ខេត្តកំពង់ចាម ៖ វត្តភ្នំហាន់ជ័យមានទីតាំងអំណោយផលល្អលើកំពូលភ្នំ ដោយបានស្ថិតនៅប្របតាមដងទន្លេមេគង្គ ក្នុងឃុំហាន់ជ័យ ស្រុកកំពង់សៀម ដែលគេជឿមានបារមីពូកែសក្តិសិទ្ធ សូម្បីតែយន្តហោះធ្លាប់បានទម្លាក់គ្រាប់ប៉ងកម្ទេចចោលក៏មិនបានកម្ទេចបានដែរ ។ ហើយនៅសព្វថ្ងៃនេះគេបានសង្កេតឃើញមានប្រជាពលដ្ឋគ្រប់ស្រទាប់វណ្ណៈ មកពីគ្រប់ទិសទីបានបែរបន់បួងសួងសុំសេចក្តីសុខក្នុងគ្រួសារ និងប្រាថ្នាប៉ងអ្វីមួយ គឺបានសម្រេចតាមបំណងមែន ។
លោកម៉ន ខុន វ័យ៦០ឆ្នាំ នៅភូមិបុសពោធិ ឃុំមេសជ្រៃ ស្រុកស្ទឹងត្រង់ បានឲ្យដឹងនៅព្រឹកថ្ងៃទី២៧ មីនា ២០១៩ថា នៅព្រឹកព្រលឹមស្រាងៗគាត់ និងប្រពន្ធបាននាំគ្នាជិះម៉ូតូចេញពីផ្ទះមកសែនផ្នូរឪពុកម្តាយនៅវត្តបឹងស្នាយ សង្កាត់សំបួរមាស ក្រុងកំពង់ចាម ដោយបានធ្វើទៅតាមប្រពៃណីរាល់ឆ្នាំមិនដែលអាក់ខានម្តងណាឡើយ ។ បន្ទាប់មកពួកគាត់បាននាំគ្នាជិះម៉ូតូត្រឡប់មកផ្ទះវិញតាមផ្លូវមាត់ទន្លេមេគង្គ រួចបានឈានចូលសម្រាក់ពិសាបាយ នៅក្រោមរោងមួយក្នុងវត្តភ្នំហាន់ជ័យ ដើម្បីឲ្យមានកម្លាំង ហើយនឹងបន្តដំណើរទៅមុខទៀត ។
លោកម៉ន ខុន បន្តថា រូបលោក និងប្រពន្ធបានយកបច្ច័យខ្លះមកចូលបុណ្យសម្រាប់ទុកកសាងសមិទ្ធិផលនានាក្នុងទីអារាម ហើយក៏បានប្រាថ្នាសុំសេចក្តីសុខជារឿយៗ គឺបានសម្រេចមែនហេតុ ដូច្នេះហើយបានជារូបលោកបានមកវត្តភ្នំហាន់ជ័យនេះ ។ កាលពីមុនៗនៅក្នុងបរិវេណវត្តមិនសូវមានអ្វីប្លែកច្រើនទេ តែមកដល់សព្វថ្ងៃក្រោមការដឹកនាំរបស់ព្រះចៅអធិការវត្ត បានយកព្រះទ័យប្រឹងកសាងក្នុងនោះឃើញមានសមិទ្ធិផលច្រើនស្ទើរពេញបរិវេណវត្តទៅហើយ និងមានមនុស្សនាំគ្នាមកលេងរាល់ថ្ងៃមិនដាច់ផងដែរ ។
តាមរយៈការបែរបន់កន្លងមកក្រុមគ្រួសាររបស់គាត់ (ម៉ន ខុន ) បានសេចក្តីសុខរហូតមកហើយការង្កើនផលដំណាំស្វាយចន្ទី និងដំឡូងមី ផលដែលបានមក គឺបានដោះស្រាយជីវភាពគ្រួសារសមល្មម និងសល់ថវិកាមួយចំនួនសម្រាប់ធ្វើបុណ្យផងដែរ ។
លោកតា ហួន ឈាងលី វ័យ៧២ឆ្នាំ ដែលជាចាស់ទុំនៅវត្តហាន់ជ័យ មានប្រសាសន៍ឲ្យដឹងថាចាប់តាំងពីពេលដែលគាត់មកនៅវត្តនេះបានរយៈពេល៤ឆ្នាំ បានឃើញប្រជាពលរដ្ឋខ្លះមកបែរបន់សុំឲ្យមានកូន និងសេចក្តីសុខសាន្តក្នុងក្រុមគ្រួសារក៏បានដូចសេចក្តីប្រាថ្នាមែន បន្ទាប់មកអ្នកបួងសួងនោះបានយករបស់របរមកលាបំណន់ និងបានចូលបច្ច័យសម្រាប់កសាងនូវសមិទ្ធិផលផ្សេងៗក្នុងទីអារាមមានតាំងពីឧកញ៉ាផងដែរ ។
លោកតាឈាង លី បានរំលឹកថា កាលពីក្នុងសម័យលន់ ណុល មានយន្តហោះបានមកទម្លាក់គ្រាប់ណាប៉ាល់ពីលើអាកាស ដើម្បីប៉ងកម្ទេចវត្តភ្នំហាន់ជ័យចោលទាំងស្រុង តែមិនបានកម្ទេចបាននោះទេ ដោយមានបារមីពូកែសក្តិសិទ្ធិ ដោយគ្រាន់តែធ្វើឲ្យព្រះបដិមារក្នុងព្រះវិហារបានរោលឡើងខ្មៅតែប៉ុណ្ណោះ ។ ហើយមកដល់សព្វថ្ងៃនូវតែមានប្រជាពលរដ្ឋមកពីគ្រប់ទិសទីបានជំនឿនាំគ្នាមកបែរបន់សុំសេចក្តីសុខ និងប្រាថ្នាផ្សេងៗ តែងតែបានសម្រេចតាមដូចចិត្តមែន ៕
ចែករំលែកព័តមាននេះ