ខេត្តប៉ៃលិន ៖ គ្រាន់តែចូលទៅដល់កន្លែងប្រជុំភ្លាម លោកជំទាវ ជា លាភ អភិបាលរងខេត្តប៉ៃលិន ហាក់បង្ហាញការខឹងជាមួយក្រុមអ្នកសារព័ត៌មាន ដោយបានស្តីអប់រំណែនាំទៅលើក្រុមអ្នកសារព័ត៌មានប្រចាំខេត្តប៉ៃលិនទាំងអស់ថា «ការចុះផ្សាយព័ត៌មានដូចជាគ្មានក្រមសីលធម៌ អត់មានវិជ្ជាជីវ: ចេះតែផ្សាយរឿងណាដែលខេត្តហាមឃាត់ ដូចជាករណីការដាក់តាំងពិព័រណ៍លក់ទំនិញថ្មីៗកន្លងទៅនេះ ដោយដាក់ចំណងជើងថា «ជារឿងចម្លែកទៅវិញ» ។
ហេតុការណ៍ ដែលលោកជំទាវ ជា លាភ អភិបាលរងខេត្ត បានស្តីបន្ទោសទៅលើក្រុមអ្នកសារព័ត៌មាននេះ ធ្វើឡើងកាលពីវេលាម៉ោង២រសៀលថ្ងៃទី២៦ មីនា ស្ថិតនៅក្នុងបន្ទប់ប្រជុំមន្ទីរព័ត៌មានខេត្តប៉ៃលិន ក្នុងកិច្ចប្រជុំស្តីពីការផ្សព្វផ្សាយព័ត៌មានពិត ឬមិនពិត ដោយមានការចូលរួមពីលោកស្រី ស្រ៊ី ចាន់អេង ប្រធានមន្ទីរព័ត៌មានខេត្តប៉ៃលិន និងអនុប្រធានមន្ទីរ បុគ្គលិកការិយាល័យនៃមន្ទីរព័ត៌មាន និងក្រុមអ្នកសារព័ត៌មានប្រចាំខេត្តប៉ៃលិនទាំងអស់ផងដែរ ។
សូមបញ្ជាក់ថា កាលពីថ្ងៃទី១៩ និង២៥ មីនា កន្លងទៅ អាជ្ញាធរខេត្តប៉ៃលិនបានអនុញ្ញាតឱ្យក្រុមហ៊ុនឯកជនមួយ យកកំណាត់ផ្លូវជាតិលេខ៥៧មួយចំហៀងផ្លូវប្រវែងជិត៣០០ម៉ែត្រ ស្ថិតនៅក្នុងភូមិវត្ត សង្កាត់ប៉ៃលិន ក្រុងប៉ៃលិន សង់រោងតាំងពិព័រណ៍លក់ទំនិញ ហើយក៏មានការិះគន់ខ្លាំងពីសំណាក់មហាជនទូទៅ ។ ជាពិសេស ប្រជាពលរដ្ឋរស់នៅក្នុងខេត្តប៉ៃលិនតែម្តង ខណ:ពួកគេដែលមានផ្ទះជាប់នឹងផ្លូវជាតិ សុំច្បាប់សង់រោងរៀបអាពាហ៍ពិពាហ៍ ឬរោងបុណ្យត្រឹមតែរយ:ពេល១ថ្ងៃ ឬ២ថ្ងៃ គឺអាជ្ញាធរមិនអនុញ្ញាត លុះក្រុមហ៊ុនឯកជនជួល ស្រាប់តែអនុញ្ញាតឱ្យបិទផ្លូវរយ:ពេលយូរ ក៏ផ្ទុះការរិះគន់តែម្តង ។
លោកជំទាវ ជា លាភ អភិបាលរងខេត្តទទួលបន្ទុកផ្នែកព័ត៌មានបានបន្តទៀតថា ខាងខេត្តបានប្រាប់ហើយថា ការដាក់តាំងពិព័រណ៍នេះ មិនមានករណីកកស្ទះចរាចរណ៍ ឬមានគ្រោះថ្នាក់អ្វីនោះទេ ព្រោះមានផ្លូវវាងច្រើនណាស់ ហើយស្រលះល្អទៀត ក៏មានសមត្ថកិច្ចឈរយាមគ្រប់ច្រកល្ហកផងដែរ សុំយោគយល់កុំចុះផ្សាយ ។ ប៉ុន្តែនៅពេលនិយាយគ្នាមិនទាន់បាន២ម៉ោងផង ស្រាប់តែឃើញគេហទំព័រសារព័ត៌មានចេញផ្សាយដោយដាក់ចំណងជើង «មានរឿងចម្លែកដែលខេត្តប៉ៃលិន យកផ្លូវជាតិដាក់តាំងពិព័រណ៍» ធ្វើឱ្យខេត្តមានចិត្តក្តៅក្រហាយតែម្តង ។
