ខេត្តកំពង់ឆ្នាំង ៖ ក្រោយបានផ្សាយរួច ជុំវិញករណីនាយនគរបាលប៉ុស្តិ៍រដ្ឋបាលឃុំជៀប, កូនប្រុស រួមនិងបក្សពួកដែលជាប់ចោទព្រួតវាយកាប់ចាក់ទៅលើយុវជនរងគ្រោះម្នាក់ បណ្ដាលឱ្យរងរបួសជាទម្ងន់ កាលពីព្រឹកថ្ងៃទី២៧ មីនា សមត្ថកិច្ចបានចុះឃាត់ខ្លួនជនសង្ស័យចំនួន២នាក់ ។ ហើយម្នាក់ជាកូនមេប៉ុស្តិ៍ និងម្នាក់ទៀតជាមិត្តភក្តិកូនមេប៉ុស្តិ៍ ។ រីឯលោកមេប៉ុស្ដិ៍រដ្ឋបាលឃុំជៀបរូបនោះ ក៏ត្រូវបានហៅមកសាកសួរផងដែរ ។
សេចក្តីរាយការណ៍បន្តថា ប៉ុន្តែនៅមិនទាន់ទទួលបានលទ្ធផលបែបណានៅឡើយទេ នេះបើយោងតាម លោក អៀរ ប៊ុនធឿន ស្នងការរងនគរបាលខេត្ត និងជាអ្នកនាំពាក្យរបស់ស្នងការនគរបាលខេត្តកំពង់ឆ្នាំង ប្រាប់នៅរសៀលថ្ងៃទី២៧ មីនា ដដែល ។ អ្នកនាំពាក្យរបស់ស្នងការដ្ឋាននគរបាលខេត្តកំពង់ឆ្នាំងបន្តថា ធម្មតាទេ ឋានៈដល់ទៅនាយប៉ុស្តិ៍នគរបាលរដ្ឋបាល ដែលរងការចោទប្រកាន់បែបនេះ គឺយើងត្រូវតែធ្វើការសាកសួរ និងស៊ើបអង្កេតឲ្យបានច្បាស់លាស់ ព្រោះមកដល់ពេលនេះ យើងមិនទាន់ដឹងថា តើពិតឬមិនពិតនៅឡើយនោះទេ ។
ប៉ុន្តែយ៉ាងនេះក្តី កូនលោកមេប៉ុស្តិ៍ម្នាក់ រួមនិងមិត្តភក្តិរបស់កូនមេប៉ុស្តិ៍ម្នាក់ទៀត ក៏ត្រូវបានឃាត់ខ្លួនរួចហើយ ហើយកំពុងរៀបចំបញ្ជូនមកកាន់ស្នងការដ្ឋាននគរបាលខេត្ត ដើម្បីសាកសួរបន្ត។ ដោយឡែក មេប៉ុស្ដិ៍រដ្ឋបាលឃុំជៀប លោក ជៀម វិចិត្រ ក៏ត្រូវបានសមត្ថកិច្ចនគរបាលស្រុកទឹកផុស ហៅធ្វើការសាកសួរផងដែរ ។ ប៉ុន្តែលោកបញ្ជាក់ថា មិនទាន់ជឿចម្លើយរបស់នាយប៉ុស្តិ៍នគរបាលរដ្ឋបាលនោះនៅឡើយទេ អាចថា លោកមេប៉ុស្តិ៍ជាអ្នកប្រព្រិឹត្តមែន ឬមិនប្រព្រឹត្ក៏ថាបាន ។
ជាគោលការណ៍របស់លោកស្នងការនគរបាលខេត្តបានបញ្ជាក់ថា បើរកឃើញថាមេប៉ុស្តិ៍រដ្ឋបាលនោះពិតជាមានកំហុស ក្នុងការប្រើអំពើហិង្សាទៅលើជនរងគ្រោះពិតមែន លោកស្នងការនិងចាត់ការតាមផ្លូវច្បាប់ ដោយមិនយោគយល់ឡើយ ។ គួររំលឹកថា ៖ ជនរងគ្រោះដេកដង្ហោយរកយុត្តិធម៌…មេប៉ុស្តិ៍និងកូនប្រុសជាប់ចោទបដិសេធ
ចែករំលែកព័តមាននេះ