ស្វែងយល់ចំណុចពិសេស4យ៉ាងពីចាន់ រតនា ដើម្បីជាតិ និងកីឡា
- ភ្នំពេញ
រាជធានីភ្នំពេញ ៖ ក្នុងចំណោមកីឡាករ ប្រដាល់កម្ពុជាល្បីឈ្មោះ គេកត់សម្គាល់ថា កីឡាករចាន់ រតនា មានចំណុចពិសេស ៤យ៉ាងខុសប្លែកពីគេធ្វើឱ្យរូបគេក្លាយជាកីឡាករ ជួរមុខ…
រាជធានីភ្នំពេញ ៖ ក្នុងចំណោមកីឡាករ ប្រដាល់កម្ពុជាល្បីឈ្មោះ គេកត់សម្គាល់ថា កីឡាករចាន់ រតនា មានចំណុចពិសេស ៤យ៉ាងខុសប្លែកពីគេធ្វើឱ្យរូបគេក្លាយជាកីឡាករ ជួរមុខ…
រាជធានីភ្នំពេញ ៖ ក្នុងចំណោមកីឡាករ ប្រដាល់កម្ពុជាល្បីឈ្មោះ គេកត់សម្គាល់ថា កីឡាករចាន់ រតនា មានចំណុចពិសេស ៤យ៉ាងខុសប្លែកពីគេធ្វើឱ្យរូបគេក្លាយជាកីឡាករ ជួរមុខ ។ ចំណុចពិសេសទាំង៤នោះគឺចាន់ រតនា ជាកីឡាករដែលវិវត្តពីក្បាច់គុនច្រើនប្រភេទខុសគ្នាហើយនៅតែល្បីុ, ជាម្ចាស់ក្លិបប្រដាល់, ជាកីឡាករខ្មែរតែម្នាក់ដែលមានភរិយាជាជនជាតិបារាំង និងជាកីឡាករដែលបណ្ដុះឆន្ទៈភរិយា និងកូនស្រីឱ្យចង់រស់នៅស្រុកខ្មែរតាមខ្លួននិងស្រឡាញ់ក្បាច់គុនប្រដាល់។
យោងតាមភាពជាក់ស្ដែង គេសុទ្ធតែដឹងថា ចាន់ រតនា ផ្ដើមចេញពីកីឡាករប្រដាល់គុនខ្មែរ តែដោយសារតែលោកមានឪពុកជាគ្រូយុទ្ធក្រម ខម លោកក៏ក្លាយជាកីឡាករល្បីឈ្មោះផ្នែកយុទ្ធក្រមខម ដោយបានទាំងសម្ដែងរឿងធ្វើជាតួឯក ហើយមានឈ្មោះបោះសំឡេងផង ។ មិនយូរប៉ុន្មានលោកក៏ត្រូវបានសមាគមខ្មែរនៅប្រទេសបារាំងធានាឱ្យទៅបង្វឹកនៅប្រទេសអឺរ៉ុប ហើយ ក៏បានជួបភរិយាជាជនជាតិបារាំងសព្វថ្ងៃ ដោយក្រោយពេលសេពគប់គ្នា នាងក៏ចុះមករកស៊ីនៅកម្ពុជា ហើយបានចាប់ដៃគ្នារួមរស់ជាប្ដីប្រពន្ធតែម្ដង ។ មកដល់បច្ចុប្បន្ន លោកបានវិវត្តន៍ខ្លួនក្លាយជាកីឡាករក្បាច់គុនចម្រុះប្រដាល់ដាក់ទ្រុង ដោយទីផ្សាររបស់លោកគឺនៅតែល្បី និងមានហាងឆេងនៅសង្វៀនក្រៅប្រទេស ។
