រាជធានីភ្នំពេញ ៖ ស្ត្រីម្នាក់ជាកម្មករសំណង់ សង្ស័យលោតពីលើខុនដូជាន់ទី១១ សម្លាប់ខ្លួនឯង ឬក៏រអិលជើងធ្លាក់ចំលើពំនូកខ្សាច់ បណ្តាលឲ្យបាក់កស្លាប់បង្កឱ្យមានការភ្ញាក់ផ្អើលកាលពីម៉ោង12អធ្រាត្រ ថ្ងៃទី២៧ ខែមីនា ឆ្នាំ២០១៩ តាមបណ្តោយផ្លូវ១៦៣ នៅចំណុចខុនដូកំពុងតែសាងសង់នៅទល់មុខវត្តមហាមន្ត្រី ស្ថិតក្នុងសង្កាត់អូឡាំពិក ខណ្ឌចំការមន ។
បើតាមសាក្សីឃើញហេតុការណ៍បានឱ្យដឹងថា មុនពេលកើតហេតុ គេបានឃើញស្ត្រីម្នាក់ជាជនរងគ្រោះមិនស្គាល់អត្តសញ្ញាណវ័យជាង30ឆ្នាំមិនដឹងថា គាត់មានវិបត្តិរឿងគ្រួសារ ឬមួយសង្សារនោះទេ បានជាសម្រេចចិត្តលោតពីលើអគារខុនដូជាន់ទី១១ ឬក៏រអិលជើងធ្លាក់មកចំពំនូកដីខ្សាច់នៅមុខខុនដូ បណ្តាលឱ្យបាក់កស្លាប់គួរឲ្យអាណោចអាធ័មនៅកន្លែងកើតហេតុ។
សមត្ថកិច្ច និងប្រជាពលរដ្ឋបានលើកឡើងថា ខុនដូនេះមិនមែនជាលើកទីមួយនោះទេ ដែលមនុស្សលោតសម្លាប់ខ្លួន គឺកន្លងមកធ្លាប់មានកម្មករសំណង់ផឹកស៊ីស្រវឹងស្រាវាយគ្នាផ្អើល និងលោតពីលើខុនដូសម្លាប់ខ្លួនផងដែរ ។
ចំពោះករណីខាងលើនេះ សមត្ថកិច្ចកំពុងតែស្រាវជ្រាវ ប៉ុន្តែមិនទាន់ដឹងថា ជាករណីឃាតកម្ម ឬករណីលោតសម្លាប់ខ្លួននោះទេ ហើយសពជនរងគ្រោះខាងលើនេះ ត្រូវបានសមត្ថកិច្ចយកទៅដម្កល់នៅវត្តស្ទឹងមានជ័យ ដើម្បីរង់ចាំធ្វើកោសល្យវិច័យ ៕
ចែករំលែកព័តមាននេះ