រាជធានីភ្នំពេញ ៖ ស្ត្រីម្នាក់រួមរស់ជាមួយប្តីអស់រយៈពេល៨ឆ្នាំមកហើយ លុះចុងក្រោយនេះ ដោយសារតែប្តីតែងតែប្រើអំពើហិង្សាជាញឹកញាប់ និងបំផ្លាញទ្រព្យសម្បត្តិអស់ជាច្រើនទៀត រហូតរស់នៅជាមួយគ្នាលែងកើត ក៏សុំបែកផ្លូវគ្នា ។ ប៉ុន្តែក្រោយពីសុំបែកផ្លូវគ្នាបាន១០ថ្ងៃ…
រាជធានីភ្នំពេញ ៖ ស្ត្រីម្នាក់រួមរស់ជាមួយប្តីអស់រយៈពេល៨ឆ្នាំមកហើយ លុះចុងក្រោយនេះ ដោយសារតែប្តីតែងតែប្រើអំពើហិង្សាជាញឹកញាប់ និងបំផ្លាញទ្រព្យសម្បត្តិអស់ជាច្រើនទៀត រហូតរស់នៅជាមួយគ្នាលែងកើត ក៏សុំបែកផ្លូវគ្នា ។ ប៉ុន្តែក្រោយពីសុំបែកផ្លូវគ្នាបាន១០ថ្ងៃ ក៏ត្រូវបុរសជាប្តីតាមវាយបណ្តាលឲ្យរងរបួសធ្ងន់រហូតបាក់ក្តោងច្រមុះ និងបង្កឲ្យមានការភ្ញាក់ផ្អើលកាលពីវេលាម៉ោង៥ល្ងាចថ្ងៃទី២៥ ខែមីនា នៅភូមិជម្ពូវ័ន២ សង្កាត់ចោមចៅទី៣ខណ្ឌពោធិ៍សែនជ័យ ។
ស្ត្រីរងគ្រោះឈ្មោះ ឈុន លីមុន្នីរដ្ឋា អាយុ៣០ឆ្នាំ មុខរបរលក់ស៊ុបគ្រឿងក្នុង ស្នាក់នៅបន្ទប់ជួលក្នុងភូមិជម្ពូវ័ន២ សង្កាត់ចោមចៅទី៣ ចំណែកបុរសជាប្តីឈ្មោះ កែវ បូរ៉ាស៊ី អាយុ៣៦ឆ្នាំ ជាអ្នកបើកបររថយន្ត ។
តាមស្ត្រីរងគ្រោះនិយាយរៀបរាប់់ថា រូបនាងជាកូនកំព្រា និងបានស្រឡញ់គ្នាជាមួយបុរសប្តីប្រមាណ៨ឆ្នាំមកហើយ តែពុំបានរៀបអាពាហ៍ពិពាហ៍នោះឡើយ គឺរស់នៅជាមួយគ្នាតែម្ដង រហូតបង្កើតបានកូនប្រុស២នាក់ ដែលកូនបងអាយុ៥ឆ្នាំ និងកូនប្អូនទើបអាយុ២ឆ្នាំ ។
ដោយសារការរស់នៅជាមួយគ្នា ប្តីរបស់នាងតែងប្រើអំពើហិង្សាជាញឹកញាប់ និងតែងតែបំផ្លាញទ្រព្យសម្បត្តិអស់ស្ទើររាប់ម៉ឺនដុល្លារផងនោះ ធ្វើឱ្យនាងអស់ចិត្តមិនអាចទ្រាំរស់ជាមួយគ្នាបានតទៅទៀត ក៏សុំបែកផ្លូវគ្នាដោយចែកកូនគ្នាម្នាក់មួយ និងមានរយៈពេល១០ថ្ងៃមកហើយ ។បន្ទាប់ពីបែកផ្លូវគ្នា នាងក៏បានដូរផ្ទះជួល ប៉ុន្តែទើបតែ២ថ្ងៃ ប្តីនោះក៏បានយកកូនទាំង២នាក់ទៅតែម្តង ដោយចោទប្រកាន់ថានាងមិនមានសមត្ថភាពចិញ្ចឹមកូនទេ តែតាមពិតនាងមិនមែនដូចប្តីចោទប្រកាន់ឡើយ ។
ប្រភពព័ត៌មានបញ្ជាក់ថា មុនពេលកើតហេតុនាងទើបនឹងមកនៅផ្ទះជយលថ្មី ដោយមិនឲ្យបុរសជាប្តី
ដឹងឡើយ ។ ប៉ុន្តែប្តីបានតាមរកផ្ទះជួលថ្មីនោះរហូតឃើញ និងបានប្រើហិង្សាវាយនិងទាត់នាងមួយជើងបណ្តាលឱ្យបាក់ក្តោងច្រមុះហូរឈាមរហូត ហើយក៏រត់គេចខ្លួនបាត់ស្រមោលទៅ ។ ក្រោយពេលកើតហេតុ នាងបានទៅដាក់ពាក្យបណ្ដឹង ដើម្បីឱ្យសមត្ថកិច្ចឃាត់ខ្លួនបុរសជាប្តីរូបនេះមកផ្តន្ទាទោសតាមច្បាប់ ។
ជីវិតប្តីប្រពន្ធប្រហែលមិនងាយស្រួលនោះទេ ប្រសិនបើការរស់នៅមិនចុះសម្រុងគ្នា ។ ការប្រកាន់ភាពហិង្សាវាយដំប្រពន្ធពីសំណាក់បុរសជាប្តី គឺជាភាពអគតិដែលមិនគប្បីប្រព្រឹត្តឡើយ ៕
ចែករំលែកព័តមាននេះ