រាជធានីភ្នំពេញ៖ មុននេះតារាសម្តែងលោកភី ម៉ៃ បានប្រកាសថាមិនទទួលសម្តែងភាពយន្តណាមិនមានស្តង់ដាទៀតទេ ព្រោះនាំឲ្យធ្លាក់ការគាំទ្រទាំងតួសម្តែង និងឈ្មោះផលិតកម្ម ។ បន្ទាប់មកតារាសម្តែងឆឹម សក្កដា ក៏មានគោលជំហរបែបនេះដែរ ដោយលោកមិនចូលរួមសម្តែងក្នុងខ្សែភាពយន្តណាដែលផលិតមិនមានស្តង់ដានាំឲ្យអ្នកទស្សនារិះគន់ទេ ។
តារាសម្តែងឆឹម សក្កដា កាលពីពេល ថ្មីៗកន្លងមកនិយាយថាកន្លងលោកធ្លាប់សម្តែងភាពយន្តឲ្យផលិតកម្ម ផ្សេងៗ តែសាច់រឿងចេញមកត្រូវខកចិត្ត ដោយចេញផ្សាយនៅរោងមិនមានការគាំទ្រ ។ ដូចនេះហើយទើបលោកសម្រេចចិត្តដកខ្លួនចេញពីការថតរឿងដុំប្រមាណ៦ឆ្នាំ ។ នៅពេលមើលសាច់រឿង លើកក្រោយៗទៀតមិនសូវប្រទាក់ក្រឡាគ្នាទើបផ្អាកការសម្តែង ដោយសម្តែងតែរឿងភាគមួយមុខប៉ុណ្ណោះ ។ បើរឿងដុំគេទាក់ទងកន្លងមកមិនទទួលទេ ។
ឆឹម សក្កដា និយាយថា«ក្រោយ៦ឆ្នាំមកនេះខ្ញុំទទួលថតកុនរឿងដុំវិញដោយសារបានពិនិត្យសាច់រឿងរបស់ផលិតករ និងប្រវត្តិអ្នកដឹកនាំច្បាស់មានបទពិសោធន៍ល្អទើបទទួលថតឡើងវិញ ។ ជាក់ស្តែងរឿង«ទារុណកម្មខ្មោច»របស់ផលិតករហ៊ុយ យ៉ាឡេង ដែលខ្ញុំចូលរួមសម្តែងដែរនោះក្រោយពេលចាក់បញ្ចាំងឃើញថាកក្រើក។ អុីចឹងនេះមិនមែនបានមុខមាត់តែខ្ញុំទេគឺយើងបានទាំងក្រុមតែម្តង ហើយលើកក្រោយៗទៀតនោះផលិតកម្មល្បីថតរឿងល្អមើលពិតជាដក់ចិត្តអ្នកទស្សនាមានរឿង ថ្មីៗគេនាំគ្នាទិញសំបុត្រមើល ។ ខ្ញុំមិនមានគំនិតឆ្មើងឆ្មៃដំឡើងខ្លួនក្រោយលេចធ្លោនោះទេ តែនេះជាការយល់ឃើញ»។
ទោះជាយ៉ាងណាក្តីមានមតិដែរថាឆឹម សក្កដា ថាចូលរួមសម្តែងទាល់តែការផលិតមានស្តង់ដា តែលោកជាតួសម្តែង តើសម្តែងបានល្អត្រូវស្តង់ដាហើយ ឬនៅ ? ភាពយន្តមួយល្អក៏ទាក់ទងនឹងទេពកោសល្យសម្តែងរបស់តួដែរ ។ សាច់រឿងល្អ អ្វីៗល្អហើយ តែបើតួសម្តែងមិនបានល្អ គុណភាពរឿងក៏ធ្លាក់ចុះដែរ ។
ទស្សនិកជនកត់សម្គាល់ថាស្នាដៃភាពយន្តដាក់បញ្ចាំងតាមរោង កន្លងមកសន្ទុះគាំទ្ររបស់អ្នកទស្សនាមានចំនួនឡើង-ចុះ ដោយពេលខ្លះមានមនុស្សតិចបំផុតចូលទស្សនា ។ រឿងខ្លះត្រូវអ្នកមើលនិយាយថាមើលមិនយល់ ដូច្នេះហើយដល់ពេលចេញរឿងថ្មីក្រោយទៀត អ្នកមើលលែងទៅទស្សនា ព្រោះលែងទុកចិត្ត ។
ជាមតិរបស់ទស្សនិកជនមួយចំនួន គឺថាផលិតករ ឬអ្នកពាក់ព័ន្ឋភាពយន្ត គួរតែសម្តែងសាច់រឿងបែបណាឲ្យចំការចង់បានរបស់អ្នកគាំទ្រ ពិសេសត្រូវឈ្វេងយល់ថាយុវវ័យដែលមើលកុនមានចំណូលចិត្តមើលរឿងបែបណា ៕
ចែករំលែកព័តមាននេះ