីនា ២០១៩…
ខេត្តកំពងចាម ៖ អគារ១ល្វែងនៅក្នុងបរិវេណរោងចក្រស្បែកជើងជូ ហួយ ស្ថិតនៅឃុំខ្នុរដំបូង ស្រុកជើងព្រៃ ត្រូវបានអគ្គិភ័យឆាបឆេះសន្ធោរសន្ធៅ និងបានបង្កឲ្យមានការភ្ញាក់ផ្អើលនៅវេលាម៉ោង៦ព្រឹកថ្ងៃទី២៨ មីនា ២០១៩ ។ ហើយត្រូវបានរថយន្តពន្លត់អគ្គិភ័យរហូតដល់ទៅ១១គ្រឿងបានមកជួយបាញ់ទឹកពន្លត់ ដោយអស់ជាច្រើនរថយន្ត តែមិនបានបង្កឲ្យនរណាម្នាក់រងគ្រោះថ្នាក់នោះទេ ។
តាមលោកអូត ឈាងលី អភិបាលស្រុកជើងព្រៃឲ្យដឹងថា ក្រោយពីទទួលបានហេតុការណ៍គ្រោះអគ្គិភ័យខាងលើនោះ រូបលោកបានដឹកនាំកម្លាំងសមត្ថកិច្ច ដោយមានរថយន្តពន្លត់អគ្គិភ័យរបស់អធិការដ្ឋាននគរបាលស្រុកជើងព្រៃ១គ្រឿង ដើម្បីចុះទៅបាញ់ទឹកពន្លត់ភ្លើងដែលបានកំពុងតែឆេះនោះ ។
អភិបាលស្រុកជើងព្រៃបន្តថា នៅក្នុងហេតុការណ៍ឆេះអគារដាក់បាតស្បែកជើងមានកាវ និងសាំងក្រអូបខ្លះនោះត្រូវបានលោកស្នងការនគរបាលខេត្ត ស្នងការរង និងមន្ត្រីសមត្ថកិច្ចរាប់សិបនាក់ឲ្យស្វះស្វែងហៅរថយន្តពន្លត់អគ្គិភ័យពីតាមបណ្តាស្រុក-ក្រុងនានា ក្នុងនោះមាន១គ្រឿង ចេញមកពីស្រុកបារាយណ៍ ខេត្តកំពង់ធំ ក៏បានមកចូលរួមសស្រាក់សស្រាំបាញ់ទឹកពន្លត់ ដោយបានប្រើពេលរហូតដល់វេលាម៉ោង១១ព្រឹក ទើបអាចគ្រប់គ្រងស្ថានការណ៍បាន និងរលត់ទាំងស្រុង ។
ទោះជាបែបនេះក្តីសមត្ថកិច្ចបាននូវបន្តសកម្មភាពប្រើគ្រឿងចក្រ កាយនូវសំណល់ដែលឆេះយកកាវចេញ ដើម្បីការពារកុំឲ្យរាលដាលឆេះបន្តទៀត ។ ហើយពេលដែលកើតហេតុមានគ្រោះអគ្គិភ័យកើតឡើងនោះមិនទាន់ដល់ម៉ោងកម្មករចូលធ្វើការនូវឡើយ ហើយឃ្លាំងស្តុកបាតស្បែកជើងត្រូវបានបិទទ្វារមិនមានមនុស្សនោះទេ កត្តាដែលកើតមានអគ្គិភ័យដោយសារ តែទុស្សេខ្សែភ្លើងបានឆេះរាលដាលបង្កឲ្យមានគ្រោះអគ្គិភ័យកើតឡើង ។
លោកអភិបាលស្រុកជើងព្រៃបញ្ជាក់ថា ចាប់តាំងពីពេលដែលកកើតរោងចក្រជូ ហួយ ផលិតស្បែកជើងនៅស្រុកជើងព្រៃ មកមានកម្មករកម្មការិនីចំនួនជាង៥០០០នាក់ កំពុងបម្រើការងារ ដើម្បីយកប្រាក់ខែដោះស្រាយជីវភាពគ្រួសារ ។ ក្នុងពេលដែលចាប់ផ្តើមឆេះដំបូងក្រុមសន្តិសុខ និងបម្រើការងារក្នុងរោងចក្របាននាំគ្នាពន្លត់បឋម តែពន្លត់មិនឈ្នះដោយសារភ្លើងឆេះឡើងខ្លាំងពេក រហូតដល់មានការអន្តរាគមន៍រថយន្តពន្លត់អគ្គិភ័យចំនួន១១គ្រឿង ក្នុងប្រតិបត្តិការការខាងលើក៏មានបញ្ជាពីលោកគួច ចំរើន អភិបាលនៃគណៈអភិបាលខេត្តឲ្យសមត្ថកិច្ចគ្រប់លំដាប់ថ្នាក់ត្រូវបានប្រឹងប្រែង ដើម្បីនាំគ្នា មកពន្លត់ភ្លើងដែលឆេះរហូតដល់បានពន្លត់ជោគជ័យ ដោយមិនបានឲ្យឆេះឆ្លងទៅអគារផ្សេង ៕
ចែករំលែកព័តមាននេះ