រាជធានីភ្នំពេញ ៖ ជនសង្ស័យម្នាក់ក្នុងចំណោមពីរនាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពឆក់ទូរស័ព្ទដៃពីបុរសម្នាក់វ័យ៣៥ឆ្នាំ ដែលកំពុងជិះម៉ូតូកង់បីឥណ្ឌាបានសម្រេច បណ្តាលឲ្យដួលម៉ូតូ និងក្រឡាប់ម៉ូតូកង់បីឥណ្ឌារបស់ជនរងគ្រោះ ហើយក្រុមជនសង្ស័យក៏បាននាំគ្នាងើបរត់ចោលម៉ូតូ បង្កឲ្យមានការណ៍ភ្ញាក់ផ្អើលឡើងកាលពីវេលាម៉ោង១២អធ្រាត្រថ្ងៃទី២៨ ខែមីនា…
រាជធានីភ្នំពេញ ៖ ជនសង្ស័យម្នាក់ក្នុងចំណោមពីរនាក់ត្រូវបានសមត្ថកិច្ចចាប់ឃាត់ខ្លួន បន្ទាប់ពីធ្វើសកម្មភាពឆក់ទូរស័ព្ទដៃពីបុរសម្នាក់វ័យ៣៥ឆ្នាំ ដែលកំពុងជិះម៉ូតូកង់បីឥណ្ឌាបានសម្រេច បណ្តាលឲ្យដួលម៉ូតូ និងក្រឡាប់ម៉ូតូកង់បីឥណ្ឌារបស់ជនរងគ្រោះ ហើយក្រុមជនសង្ស័យក៏បាននាំគ្នាងើបរត់ចោលម៉ូតូ បង្កឲ្យមានការណ៍ភ្ញាក់ផ្អើលឡើងកាលពីវេលាម៉ោង១២អធ្រាត្រថ្ងៃទី២៨ ខែមីនា ឆ្នាំ២០១៩ ត្រង់ចំណុចខាងលិចស្តុបពេទផន តាមបណ្ដោយផ្លូវ១៨២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។
ជនសង្ស័យខាងលើមានឈ្មោះ និត អាយុ២០ឆ្នាំ មុខរបរ និងកន្លែងស្នាក់នៅមិនពិតប្រាកដ ។ ចំណែកឯបក្សពួកម្នាក់ទៀតបានរត់គេចខ្លួនបាត់ស្រមោល ។
បើតាមសម្តីពីបុរសជាអ្នកបើកម៉ូតូកង់បីឥណ្ឌាបានរៀបរាប់ប្រាប់ឲ្យដឹងថា នៅមុនពេលកើតហេតុគាត់បានបើកម៉ូតូកង់បីមួយគ្រឿងម៉ាកបាចា ពណ៌ស ដោយបុរសជនរងគ្រោះជាភ្ញៀវរួមដំណើរខាងក្រោយ គឺគាត់ដឹកជនរងគ្រោះចេញមកពីផ្សារដីហុយបំណងទៅផ្ទះមិត្តភក្តិរបស់ជនរងគ្រោះ នៅឯស្តុបពេទផន ដែលបានធ្វើដំណើរតាមបណ្ដោយ១៨២ ក្នុងទិសដៅពីលិចទៅកើត ។ លុះមកដល់ចំណុចកើតហេតុក៏ស្រាប់តែលេចមុខក្រុមជនសង្ស័យចំនួនពីរនាក់ជិះម៉ូតូមួយគ្រឿងម៉ាកហុងដាឌ្រីម ស៊េរី០១៣ ពណ៌ខ្មៅ ដែលជិះតាមមកពីក្រោយរួចក៏ធ្វើសកម្មភាពឆក់ទូរស័ព្ទដៃមួយគ្រឿងម៉ាក Iphone 7plas ពីដៃរបស់ជនរងគ្រោះដែលកំពុងកាន់ តែដោយសារបុរសរងគ្រោះកាន់ជាប់ក៏ទាញទូរស័ព្ទយកមកវិញទើបធ្វើឲ្យម៉ូតូជនសង្ស័យដួលចូលក្រោមម៉ូតូកង់បី បណ្តាលឲ្យម៉ូតូកង់បីក្រឡាប់ផ្ងារជើងរងការខូចខាតបន្តិចបន្តួច ប៉ុន្តែមិនបង្កឲ្យមានអ្នករងរបួសនោះទេ ។
ភ្លាមៗនោះជនសង្ស័យទាំងពីរនាក់ខាងលើក៏បានរើសយកទូរស័ព្ទដៃរបស់ជនរងគ្រោះដែលជ្រុះ រួចនាំគ្នារត់គេចខ្លួនចោលម៉ូតូបាត់ស្រមោល ។ ប្រភពដដែលបានបន្តថា បន្ទាប់មកក៏មានសមត្ថកិច្ចមូលដ្ឋានបានចុះមកអន្តរាគមន៍ដល់កន្លែងកើតហេតុ រួចក៏នាំទាក់ទងហៅកម្លាំងជិះតាមរកជនសង្ស័យពីរនាក់ភ្លាមៗតែម្តង ។
ក្រោយមកកម្លាំងសមត្ថកិច្ចក៏បានស្វែងរកឃើញ ឃាត់ខ្លួនជនសង្ស័យខាងលើបានម្នាក់ បន្ទាប់ពីជនសង្ស័យខាងលើបានផ្លោះរបងរត់គេចចូលទៅសង្ងំលាក់ខ្លួននៅក្នុងក្លឹបហាត់ប្រាណមួយកន្លែង តាមបណ្ដោយផ្លូវលេខ២៥៣កែង និងផ្លូវលេខ១៦០ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។
ក្រោយពេលកើតហេតុជនសង្ស័យរួមជាមួយវត្ថុតាងត្រូវបានសមត្ថកិច្ចនាំខ្លួនយកទៅសួរនៅប៉ុស្តិ៍នគរបាលរដ្ឋបាលទឹកល្អក់ទី៣ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោករង់ចាំធ្វើចាត់ការទៅតាមនីតិវិធី ៕
ចែករំលែកព័តមាននេះ