ខេត្តព្រះវិហារ ៖ នៅព្រឹកថ្ងៃទី១១ មេសា លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានដឹកនាំប្រតិភូជានាយទាហានជាន់ខ្ពស់ក្រសួងការពារជាតិជាច្រើននាក់ នាំយកអំណោយជាគ្រឿងឧបភោគ បរិភោគ ភេសជ្ជៈ និងថវិកាទៅសួរសុខទុក្ខកងកម្លាំងដែលកំពុងឈរជើងការពារបូរណភាពទឹកដីនៅលើសមរភូមិជួរមុខទិសទី១ប្រាសាទព្រះវិហារ ក្នុងខណៈបុណ្យចូលឆ្នាំថ្មីប្រពៃណីជាតិ នឹងឈានមកដល់នាពេលឆាប់ៗខាងមុខនេះ។
លោកឧបនាយករដ្ឋមន្ត្រី ទៀ បាញ់ បានសំណេះសំណាលជាមួយនាយ-ពលទាហាននៅទីបញ្ជាការអង្គរក្សប្រចាំជួរមុខចំណុច៩៥ ក្បែរប្រាសាទព្រះវិហារ។ នៅទីនោះមានការទទួលបដិសណ្ឋារកិច្ចពីលោកនាយឧត្តមសេនីយ៍ ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ ជាមេបញ្ជាការអង្គរក្ស និងជាអនុប្រធានគណៈមេបញ្ជាការសមរភូមិទិសយោធភូមិភាគទី៤។ លោកឧបនាយករដ្ឋមន្ត្រីបានមានប្រសាសន៍សំណេះសំណាល និងប្រគល់គ្រឿងឧបភោគ បរិភោគ និងថវិកាជូនដល់អង្គភាពកងអង្គរក្សជានិមិត្តរូប ហើយក៏បានធ្វើដំណើរនាំយកកញ្ចប់ថវិកាឡើងទៅទីបញ្ជាការសន្តិភាពរបស់អគ្គបញ្ជាការចំណុច៥មករា ក្បែរជើងភ្នំទ្រព្យផងដែរ ដោយមានការទទួលស្វាគមន៍ និងធ្វើបដិសណ្ឋារកិច្ចពីលោកនាយឧត្តមសេនីយ៍ ជា តារា អគ្គមេបញ្ជាការរងនៃកងយោធពលខេមរភូមិន្ទ និងជាគណៈមេបញ្ជាការឯកភាពសមរភូមិជួរមុខទិសយោធភូមិភាគទី៤។
លោកនាយឧត្តមសេនីយ៍ ជា តារា បានមានប្រសាសន៍ស្វាគមន៍ដោយបានលើកឡើងជាច្រើនពីសភាពការណ៍រួមជុំវិញស្ថានការណ៍យោធាក្នុងតំបន់ព្រំដែន ពិសេសគឺនៅតំបន់ប្រាសាទព្រះវិហារដែលសៀមតែងតែបានបង្កនូវភាពអមិត្តមិនចេះចប់មកលើកម្ពុជា ជាក់ស្តែងនៅវេលាម៉ោងប្រហែល៦ព្រឹក ថ្ងៃទី១១ មេសា សៀមបានលួចយកទង់សាសនាមកបោះនៅចំណុចសំបុកឃ្មុំ ដែលជាកន្លែងហាមឃាត់ជាទ្វេភាគីកន្លងទៅថ្មីៗនេះ តែនៅពេលព្រឹកដដែលនោះដែរ បន្ទាប់ពីបានឃើញកម្លាំងកម្ពុជាដែលឈរជើងជិតនោះបានដក និងហែកទង់នោះចោល។ ទាំងអស់ខាងលើនេះហើយដែលសៀមនៅតែមានមហិច្ឆតាអាក្រក់ជានិច្ចមកលើកម្ពុជា។
លោកឧបនាយករដ្ឋមន្ត្រី ទៀ បាញ់ បានសម្តែងការកោតសរសើរយ៉ាងក្រៃលែង នូវវីរភាពដ៏អង់អាចក្លាហានរបស់នាយ-ពលទាហានទាំងអស់ដែលបានតស៊ូលះបង់គ្រប់បែបយ៉ាង ដើម្បីបុព្វហេតុជាតិ និងទឹកដី ជាក់ស្តែងនារដូវចូលឆ្នាំប្រពៃណីជាតិ ដែលនឹងឈានមកដល់នៅពេលឆាប់ៗខាងមុខ តែដោយឡែកចំពោះនាយ-ពលទាហានទាំងអស់គឺស្ថិតនៅលើសមរភូមិ។ លោកឧបនាយករដ្ឋមន្ត្រីក៏បានមានប្រសាសន៍ក្រើនរំលឹកដល់នាយ-ពលទាហានទាំងអស់ធ្វើយ៉ាងណាត្រូវមានការប្រុងប្រយ័ត្នខ្ពស់ មិនត្រូវធ្វេសប្រហែសក្នុងកាតព្វកិច្ចរបស់ខ្លួនឡើយទៅលើចោរសៀមឈ្លានពាន ព្រោះមហិច្ឆតារបស់សៀមវានៅតែបង្កគ្រប់រូបភាពក្នុងការឈ្លានពានអធិបតេយ្យភាពរបស់កម្ពុជា។ បន្ទាប់មកលោកឧបនាយករដ្ឋមន្ត្រី ទៀ បាញ់ បានដឹកនាំប្រតិភូអញ្ជើញឡើងទៅអុជធូបបួងសួងនៅលើពយតាឌី សុំសេចក្តីសុខ សេចក្តីចម្រើនពីបារមីលោកតាឌី និងបារមីប្រាសាទព្រះវិហារសុំជួយតាមថែរក្សាកងកម្លាំងកម្ពុជាទាំងអស់ដែលនៅទីនោះឱ្យទទួលបានជោគជ័យជានិច្ចទៅលើពួកសៀមឈ្លានពាន៕
ចែករំលែកព័តមាននេះ