រាជធានីភ្នំពេញ ៖ ដើម្បីកាត់បន្ថយគ្រោះថ្នាក់ចរាចរណ៍ផ្លូវគោកក្រសួងសារធាណៈការ និងដឹកជញ្ជូនបានបានធ្វើការផ្សព្វផ្សាយពី«សុវត្ថិភាពចរាចរណ៍ផ្លូវគោកដល់សិស្សប្រមាណ៣០០នាក់នៅអនុវិទ្យាល័យអភិវឌ្ឍន៍នៅក្នុងខេត្តកំពង់ឆ្នាំ ។ លោកពា គីមវងទីប្រឹក្សានៃកម្មវិធីសុវត្ថិភាពចរាចរណ៍ផ្លូវគោកនៃក្រសួងសាធារណៈការ និងដឹកជញ្ជូនបានលើកឡើងក្នុងពិធីផ្សព្វផ្សាយពីពេលថ្មីៗកន្លងមកនេះគោលបំណងនៃការអប់រំ និងផ្សព្វផ្សាយនេះថា ការរៀបចំឱ្យមានការអប់រំ និងផ្សព្វផ្សាយ ស្តីពីសុវត្ថិភាពចរាចរណ៍ផ្លូវគោកនៅពេលនេះ គឺក្នុងគោលបំណងចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកដែលបានកំពុងគំរាបកំហែងអាយុជីវិតអ្នកប្រើប្រាស់ផ្លូវ និងធ្វើឱ្យមានការរាំងស្ទះដល់កិច្ចអភិវឌ្ឍន៍ប្រទេសជាតិផងដែរ ។
លោកបានបន្ថែមថា កម្មវិធីនេះនឹងបន្តអប់រំដល់ប្រជាពលរដ្ឋដែលរស់នៅតាមបណ្តោយខ្សែរផ្លូវរួមទាំងសិស្សានុសិស្សដែលរៀននៅតាមសាលានៅជាប់ដងផ្លូវផងដែរ ។ លោកពា គីមវងបានសំណូមពរឱ្យអ្នកប្រើប្រាស់ផ្លូវទាំងអស់ត្រូវយកចិត្តទុកដាក់ចំពោះសុវត្ថិភាពចរាចរណ៍ផ្លូវគោល ពិសេសគោរពច្បាប់ស្តីពីចរាចរណ៍ផ្លូវគោកគ្រប់ពេលពិសេស ការបើកបរហួសល្បឿនកំណត់ការបើកបរក្រោយពេលហូបគ្រឿងស្រវឹង និងការគោរពសិទ្ធិអាទិភាព និងបញ្ហាជាច្រើនទៀត បើទោះបីថ្ងៃនេះលោកបានលើកយកមូលហេតុគ្រោះថ្នាក់តែពីរមកចែករំលែកក្តី (ការបើកហួសល្បឿនកំណត់ និងការប្រើប្រាស់ មួកសុវត្ថិភាព) តែបានសំណូមពរឱ្យប្អូនៗត្រូវស្វែងយល់បន្ថែមតាមរយៈឯកសារដែលបានចែកជូន ដើម្បីជាបំណិនជីវិតទៅថ្ងៃអនាគត ។
ចំណែកលោក អ៊ុន ទីម នាយកអនុវិទ្យាល័យអភិវឌ្ឍន៍បានប្រសាសន៍ថា បច្ចុប្បន្នលោក សង្កេតឃើញថា គ្រោះថ្នាក់ចរាចរណ៍បានសម្លាប់មនុស្សស្ទើរជារៀងរាល់ថ្ងៃ ហើយប៉ុន្មានថ្ងៃ កន្លងទៅនេះ ប្រជាពលរដ្ឋដែលរស់នៅក្បែរសាលានេះបានទទួលរងគ្រោះថ្នាក់ចរាចរណ៍ផ្លូវគោកនៅលើផ្លូវនេះ ដែលបណ្តាលឱ្យបាត់បង់អាយុជីវិតទៀតផង ។ ជាមួយគ្នានេះដែរលោកតែងក្រើនរំលឹកដល់ក្មួយៗសិស្សានុសិស្សឱ្យយកចិត្តទុកដាក់គោរពច្បាប់ចរាចរណ៍ផ្លូវគោកនិងមានការប្រុងប្រយ័ត្នពេលធ្វើដំណើរទៅ និងមកសាលារៀន ៕
ចែករំលែកព័តមាននេះ