អីុចឹង ហើយទើបគេចាត់ទុកថា ចាន់ រតនា មានលក្ខណៈពិសេសខុសគេមួយគឺមានជំនាញច្រើនប្រភេទ ហើយថែមទាំងនៅតែជោគជ័យគួរឱ្យកត់សម្គាល់។ ចំណុចមួយទៀតដែលអ្នកគាំទ្រកោតសរសើរមិនដាច់ពីមាត់ គឺទោះជាលោកមានភរិយាមាន មុខរបរបើកហាងធំដុំមួយនៅភ្នំពេញទៅហើយ ក៏លោកនៅតែងប់ងុលនឹងអាជីពប្រដាល់ ដោយ បានចំណាយទុន និងពេលវេលាបើកក្លិបបង្វឹកកូនខ្មែរជារៀងរាល់ថ្ងៃ ដើម្បីចែករំលែកចំណេះជំនាញ ។ លោកបានបង្ហាត់ពីក្បាច់គុនសម្រាប់ចូលប្រឡូកក្នុងការប្រកួតនៅONE Championship ដោយដើរតួជាម្ចាស់ក្លិបផង និងជាគ្រូបង្វឹកផង ។ លោកត្រូវគេកត់សម្គាល់ថា ស្ទើរតែពលីនឹងអាជីពប្រដាល់មួយនេះ ដោយមិនខ្វល់ពីមុខជំនួញភរិយាជនជាតិបារាំងនិងគម្រោងចេញទៅរស់នៅប្រទេសបារាំង។
កីឡាកររូបនេះរឹតតែធ្វើឱ្យអ្នកគាំទ្រចងចាំ គឺលោកនៅតែទទួលប្រកួត បើទោះជាលោកសារភាពថាខ្លួនមានវ័យជ្រេ និងខ្សោយកម្លាំងជាងមុនទៅហើយ ។ ចាន់ រតនា រមែងបង្ហាញ សមត្ថភាពយ៉ាងកក្រើកក្នុងការប្រកួតរបស់គេ ដោយការប្រកួតនៅទីក្រុងកូឡាឡាំពួ ប្រទេស ម៉ាឡេស៊ី កាលពីពេលកន្លងទៅ ត្រូវបានចាត់ទុកថា សមត្ថភាពដែលគេធ្វើបាននៅតែខ្លាំង និងទាក់ទាញមិនធម្មតា។
ស្របពេលដែលព្រឹត្តិការណ៍ ONE Championship កំពុងតែកើបប្រជាប្រិយភាពបានយ៉ាងធំធេងនោះផង ទើបការបង្ហាញខ្លួនទទួលប្រកួតរបស់ចាន់ រតនា នៅតែធ្វើឱ្យអ្នកគាំទ្រយល់ថា លោកពិតជាកីឡាករជើងចាស់ដែលមានទេពកោសល្យ និងរក្សាបានកម្លាំងខុសពីវ័យរបស់កីឡាកររួមជំនាន់។
ចំណុចចុងក្រោយដែលអ្នកកីឡា និងមហាជន កោតសរសើរមិនដាច់ពីមាត់នោះគឺចាន់ រតនា មានទឹកចិត្តស្រឡាញ់ប្រទេសកំណើតរបស់ ខ្លួន អាចអន្ទងទឹកចិត្តភរិយាគឺអ្នកស្រីCindy Couponលែងចង់ទៅរស់នៅប្រទេសបារាំងវិញ និងរមែងបណ្ដុះកូនស្រីទាំង២ឱ្យស្គាល់ពីវប្បធម៌ ខ្មែរជាពិសេសក្បាច់គុនបុរាណខ្មែរ។
ចាន់ រតនា នៅតែប្រកាន់ជំហរថា៖«កូន ទី១របស់ខ្ញុំឈ្មោះ Lycia មានអាយុ១១ឆ្នាំ និងកូនទី២ឈ្មោះ Melody អាយុជិត៧ឆ្នាំ ហើយ ។ ជារឿយៗ ខ្ញុំមិនត្រឹមតែបង្រៀន គាត់ឱ្យស្គាល់អ្វីជាខ្មែរប៉ុណ្ណោះទេ សូម្បីតែក្បាច់ គុនប្រដាល់ក៏ខ្ញុំតែងឆ្លៀតពេលបង្រៀនគាត់ឱ្យយល់ដឹងពីក្បាច់គុនខ្មែរដែរ»។ លោក ពន្យល់ថា ៖ « ដោយសារតែកូនៗរបស់ខ្ញុំ កើតមក នៅជាមួយក្បាច់គុនរាល់ថ្ងៃ ក្បាច់គុនស្ថិតក្នុង ឈាមរបស់ពួកគេទៅហើយ ។ ទោះបីពួកគេមិនបានហ្វឹកហាត់ត្រឹមត្រូវក៏ដោយ តែពួកគេមាន ទេពកោសល្យខាងកីឡានេះ ។ ដូច្នេះ នៅពេលអនាគតវាងាយស្រួលសម្រាប់ពួកគេក្នុងការជ្រើសយកអាជីពកីឡានេះ ។
រាល់ថ្ងៃនេះ កូនស្រីច្បងចូលចិត្តហាត់ក្បាច់គុនជាងកូនស្រី ពៅ ។ Melody ហាត់តែពេលគាត់ចង់ ប៉ុណ្ណោះ ។ គាត់ចូលចិត្តហាត់និងលេងជាមួយខ្ញុំ តែពេលខ្លះខ្ញុំអស់កម្លាំងពេកមិនអាចហាត់ឬលេងជាមួយគាត់បាន គាត់មិនដែលនឿយណាយ ទេ »។
ពេញមួយអាជីពរបស់ខ្លួន ចាន់ រតនា បានប្រឡូកក្នុងការប្រកួតគុនខ្មែរនិងគុនចម្រុះដ៏ពិបាកៗជាច្រើនប្រកួតតែមិនដែលសន្លប់ឡើយហើយគ្រួសាររបស់គេតែងតែគាំទ្រជានិច្ច ។ រតនា បញ្ជាក់ថា ៖ « ខ្ញុំគិតថា ពួកគាត់បារម្ភ ពីខ្ញុំនៅពេលខ្ញុំប្រកួត ប៉ុន្តែវាមិនអីទេ ។ ប្រពន្ធ ខ្ញុំបានប្រាប់ខ្ញុំថា នៅពេលកូនៗឃើញខ្ញុំវ៉ៃ និង ហូរឈាម ពួកគេភ័យហើយស្រែកថា [ប៉ាៗ ចូលចាប់គេទៅ ! ចូលទៅៗ !] ។ តែឥឡូវ ពួកគេបានឃើញខ្ញុំប្រកួតច្រើនដងណាស់ ហើយខ្ញុំ គិតថា ពួកគេលែងភ័យទៀតហើយ ។ ឪពុក របស់ពួកគេជាអត្តពលិកម្នាក់ ដូច្នេះពួកគេត្រូវតែស៊ាំនឹងស្ថានភាពនេះ »។
ចំណុចទាំង៤ខាងលើនេះសុទ្ធតែជាអ្វីដែល ចាន់ រតនា បានធ្វើហើយត្រូវបានចាត់ទុកថាជាការលះបង់មួយគួរឱ្យសរសើរបើធៀបនឹងកីឡាករ ផ្សេងទៀតដែលមានឱកាសក្លាយជាបុគ្គលមានជីវភាពល្អប្រសើរដូចលោកទៅហើយនោះ។
គួរបញ្ជាក់ថា ចាន់ រតនា កើតនៅជំរំជន ភៀសខ្លួនក្នុងប្រទេសថៃ អំឡុងពេលកម្ពុជាមាន សង្គ្រាមស៊ីវិល ហើយគេបានកែប្រែជីវិតតាម រយៈក្បាច់គុន ដោយលោកប្រកាសថា បើទោះ ជាលោកមិនមានកូនប្រុស តែលោកក៏មានបំណងចង់ឱ្យកូនស្រីរបស់លោកធ្វើជាអ្នកប្រដាល់ផងដែរ ខណៈដែលកូនស្រីទាំងពីរក៏ប្រាប់លោកថា ពួកគេចង់វ៉ៃលើរេញដូចលោកផងដែរ បើលោកគាំទ្រពួកគេ១០០% ៕
ចែករំលែកព័តមាននេះ