រាជធានីភ្នំពេញ ៖ រដ្ឋបាលរាជធានីភ្នំពេញបានសម្រេចយកកម្រៃសេវាដឹកជញ្ជូនអ្នកដំណើរតាមកាណូត ក្រោយពីរដ្ឋបាលរាជធានីភ្នំពេញបានដាក់ឲ្យដំណើរការមិនយកកម្រៃអស់រយៈពេលប្រមាណមួយឆ្នាំកន្លងមកនេះ ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចុះថ្ងៃទី២៥ ខែមីនាឆ្នាំ ២០១៩ បានអោយដឹងថា រដ្ឋបាលរាជធានីភ្នំពេញសូមជម្រាបជូនដំណឹងដល់សាធារណជនទាំងអស់អោយបានជ្រាបថា ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋតាមផ្លូវគោកនិងផ្លូវទឹក ក្នុងន័យជួយកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ រាជរដ្ឋាភិបាលកម្ពុជាបានសម្រេចបង្កើតសេវាកាណូតដឹកជញ្ជូនអ្នកដំណើរពីសួនច្បារឬស្សីកែវដល់ក្រុងតាខ្មៅ ដោយបានចាប់ដំណើរកាលពីថ្ងៃទី៦ ខែមេសា ឆ្នាំ២០១៨ ហើយបានអនុញ្ញាតឲ្យប្រជាពលរដ្ឋជិះដោយមិនបង់ប្រាក់រហូតដល់បច្ចុប្បន្ននេះ។
បន្ទាប់ពីគោលការណ៍ជិះកាណូតដោយមិនបង់ប្រាក់បានផុតកំណត់នោះ រដ្ឋបាលរាជធានីភ្នំពេញសូមធ្វើការកែសម្រួលសេវាកាណូតដឹកអ្នកដំណើរសាធារណៈ(Taxi Boat) និងកំណត់តម្លៃសំបុត្រដូចខាងក្រោម៖
១-តម្លៃសេវាកាណូតសាធារណៈត្រូវបានកំណត់២០០០រៀល ក្នុងមួយនាក់ មួយលើក។ ២- ករណីលើកលែងមិនគិតថ្លៃសេវាគឺអនុវត្តដូចសេវារថយន្តក្រុង (City Bus) រួមមានព្រះសង្ឃ ជនពិការ សិស្ស និស្សិត ចាស់ជរាអាយុចាប់ពី៧០ ឆ្នាំឡើងទៅ កុមារមានកំពស់ក្រោម១ម៉ែត្រមកជាមួយឪពុកម្ដាយ ឬអាណាព្យាបាល កម្មករ កម្មការិនី កីឡាករ កីឡាការិនី និងលោកគ្រូអ្នកគ្រូនៃស្ថាប័នរដ្ឋ៕
ចែករំលែកព័តមាននេះ