បន្ទាយមានជ័យ ៖ ថ្វីត្បិតកាលពីថ្ងៃ និងយប់ទី២៦ឈានដល់ព្រឹកថ្ងៃទី២៧ មីនានេះ ពុំមានភ្លៀងធ្លាក់ទៀតទេ ប៉ុន្តែចំណតរថយន្តក្រុងប៉ោយប៉ែត និងចំណតរថយន្តធំ (បេនចាន) នៅតែមិនអាចដំណើរការបានព្រោះ ចំណតរថយន្តក្រុងជំនន់ទឹកភ្លៀងមិនទាន់រីងអស់ ឯចំណតបេនចាន មានតែភក់ និងសំរាម ។ រថយន្តតូចធំចតត្រៀបត្រា តាមដងផ្លូវជាតិ និងផ្លូវបេតុងចាប់ម៉ូយ និងលើកដាក់ទំនិញ ដើម្បីដឹកចេញទៅតាមបណ្តាខេត្តក្រុងនានាធ្វើឲ្យអ្នកស្រុករិៈគន់ព្រោះក្រុងមួយនេះ មានតែចំណត តែរាល់ក្រោយភ្លៀងធំម្តងៗមិនអាចចូលចតបាន និងស្ទើរក្លាយជាទម្លាប់មិនអាចកែប្រែបានទៅហើយ ។
ចំណត់រថយន្តក្រុងមានទាំងស្ថានីយរង់ចាំភ្ញៀវទេសចរណ៍អន្តរជាតិហៅថា ចំណត OSP និងស្ថានីយដឹកអ្នកដំណើក្នុងប្រទេស ។ ចំណតមួយនេះរាល់ពេលជំនន់ទឹកភ្លៀងលិចម្តងៗអ្នកគ្រប់គ្រោងចំណតប្រើប្រាស់ម៉ាស៊ីនបូមទឹកចេញ តែពេលខ្លះទឹកមិនអាចរីងបានភ្លាមៗឡើយព្រោះចំណតមួយនេះទាបជាងបរិវេណជិតខាង ហើយករណីនេះដរាបណាជំនន់ទឹកភ្លៀងបរិវេណជុំវិញរីងអស់ ទើបការប្រើប្រាស់ម៉ាស៊ីនបូមទឹកមានប្រសិទ្ធភាព ។
ជាក់ស្តែងដូចកាលពីថ្ងៃ និងយប់ទី២៦រហូតដល់ព្រឹកថ្ងៃទី២៧ មីនានេះ តែម្តងជំនន់ទឹកភ្លៀងក្នុងចំណតមានទឹកនៅឡើយ ហើយខ្មៅកខ្វក់ទៀតផង ។ ភ្ញៀវទេសចរណ៍បរទេសដែលឆ្លងព្រំដែនចូលមកកម្ពុជាតាមច្រកទ្វារអន្តរជាតិប៉ោយប៉ែតចំវេណចំណតផ្លូវខ្លី ពីចំណុចរង្វង់មូលច្រកទ្វារទៅកាន់ក្រុមហ៊ុន OSP គឺមិនអាចទៅរួចឡើយ ភ្ញៀវត្រូវដឹក Direct ទៅតាមគោលដៅតែម្តង មិនអាចចូលចំណត OSP បានឡើយព្រោះត្រូវជំនន់ទឹកភ្លៀជន់លិចទៅហើយ ខណៈរថយន្តតូច និងរថយន្តក្រុងប្រភេទ៤៥កៅអី ដឹកអ្នកដំណើរក្នុងប្រទេសក៏ដូចគ្នាដែររាល់ពេលជំនន់ទឹកភ្លៀងលិចចំណត គឺចតតាមដងផ្លូវបេតុង និងផ្លូវជាតិត្រៀបត្រាលើកដាក់ទំនិញ និងចាប់ម៉ូយយ៉ាងអាណាធិបតេយ្យតែម្តង ។
ដោយឡែកចំណតរថយន្តធំហៅចំណតបេនចានក៏ជន់លិចលង់រាល់ឆ្នាំហើយគ្មានការអភិវឌ្ឍដូចគ្នាក្រោយភ្លៀងរាំងទឹករីងអស់ បើរថយន្តធំចូលលើកដាក់ទំនិញ គឺរថយន្តត្រូវនាំភក់ល្បាប់តាមកង់ឡើងដងផ្លូវ ព្រោះចំណតនេះមានតែដីសុទ្ធសាត ។
ពាក់ព័ន្ធករណីនេះលោកឈឿន សេរីវុធ ប្រធានមន្ទីរទេសចរណណ៍ខេត្តប្រាប់តាមទូរស័ព្ទថា ចំណតរថយន្តខាងលើ គឺគ្រប់គ្រោងដោយក្រុមហ៊ុនមួយរបស់លោក ផាន់សុមន្ថា ដែលមានកុងត្រាជាមួយអាជ្ញាធរខេត្ត ហើយលោកទទួលស្គាល់ថា ចំណតមួយនេះរាល់ក្រោយភ្លៀងធ្លាក់ធំៗតែងមានជំនន់ទឹកភ្លៀងប៉ះពាល់ដល់ជើងដំណើរភ្ញៀវមិនថា ភ្ញៀវជាតិ ឬបរទេសមិនអាចចូលចំណតបានឡើយ ។
លោកផាន់ សុមន្ថា និងប្រធានក្រុមហ៊ុនផាន់លក្ខិណា មិនអាចស្វែងរកការសាកសួរបំភ្លឺបានឡើយ ព្រោះមិនស្គាល់លេខទូរស័ព្ទ ម្យ៉ាងពេលភ្នាក់ងារកោះសន្តិភាពជួបបុគ្គលិកបម្រើ ការងារ២នាក់នៅចំណតនេះអះអាងថា មិនស្គាល់លេខទូរស័ព្ទមេរបស់ខ្លួន ៕
ចែករំលែកព័តមាននេះ