រាជធានីភ្នំពេញ ៖ ម៉ូតូមួយគ្រឿងបានបើកបរក្នុងល្បឿនលឿនជ្រុលទៅបុកបុរសម្នាក់ដែលកំពុងជិះកង់ឆ្លងផ្លូវ បណ្ដាលឲ្យស្លាប់ភ្លាមៗនៅនឹងកន្លែងបន្ទាប់មកអ្នកបើបរម៉ូតូធំខាងលើបម្រុងរត់គេចខ្លួនដែរ ។ ប៉ុន្តែរត់មិនរួចដោយសារតែនគរបាលប៉ុស្តិ៍ចោមចៅ៣ រួមជាមួយប្រជាពលរដ្ឋនាំគ្នាដេញចាប់បាន រួចនាំទៅសាកសួរព្រមទាំងបញ្ជូនបន្តទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាល រាជធានីភ្នំពេញចាត់ការតាមច្បាប់ ។
គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង៦និង៤០នាទីព្រឹក ថ្ងៃទី២៧ ខែមីនា ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចភូមិព្រៃស្វាយ សង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ ។ បុរសរងគ្រោះឈ្មោះ ម៉ៅ ចាន់នី ហៅរិទ្ធ អាយុ៣៦ឆ្នាំ មុខរបរកម្មករសំណង់ មានប្រពន្ធឈ្មោះ ជា តាំងហ៊ួយ អាយុ៣៣ឆ្នាំ មានស្រុកកំណើតនៅក្នុងភូមិដូនស ឃុំដូនស ស្រុកស្វាយជ្រុំ ខេត្តស្វាយរៀង មានកូនប្រុស២នាក់ ក្នុងបន្ទុកគ្រួសារ ។ សព្វថ្ងៃស្នាក់នៅផ្ទះជួលក្នុងភូមិកើតហេតុខាងលើ ចំណែកម៉ូតូបង្ក ១៥០cc ពណ៌ស ពាក់ស្លាកលេខ ភ្នំពេញ 1HM-0340 បើកបរដោយយុវជនម្នាក់ឈ្មោះ អាន ភារ៉ូត អាយុ២៤ឆ្នាំ មុខរបរកម្មករសិប្បកម្មផលិតគ្រឿងសង្ហារឹម ស្នាក់នៅកន្លែងធ្វើការ ស្ថិតនៅក្នុងភូមិអង្គស្នួល ឃុំពើក ស្រុកអង្គស្នួល ខេត្តកណ្តាល និងមានស្រុកកំណើតនៅក្នុងភូមិពោធិជ្រៃ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ។
ស្ត្រីជាប្រពន្ធបានឲ្យដឹងថា នៅមុនពេលកើតហេតុប្តីរបស់គាត់បានជិះកង់ចេញពីបន្ទប់ជួល ទៅធ្វើកាន់ការដ្ឋានសំណង់នៅ ស្ថិតនៅជិតផ្សារចោមចៅ ដោយបានធ្វើដំណើរក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុបានឆ្លងផ្លូវក្នុងបំណងសំដៅទៅទិសខាងកើតវិញ ខណៈឆ្លងដល់ចំណុចគំនូសកណ្តាលទ្រូងផ្លូវទៅហើយ ស្រាប់តែម៉ូតូបង្ក ១៥០cc នោះបើកបរក្នុងល្បឿនលឿនក្នុងទិសដៅពីកើតទៅលិចមកដល់បុកពេញទំហឹង បណ្តាលឲ្យប្ដីរបស់គាត់ដួលបោកក្បាលស្លាប់ភ្លាមៗនៅនឹងកន្លែងតែម្ដង ។
ដោយឡែកអ្នកដំណើរតាមផ្លូវខាងលើបាននិយាយថា ក្រោយពេលបើកបុកអ្នកជិះកង់បណ្ដាលឲ្យស្លាប់រួចមក អ្នកបើកបរម៉ូតូបម្រុងគេចខ្លួន ប៉ុន្តែគេចមិនរួចដោយត្រូវបានពួកគាត់រួមជាមួយកម្លាំងនគរបាលនៅជិតនោះនាំគ្នាចាប់ខ្លួនបាន ។ បន្ទាប់មកនគរបាលបាននាំយុវជននេះទៅកាន់ប៉ុស្តិ៍ចោមចៅ៣ ភ្លាមៗដែរ ដើម្បីធ្វើការសាកសួរពីមូលហេតុដែលជននេះជិះម៉ូតូលឿនហួសហេតុនៅទីប្រជុំជនរហូតបង្កគ្រោះថ្នាក់ឲ្យអ្នកដ៏ទៃស្លាប់បែបនេះ ។
នគរបាលបាននិយាយថា ក្រោយពេលសាកសួរយុវជននេះបានប្រាប់ថា ខ្លួនទើបតែវិលត្រឡប់មកពីលេងប្រពន្ធជាកម្មការនីរោងចក្រដែលស្នាក់នៅក្នុងភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។ ហើយជិះម៉ូតូក្នុងល្បឿនលឿនបែបនេះ គឺដោយសារតែខ្លួនប្រញាប់ ខ្លាចចូលធ្វើការងារនៅរោងសិប្បកម្មមិនទាន់ម៉ោង ។ ប៉ុន្តែជាអកុសលនៅខណៈពេលជិះទៅដល់ត្រង់ចំណុចកើតហេតុខាងលើក៏ស្រាប់តែជួបនូវឧប្បត្តិហេតុគ្រោះថ្នាក់ចរាចរណ៍បែបនេះតែម្តង ។ បន្ទាប់ពីសួរនាំរួចជនបង្កខាងលើ រួមទាំងម៉ូតូ និងកង់ត្រូវបានប្រគល់ជូននគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញចាត់ការបន្តតាមច្បាប់ ចំណែកសពត្រូវបានប្រពន្ធនាំទៅធ្វើបុណ្យតាមប្រពៃណី ៕
ចែករំលែកព័តមាននេះ