ដោយឡែក សម្រាប់ភ្នាក់ងារសារព័ត៌មានបានលើកឡើងដែរថា ការចុះផ្សាយពាក់ព័ន្ធនឹងការដាក់សង់រោងតាំងពិព័រណ៍នៅលើផ្លូវជាតិលេខ៥៧ថ្មីៗកន្លងមកនេះ មិនមែនជារឿងដែលអ្នកសារព័ត៌មានគ្មានក្រមសីលធម៌ ឬខ្វះវិជ្ជាជីវ:អ្វីនោះទេ គឺផ្សាយទៅតាមតែអ្វីដែលកើតឡើងពិតប្រាកដប៉ុណ្ណោះ ព្រោះជារឿងដែលចម្លែកពិតប្រាកដមែន ដោយនៅក្នុងខេត្តប៉ៃលិន គឺជាលើកទី១ហើយ ដែលអាជ្ញាធរយកផ្លូវជាតិ ជាផ្លូវសាធារណ:ដាក់ឱ្យក្រុមហ៊ុនសង់រោងលើផ្លូវ ហើយនៅពេលក្រោយទៀត បើក្រុមហ៊ុនផ្សេងឃើញដូច្នេះ គេនឹងសុំសង់រោងដាក់តាំងពិព័រណ៍ដូចគ្នា តែបើអាជ្ញាធរមិនឱ្យគេនឹងនិយាយថា ប្រកាន់បក្សខពួក មិនស្មើភាពគ្នា ហើយបើយកល្អ គួរតែរកកន្លែងណាផ្សេងធ្វើវិញ ។
លើសពីនេះ ក្រុមសារព័ត៌មានសំណូមពរដល់អង្គប្រជុំថា បើសិនជាអាជ្ញាធរចុះស្ថាបនាហេដ្ឋារចនាសម្ព័ន្ធផ្លូវថ្នល់ សាលារៀន ឬសម្ពោធ ឬចុះជួយធ្វើអ្វីដល់ប្រជាពលរដ្ឋ សូមជួយផ្តល់ព័ត៌មានជូនផង ដើម្បីឱ្យបានចុះទៅយកព័ត៌មានផ្ទាល់ យកមកផ្សាយរឿងល្អៗ ពាក់ព័ន្ធនឹងការអភិវឌ្ឍន៍ខេត្ត ។ តែមិនមែនមានន័យថា ខាងសារព័ត៌មាន ចុះផ្សាយតែរឿងរិះគន់ស្ថាបនានោះទេ គឺកន្លងមកក៏ចុះផ្សាយទាំងរឿងល្អៗ ជាច្រើន ដែលខេត្តកំពុងកសាងផងដែរ ។
ជាចុងក្រោយលោកជំទាវ ជា លាភ អភិបាលរងខេត្ត បញ្ជាក់ប្រាប់អ្នកសារព័ត៌មានទាំងអស់យ៉ាងច្បាស់ថា ខាងខេត្តមានភ្នាក់ងារព័ត៌មានទូរទស្សន៍ប្រចាំខេត្តផ្ទាល់ខ្លួនហើយ មិនចាំបាច់ឱ្យក្រុមភ្នាក់ងារផ្សេងៗ ចុះទៅថតចុះផ្សាយនោះទេ ។ លើសពីនេះ ខាងមន្ទីរព័ត៌មានខេត្ត ក៏នឹងដាក់រាល់ព័ត៌មានដែលខ្លួនចុះទៅយកផ្សាយ នៅក្នុងក្រុមតេលេក្រាម ដើម្បីឱ្យជួយផ្សព្វផ្សាយ បើរឿងណាអាចយកផ្សាយបាន ក៏ផ្សាយទៅ បើមិនបានទេក៏មិនអីដែរ។
ចែករំលែកព័តមាននេះ