ខេត្តមណ្ឌលគិរី ៖ អស់រយៈពេលជិតមួយសប្តាហ៍មកហើយ រហូតមកទល់ព្រឹកថ្ងៃទី២៧ មីនា នេះ ហ្វូងសត្វដំរីព្រៃជាច្រើនក្បាល បានបង្ហាញវត្តមាននៅស្រុកកែវសីមា ធ្វើឱ្យមានការភ្ញាក់ផ្អើលដល់អ្នកភូមិ ហើយមានការចាប់អារម្មណ៍ខ្លាំងពីសំណាក់ក្រុមអ្នកដែលស្រឡាញ់សត្វព្រៃ…
ខេត្តមណ្ឌលគិរី ៖ អស់រយៈពេលជិតមួយសប្តាហ៍មកហើយ រហូតមកទល់ព្រឹកថ្ងៃទី២៧ មីនា នេះ ហ្វូងសត្វដំរីព្រៃជាច្រើនក្បាល បានបង្ហាញវត្តមាននៅស្រុកកែវសីមា ធ្វើឱ្យមានការភ្ញាក់ផ្អើលដល់អ្នកភូមិ ហើយមានការចាប់អារម្មណ៍ខ្លាំងពីសំណាក់ក្រុមអ្នកដែលស្រឡាញ់សត្វព្រៃ ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានឱ្យដឹងថា «ដំរីមួយហ្វូងនេះមានជាង១០ទៅ២០ក្បាល ប៉ុន្តែពពួកវាបានចូលមកដល់ទីធ្លារសាលាស្រុកកែវសីមាត្រឹម៤ទៅក្បាលប៉ុណ្ណោះ គឺសមាជិកក្នុងហ្វូងនៅជិតៗគ្នាប្រមាណ៥០០ម៉ែត្រ ។ ហ្វូងដំរីទាំងនេះ តែងតែចូលមកចំណុចខាងលើជារៀងរាល់ឆ្នាំព្រោះកន្លែងនេះ(ដីសាលាស្រុក)ជាទីតាំងរបស់វាពីមុន ចឹងហើយទើបវាត្រូវមកជារៀងរាល់ឆ្នាំ ឲ្យតែដល់ខែនេះ» ។
លោកប្រធានមន្ទីរបរិស្ថានបានបន្តថា «វត្តមានហ្វូងសត្វដំរីនៅពេលនេះ គឺជារឿងល្អប្រសើរ សម្រាប់ដែនជម្រកការពារសត្វព្រៃ ដោយអាចបញ្ជាក់បានថា ព្រៃនេះនៅមានសត្វព្រៃគង់វង្សច្រើន ហើយក៏ជាការព្រួយបារម្ភផងដែរ បើសិនជាពួកវាចូលដល់តំបន់ប្រជុំជន ដែលមានមនុស្សរស់នៅច្រើន នៅពេលមនុស្សទៅដេញ ឬទៅគប់ពួកវា វាហ្នឹងអាចតតាំងជាមួយមនុស្សវិញ»។
លោក កែវ សុភគ៌ មានឲ្យដឹងថា «បច្ចុប្បន្នចំនួនសត្វដំរីព្រៃនៅខេត្តមណ្ឌលគិរី មានចន្លោះពី៣៧០ក្បាល ទៅ៥០០ក្បាល គឺមានការកើនឡើង ហើយដំរីព្រៃនៅខេត្តមណ្ឌលគិរី គឺមានតែមួយប្រភេទ គឺដំរីអាស៊ី»។លោកប្រធានមន្ទីរបរិស្ថានក៏បានអំពាវនាវដល់បងប្អូនប្រជាពលរដ្ឋ នៅពេលទៅមើលឬថតរូបហ្វូងដំរីទាំងនេះ សូមកុំបង្កការំខានដល់ពួកវា ដែលអាចមានគ្រោះថ្នាក់នានា ព្រោះចរិកដំរីព្រៃនេះ បើយើងមិនរំខានវាទេ វាក៏មិនធ្វើអីដល់មនុស្សដែរ។
សូមបញ្ជាក់ដែរថា គេបានប្រទះឃើញហ្វូងដំរីព្រៃជាច្រើនក្បាលនេះ ចូលដល់ក្នុងបរិវេណសាលាស្រុក ហើយពួកវានៅតែបង្ហាញខ្លួននៅក្នុងព្រោះរបោះក្បែរស្រះទឹកដែលមានចម្ងាយប្រមាណ៣០០ម៉ែត្រពីផ្លូវជាតិលេខ៧៦ ដោយមិនទាន់ចាកចេញទៅណាឆ្ងាយនោះទេ ។
ចែករំលែកព័តមាននេះ