សត្វលោកទាំងអស់សូមកុំមានពៀរនឹងគ្នា ចូរជាអ្នករស់នៅដោយសុខចុះ ព្រោះថាទាំងគ្រហស្ថ ទាំងបព្វជិត ទាំងអ្នកមាន ទាំងអ្នកក្រសុទ្ធតែជាអ្នកប្រាថ្នាសេចក្តីសុខដូចៗគ្នា ដោយហោចទៅសូម្បីតែជរា ខ្វិន ខ្វង់ និងចោរ លួច ឆក់ ប្លន់ក៏ចង់បានសេចក្ដីសុខដែរ។ តែទោះជាយ៉ាងណាសេចក្ដីសុខដែលកើតឡើង ព្រោះតែការបៀតបៀនមនុស្សសត្វទាំងឡាយ សេចក្ដីសុខនោះលោកចាត់ថាជាសេចក្ដីសុខក្លែងក្លាយ សេចក្ដីសុខមិនពិតប្រាកដឡើយ ។
តាមពិតទៅសេចក្ដីសុខមានច្រើនបែបណាស់ តែបើនិយាយដោយបំព្រួញមានតែ៣ប្រការប៉ុណ្ណោះគឺៈ
១-សុខព្រោះការសរសើរបានដល់ការរស់នៅប្រកបដោយគុណតម្លៃទាំងសីលធម៌ សុជីវធម៌ កិត្តិយស សេចក្តីថ្លៃថ្នូរ បូករួមទាំងមុខរបរចិញ្ចឹមជីវិតសុចរិតផងដែរ ។
២-សុខព្រោះមានភោគៈគឺទ្រព្យសម្បត្តិដែលបានមកនោះប្រកបដោយកម្លាំងញើសឈាម ការងារសុចរិតពិតៗ មិនបានទៅកេងប្រវ័ញ្ចអ្នកណាឡើយ ។
៣-សុខព្រោះបាននូវសម្បត្តិសុគតិ ដោយអំណាចនៃការរស់នៅប្រកបដោយជីវិតសីលធម៌ សុវជីវធម៌នេះ ពេលទម្លាយខន្ធទៅ បានទៅបដិសន្ធិក្នុងសុគតិភព ។
បុគ្គលទាំងឡាយបើចង់បានសុខពិតប្រាកដនោះ គប្បីប្រព្រឹត្តតែអំពើល្អ កុំបៀតបៀនគ្នា កុំឈ្នានីសគ្នា កុំញុះញង់ កុំនិយាយមួលបង្កាច់បង្ខូចកេរ្តិ៍អ្នកដទៃ បើធ្វើបែបនេះបានមែននោះយើងនឹងបាននូវសេចក្ដីសុខពិតប្រាកដមិនខានឡើយ ។
ព្រះពុទ្ធសាសនាអប់រំមនុស្សឱ្យជឿប្រកបដោយបញ្ញាទើបបានសុខពិតប្រាកដ កុំចេះតែជឿដោយគ្រាន់តែឮ គ្រាន់តែអាងក្បួនច្បាប់ ឬគ្រាន់តែអាងលើអ្នកបួសនោះ ជាជំនឿមិនមានហេតុផលអ្វីឡើយ ។
ចែករំលែកព័តមាននេះ